អូស្រ្តាលី៖ ក្រោយធ្វើដំណើរមកដល់ប្រទេសអូស្ត្រាលី ដើម្បីផ្សព្វផ្សាយការប្រកួតហើយនោះ ទីបំផុត ស្តេចប្រដាល់របស់ប្រទេសហ្វីលីពីន Manny Pacquiao បានជួបដៃគូប្រកួតរបស់ខ្លួនផ្ទាល់ជាលើកទីមួយហើយ កាលពីថ្ងៃពុធកន្លងទៅនេះ នៅក្នុងកីឡដ្ឋាន Suncorp ដែលជាទីកន្លែងប្រកួតរបស់អ្នកទាំងពីរ។
គួរឲ្យដឹងថា ក្នុងជំនួបប៉ះគ្នានៅលើសង្វៀន ជាមួយអ្នកប្រដាល់ Jeff Horn នៅថ្ងៃទី០២ ខែកក្កដា ខាងមុខនេះ Pacquiao បាននិយាយនៅក្នុងសន្និសីទសារព័ត៌មាន ក៏ដូចជានៅនឹងមុខដៃគូប្រកួតរបស់ខ្លួនថា «ខ្ញុំមានទំនុកចិត្តខ្ពស់ ដើម្បីឈ្នះការប្រកួតនេះ ហើយក៏មិនបន្ធូរដៃនៅក្នុងការប្រកួតនេះដែរ» ។
នៅពេល Pacquiao មកដល់ប្រទេសអូស្រ្តាលីដំបូង កីឡាកររូបនេះបាននិយាយ លោកមិនសូវដឹងច្រើនពីគូប្រកួតរបស់ខ្លួនប៉ុន្មានទេ តែលោកជឿជាក់ថា Jeff Horn នឹងមានតិចនិកផ្ទាល់ខ្លួនមួយ ដើម្បីធ្វើឲ្យការប្រកួតនេះកាន់តែជក់ចិត្ត។
អ្នកប្រដាល់ដែលជាម្ចាស់ខ្សែក្រវ៉ាត់ពិភពលោកចំនួន១១ដងរូបនេះ បានបន្តទៀតថា «ខ្ញុំមិនមើលងាយគូប្រកួតនោះទេ តែខ្ញុំចង់ឲ្យដៃគូរបស់ខ្ញុំបញ្ចេញឲ្យអស់ នូវអ្វីដែលគេមាន។ ចំពោះខ្ញុំវិញ ធម្មតាខ្ញុំតែងតែបញ្ចេញនូវកណ្តាប់ដៃវាយលើគូប្រកួត ដូច្នេះ ថ្វីបើ Jeff មានតិចនិកប្រកួតមានផ្ទាល់ខ្លួនមែន តែខ្ញុំជឿជាក់ថា គេនឹងទទួលរងសម្ពាធច្រើនពីខ្ញុំ» ៕
ដូច្នេះចាំមើលទាំងអស់គ្នាថា នៅថ្ងៃទី០២ ខែកក្កដា ខាងមុខនេះ តើ Pacquiao អាចការពារខ្សែក្រវ៉ាត់របស់ខ្លួន ទល់នឹងអ្នកប្រដាល់ Jeff Horn បានឬយ៉ាងណា?
ប្រភព៖ Dailymail
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]