ខេត្តព្រះសីហនុ ៖ ព្រឹកថ្ងៃទី២៥ មេសា បុរសញៀនថ្នាំម្នាក់ បានធ្វើអត្តឃាតដោយចង.កនៅក្រោមជណ្តើរ បង្កឱ្យមានការភ្ញាក់ផ្អើលដល់សមត្ថកិច្ចចុះមកត្រួតពិនិត្យ ។
ជុំវិញការចងកសម្លាប់ខ្លួននេះ ឪពុកម្តាយបុរសនោះបានរៀបរាប់ថា កូនរបស់គាត់ញៀនថ្នាំជាច្រើនឆ្នាំហើយរហូតមានសតិមិនប្រក្រតី បើទោះជាគាត់ខំអប់រំប្រៀនប្រដៅយ៉ាងណាក្តី ។ មិនត្រឹមតែប៉ុណ្ណោះ គាត់បានយកទៅដាក់នៅមណ្ឌលកែប្រែខេត្តបន្ទាយមានជ័យចំនួន២ដង និងចុងក្រោយបានយកទៅដាក់នៅមណ្ឌលកែប្រែក្រុងព្រះសីហនុ តែខាងមណ្ឌលលែងទទួល ព្រោះអាការញៀនថ្នាំមានសភាពធ្ងន់ធ្ងរទៅហើយ ។
កូនប្រុសគាត់ដែលបានធ្វើអត្តឃាតនោះឈ្មោះ យិល ខេង ភេទប្រុស អាយុ៤២ឆ្នាំ ពុំទាន់មានប្រពន្ធកូននោះទេ ។ នៅថ្ងៃកើតហេតុវេលាម៉ោង៥ភ្លឺ កូនគាត់ដេកក្នុងបន្ទប់ ឯគាត់ទាំងពីរនាក់ប្តីប្រពន្ធចុះមករៀបចំអីវ៉ាន់លក់នៅជាន់ផ្ទាល់ដី ដោយដើរចុះឡើងរៀបមិនដឹងនោះទេ ។ រហូតដល់ម៉ោង៦ព្រឹកទើបប្រទះឃើញកូនចង.កនៅក្រោមជណ្តើរជាមួយខ្សែភ្លើង ។ ឃើញដូចនោះ គាត់បានស្ទុះទៅកាត់ខ្សែភ្លើង ក្នុងបំណងជួយសង្គ្រោះ តែហួសពេលទៅហើយ ។
សូមបញ្ជាក់ផងដែរថា នៅខេត្តព្រះសីហនុ នាពេលបច្ចុប្បន្ន បើទោះជាការបង្ក្រាបគ្រឿងញៀនមានជាហូរហែយ៉ាងណាក្តី ក៏គេសង្កេតឃើញថា ករណីគ្រឿងញៀនហាក់ពុំមានការថមថយឡើយ ឯការចរាចរថ្នាំញៀនទាំងនេះនៅតែមានជាហូរហែនៅតាមចំណុចគោលដៅមួយចំនួន ។
ដោយឡែកបើយោងតាមប្រភពពីមន្ត្រីពន្ធនាគារបានបង្ហើបឱ្យដឹងថា គិតមកដល់ពេលនេះ ចំនួនអ្នកជាប់ពន្ធនាគារបានកើនឡើងរហូតជិត៩០០នាក់ហើយ ខណៈទំហំពន្ធនាគារអាចផ្ទុកអ្នកជាប់ទោសបានត្រឹមតែ៥០០ទៅ៦០០នាក់ប៉ុណ្ណោះ ហើយអ្នកជាប់ទោសទាំងនោះភាគច្រើនពាក់ព័ន្ធបទល្មើសសេព រក្សាទុក និងចែកចាយថ្នាំញៀន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
