ខេត្តកំពង់ស្ពឺ ៖ ក្មេងស្រីម្នាក់បានសំរេចចិត្តចង.ក សម្លាប់ខ្លួន ព្រោះតែការចោទប្រកាន់មកលើនាងដែលគ្មាន ហេតុផលពីសំណាក់មនុស្សចាស់ ធ្វើឱ្យនាងមានការខ្មាសអៀនអ្នកភូមិ ទើបជ្រើសយកផ្លូវមរណៈ មកដាក់ខ្លួនបែបនេះ។ ហេតុការណ៍នេះកើតឡើងកាលពីចន្លោះម៉ោង ១០ទៅ១១នាទី ថ្ងៃទី២៧ ខែមេសា ឆ្នាំ២០១៧ ស្ថិតនៅភូមិស្វាយទាប ឃុំអង្គពពេល ស្រុកកអពិសី ។ ក្មេងស្រីរងគ្រោះឈ្មោះ ទឹម សុនិតា ភេទស្រី អាយុ13ឆ្នាំ រស់នៅភូមិ-កើត ហេតុខាងលើជាមួយម្តាយ។
បើតាមការសាកសួរលើស្ត្រីម្នាក់ឈ្មោះ សួង កាន ត្រូវជាជីដូនក្មេងស្រីរងគ្រោះបានរៀបរាប់ប្រាប់សមត្ថកិច្ចថា មុនពេលកើតហេតុក្មេងស្រីរងគ្រោះបាននាំប្អូនជិះកង់ដើរលេងក្នុងភូមិតាមធម្មតា លុះជិតដល់ម៉ោងដាំបាយក៏នាំប្អូនត្រឡប់មកផ្ទះវិញ ពេលមកដល់ផ្ទះមួយសន្ទុះ ស្រាប់តែស្ត្រីម្នាក់ឈ្មោះ ប្រាក់ សម្ភស្ស អាយុ40ឆ្នាំ មកសួរក្មេងស្រីរងគ្រោះជាចៅរបស់គាត់ថា គេបានបាត់លុយចំនួន10ម៉ឺនរៀល តើឯងមានលួចទេ ។
ពេលនោះចៅរបស់គាត់បានឆ្លើយថា មិនដឹងនោះទេ ព្រោះនាងមិនបានចូលទៅផ្ទះគេឡើយ។ ស្ត្រីជាយាយបានបន្តទៀតថា បើទោះជាចៅរបស់គាត់បដិសេធយ៉ាងណា ក៏ស្ត្រីនោះនៅតែមិនជឿ ហើយបានចាប់ឆែកលើខ្លួនចៅស្រីរបស់គាត់នៅមុខមនុស្សជាច្រើននៅតែរកមិនឃើញលុយនោះឡើយ ពេលឆែកលើខ្លួនចៅស្រីគាត់រួចហើយ ស្ត្រីនោះក៏ត្រឡប់ទៅផ្ទះវិញបាត់ទៅ ។
ក្រោយមករូបគាត់ (ជីដូនសួង កាន) បានប្រើចៅឱ្យទៅដាំបាយ ព្រោះម្តាយនាងជិតចេញពីធ្វើការហើយ។ ក្រោយគាត់ប្រើចៅឱ្យទៅដាំបាយ ចៅគាត់បានដើរទៅឡើងលើផ្ទះបាត់ទៅ ។ ពេលចៅឡើងលើផ្ទះបាត់យូពេកមិនឃើញចុះមកវិញ ធ្វើឱ្យគាត់ឆ្ងល់ថា ហេតុអ្វីបានជាមិនឃើញចៅចុះមកវិញ ពេលនោះរូបគាត់ក៏ឡើងទៅតាមរកមើល ស្រាប់តែឃើញចៅរបស់គាត់ចង.កស្លាប់បាត់ទៅហើយ។
លោកវរសេនីយ៍ត្រី ទុយថេន អធិការរងនគរបាលស្រុកគងពិសី បានឱ្យដឹងថា តាមការពិនិត្យលើខ្លួនសព និងនៅកន្លែងកើតហេតុឃើញបន្សល់កៅអីជ័រ០១ ខ្សែអង្រឹង០១ នៅកន្លែងកើតហេតុ។ សមត្ថកិច្ចបានសន្និដ្ឋានថា ក្មេងស្រីរងគ្រោះបានយកខ្សែអង្រឹង និងកៅអីជ័រជាន់ឡើងចង.កភ្ជាប់ទៅនឹងធ្នឹមផ្ទះរបស់ខ្លួន បណ្តាលឱ្យស្លាប់នៅនិងកន្លែងកើតហេតុមែន ។
ក្រោយពិនិត្យចប់សមត្ថកិច្ចបានបំពេញឯកសារ រួចប្រគល់សពឱ្យគ្រួសារទទួលរៀបចំធ្វើបុណ្យតាមប្រពៃណីផងដែរ រហូតមកដល់រសៀលថ្ងៃទី២៨ មេសានេះ ពិធីបុណ្យនៅមិនទាន់ចប់នៅឡើយ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]