Di Maria ត្រូវតុលាការអេស្ប៉ាញពិន័យប្រាក់ ១.៧៦លានផោន និងត្រូវជាប់ពន្ធធនាគារ១ឆ្នាំ ដោយសាររឿងក្លែងបន្លំពន្ធ

បរទេស៖ ខែ្សបម្រើស្លាបរបស់ក្រុម Paris Saint-Germain កីឡាករ Angle Di Maria ត្រូវបានកាត់ទោសឲ្យជាប់ពន្ធនាគាររយៈពេល ១ឆ្នាំ និងពិន័យជាប្រាក់ ១.៧៦លានផោន (ជាង២លានដុល្លារ) ក្រោយពីរូបគេបានទទួលស្គាល់ និងសារភាពថាបានក្លែងបន្លំពន្ធ។

អតីតកីឡាកររបស់ក្រុមបិសាចក្រហម Manchester United បានទទួលស្គាល់នូវការក្លែងបន្លំឯកសារពន្ធដាច់ដោយឡែកចំនួនពីរ ដោយក្នុងឯកសារមួយគឺត្រូវកាត់ទោសជាប់ពន្ធនាគាររយៈពេល៦ខែ។  

បច្ចុប្បន្នខែ្សបម្រើស្លាបរបស់ក្រុមអ្នកមានបារាំង PSG ត្រូវបានគេរកឃើញថាបានក្លែងបន្លំពន្ធរបស់រដ្ឋាភិបាលនៃប្រទេសអេស្ប៉ាញ ក្នុងចំនួនទឹកប្រាក់ ១.១៤លានផោន (១.៤៤លានដុល្លារ) អំឡុងពេលដែលរូបគេលេងឲ្យក្លិបអធិរាជស Real Madrid ចន្លោះឆ្នាំ២០១០ រហូតដល់ឆ្នាំ២០១៤។

ទោះជាយ៉ាងណា កីឡាករវ័យ២៩ឆ្នាំ នេះ ទំនងមិនចំណាយពេលណាមួយចំពោះករណីនេះឡើយ។ នៅប្រទេសអេស្ប៉ាញ ទោសជាប់ពន្ធនាគារក្រោម២ឆ្នាំ ត្រូវបានព្យួរជាញឹកញាប់ប្រសិនបើជនជាប់ចោទមិនធ្លាប់មានបទឧក្រិដ្ឋពីមុនមកទេនោះ៕ 

ប្រភព៖ Dailymail