រាជធានីភ្នំពេញ ៖ សេចក្តីរាយការណ៍ឱ្យដឹងថា ក្រោយពេលតុលាការសម្រេចចេញដីការួច និងខណ:ពេលកម្លាំងសមត្ថកិច្ច កងរាជអាវុធហត្ថ នាំខ្លួនជនសង្ស័យទាំង២នាក់ចេញពីសាលាដំបូង ទៅកាន់ពន្ធនាគារព្រៃ.ស ដើម្បីឃុំខ្លួនជាបណ្តោះអាសន្ននោះ គេបានប្រទះឃើញអ្នកនាងឃ្មិប ដែលជាម្តាយបង្កើតបានស្ទុះរត់ទៅអោបកូនប្រុស (ជនសង្ស័យ) ដោយស្រែកទ្រហោយំពេញតុលាការ ដោយពោលពាក្យថា «ខំថែរក្សាខ្លួនណាកូន» ។
ប្រភពឱ្យដឹងទៀតថា ទន្ទឹមនឹងម្តាយស្រែកយំនោះ ក៏បានឮសំឡេងកូនប្រុស ដែលជាឃាតករវ័យក្មេងសម្លាប់ម្តាយក្រោយ បានស្រែកតបទៅម្តាយឃ្មិបវិញថា «កូនខុសហើយម៉ែ» ដែលធ្វើឱ្យគ្រប់គ្នានៅជុំវិញមានការរន្ធត់ និងរំជួលចិត្តជាខ្លាំង។
គួររំលឹកថា ចៅក្រមស៊ើនសួរសាលាដំបូងរាជធានីភ្នំពេញ លោកលាង សំណាត់ នារសៀលថ្ងៃទី១៦ ឧសភា ដដែលនេះ បានសម្រេចចេញដីកាឃុំខ្លួនកូនប្រុសនាយហុង ដា និងសង្សារ ដាក់ពន្ធនាគារព្រៃ.សបណ្តោះអាសន្ន ។ ជនជាប់សង្ស័យឈ្មោះខាសុខេន ឬអឿន សុខា ឬហៅនិត ភេទប្រុស អាយុ១៧ឆ្នាំ ត្រូវបានតំណាងអយ្យការចោទប្រកាន់ពីបទ «ឃាតកម្មគិតទុកជាមុន» តាមមាត្រា២០០ នៃក្រមព្រហ្មទណ្ឌ ។
ដោយឡែក នារីជាប់ចោទជាសង្សារ ឈ្មោះនេត រស្មីកន្និកា ហៅស្រីកា អាយុ១៧ឆ្នាំ ក្រោមការចោទប្រកាន់ពីបទសមគំនិត ក្នុងអំពើឃាតកម្មគិតទុកជាមុន តាមមាត្រា២៩ និងមាត្រា២០០ នៃក្រមព្រហ្មទណ្ឌ ដូចគ្នា ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
