កុំចេះតែហ៊ាន! យកក្បាលទៅទប់កង្ហារស្លាបដែកជាប់ ញ៉ាមយកអណ្តាតទៅទប់ម្តង មានអី... យំលែងចេញ (មានវីដេអូ)

បរទេស៖   នេះជារឿងដ៏ចម្លែកមួយ ដែលបុរសម្នាក់បានព្យាយាមបញ្ឈប់កង្ហារមួយគ្រឿង ដែលមានស្លាបដែកកំពុងវិលឲ្យឈប់ ដោយប្រើក្បាល និងអណ្តាតប៉ុណ្ណោះ។

តាមរយៈវីដេអូមួយបានបង្ហាញឲ្យឃើញលោក Brad Byers សញ្ជាតិអាមេរិកាំង បានណែនាំខ្លួនឯងទៅកាន់កាមេរ៉ា  និងយកខ្មៅដៃមួយមកសាកល្បងលើស្លាបកង្ហារ ដើម្បីបញ្ជាក់ថា វាជាស្លាបដែកពិតៗ មុនពេលលោកដាក់ក្បាលចូលទៅក្នុងកង្ហារ ដើម្បីបញ្ឈប់កុំឲ្យវាវិល ហើយត្រឹមតែប៉ុន្មានវិនាទីប៉ុណ្ណោះ លោក Brad ក៏អាចបញ្ឈប់ស្លាបកង្ហារមិនឲ្យវិលបាន។

បន្ទាប់ពីនេះមក លោកក៏បានចាប់ផ្តើមប្រើអណ្តាត ដើម្បីបញ្ឈប់ស្លាបកង្ហារវិញម្តង ដោយដំបូងឡើយលោកបានចាប់កាន់តួខាងក្រៅរបស់កង្ហារ ដែលអាចធ្វើឲ្យមនុស្សមួយចំនួនគិតថា លោកចុចបិទកង្ហារមុនពេលដែលដាក់អណ្តាតចូល។ 

លោក Brad បានលានអណ្តាត និងអោនចូលទៅកៀកកង្ហារ រួចផ្ទប់អណ្តាតទៅនឹងស្លាបកង្ហារភ្លាមៗដើម្បីបញ្ឈប់វា។ ជាលទ្ធផល លោកពិតជាអាចបញ្ឈប់វាមិនឲ្យវិលបានមែន ប៉ុន្តែលើកនេះហាក់ខុសពីលើកមុន បន្ទាប់ពីបញ្ឈប់កង្ហារ លោកបានយកដៃខ្ទប់មាត់ជិត ខណៈអ្នកកាន់កាមេរ៉ាបានសួរថា “តើលោលមិនអីទេឬ? ឲ្យខ្ញុំមើលតិចមើល”។

ពេលនោះលោកបានដកដៃចេញ ហើយហាមាត់ឡើង ទើបឃើញអណ្តាតរបស់គាត់ឡើងក្រហមច្រាល ដូចជាអណ្តាតនោះកំពុងតែចេញឈាម។ ស្រ្តីជាអ្នកកាន់កាមេរ៉ា ក៏បានលាន់មាត់ថា “អូព្រះអើយ” មុនពេលវីដេអូនោះត្រូវបានបញ្ចប់។

យើងមិនដឹងថាមានអ្វីកើតឡើងឲ្យច្បាស់ចំពោះអណ្តាតរបស់លោក Brad ឡើយ។ មានអ្នកមើលវីដេអូនេះ មួយចំនួនបាននិយាយថា លោក Brad បានលូកដៃចូកទៅក្នុងហោប៉ៅ ហើយបន្ទាប់មកបានលូកដៃចូលទៅក្នុងមាត់ ដូចជាយកអ្វីមួយទៅដាក់អ៊ីចឹង។   យ៉ាងណាក៏ដោយ យោងតាមទឹកមុខរបស់លោក អាចបញ្ជាក់ថា លោកហាក់មានការឈឺចាប់ ដែលនេះអាចជារឿងពិតមិនមែនសម្តែងឡើយ។

យ៉ាងណាមិញ ប្រសិនបើវាជាជាការសម្តែងក៏ដោយ ប៉ុន្តែលោកអ្នកមិនគួរសាកល្បងធ្វើតាមលោក Brad នៅផ្ទះ ឬនៅទីសារធារណៈណាមួយឡើយ ព្រោះការធ្វើបែបនេះ ប្រាកដណាស់ថាអាចបណ្តាលឲ្យមានគ្រោះថ្នាក់បាន បើទោះជាតិច ឬច្រើនក៏ដោយក្តី៕ 

ប្រភព៖ Dailymail

• វីដេអូ