ស្បែកជើងជ័រ ដែលមានគុណភាពមិនល្អទាំងនេះ ផ្ទុកសារធាតុគីមី ដែលអាចបង្កទៅជាជំងឺមហារីក តាមរយៈ...

ជាការពិតណាស់ សព្វថ្ងៃនេះយើងសង្កេតឃើញថា  មនុស្សភាគច្រើន ចូលចិត្តពាក់ស្បែកជើងជ័រ  ដែលមានតម្លៃថោកៗទាំងនេះណាស់។  ពួកវាអាចការពារទឹក ស្រាល   ពណ៌ក៏ស្រស់ស្អាត  ជាពិសេស មានលក់សឹងតែគ្រប់ទីផ្សារ។ 

ប៉ុន្តែទោះជាយ៉ាងណា  អ្នកជំនាញ បានណែនាំឲ្យអ្នកគួរតែបញ្ឈប់ការពាក់ស្បែកជើងជ័រទាំងនេះភ្លាម ពីព្រោះវាមានជាប់មកជាមួយសារធាតុគីមី ដែលអាចបង្កជាជំងឺមហារីកបាន។  ជាពិសេសស្បែកជើងជ័រ ដែលមានក្លិនកាន់តែឈួល គឺមានហានិភ័យកាន់តែខ្ពស់។

សូមប្រិយមិត្តតាមដានការបកស្រាយដូចខាងក្រោម ដើម្បីដឹងថាមានគ្រោះថ្នាក់ ដល់សុខភាពកម្រិតណា!

ក្រុមអ្នកជំនាញជនជាតិអាល្លឺម៉ង់មួយក្រុម បានធ្វើការសិក្សាអំពីបញ្ហាស្បែកជើងជ័រនេះ និងបានបង្ហាញលទ្ធផលថា  ពួកវាមានផ្ទុកសារធាតុគីមី  បង្កជាជំងឺមហារីកកម្រិតខ្ពស់ពិតមែន។  ក្នុងការសិក្សាស្រាវជ្រាវនោះ ក្រុមអ្នកជំនាញបានធ្វើតេស្តស្បែកជើងប្លាស្ទិចចំនួន ១០គូ  ដោយយោងទៅតាមកម្រិតតម្លៃរបស់ពួកវា។  ក្នុងមន្ទីរពិសោធន៍ ពួកគេបានរកឃើញសារធាតុគ្រោះថ្នាក់ហៅថា Polycyclic aromatic hydrocarbons (PAHs) ដែលមានក្នុងស្បែកជើងជ័រទាំងនោះ។  សារធាតុគ្រោះថ្នាក់នេះ ជាសារធាតុដែលអាចបង្កមេរោគទៅជាជំងឺមហារីកក្នុងកម្រិតខ្ពស់ ហើយមានស្បែកជើងជ័រ ៣០% ប៉ុណ្ណោះ ដែលគ្មានសារធាតុ PAHs នេះ។  គួរបញ្ជាក់ផងដែរថា សារធាតុគីមីនេះ អាចចូលក្នុងរាងកាយបាន ដោយការដកដង្ហើមចូល (ស្រូបក្លិន)  និងអាចជ្រាបតាមស្បែកចូលក្នុងរាងកាយថែមទៀតផង។

អ្នកជំនាញដែលសិក្សាលើបញ្ហានេះ  បានធ្វើការណែនាំឲ្យពាក់ស្រោមជើងការពារបន្ថែម រាល់ពេលពាក់ស្បែកជើងប្រភេទជ័រនេះ  ដើម្បីការពារស្បែកកុំឲ្យប៉ះផ្ទាល់ជាមូយសារធាតុគីមី ដែលមានជាប់នឹងស្បែកជើង។

ហេតុនេះមុនពេលសម្រេចចិត្តទិញស្បែកជើងជ័រទាំងនេះ  អ្នកត្រូវពិនិត្យលើក្លិនរបស់វាជាមុនសិន។  ប្រសិនបើមានក្លិនផ្អែម  ឬឈួលជ័រខ្លាំង  នោះមានន័យថា វាផ្ទុកសារធាតុគីមីខ្លាំងកម្រិតខ្ពស់ជាក់ជាមិនខាន៕ 

ប្រភព៖ Planet Insider