(ភ្នំពេញ)៖ គ្រោះថ្នាក់ចរាចរណ៍បង្កដោយរថយន្តមួយគ្រឿង បើកបុករះម៉ូតូនៅតាមផ្លូវព្រះមុនីវង្ស សង្កាត់បឹងត្របែក ខណ្ឌចំការមន ពោលនៅជិតច្រមុះជ្រូកក្បាលថ្នល់នោះ បានបណ្តាលឲ្យស្លាប់៣នាក់ របួសចំនួន៨នាក់ និងខូចខាតម៉ូតូចំនួន៧គ្រឿង។ នេះបើយោងតាមលោក សែម គន្ធា នាយរងការិយាល័យចរាចរណ៍ នៃស្នងការដ្ឋាននគរបាលរាជធានីភ្នំពេញ បានថ្លែងប្រាប់អង្គភាព Fresh News នៅព្រឹកថ្ងៃទី២៨ ខែមីនា ឆ្នាំ២០១៧នេះ។
លោក សែម គន្ធា បានបញ្ជាក់ថា ជនបង្កមានឈ្មោះ មាស សុខហេង អាយុ៣០ឆ្នាំ ជាអ្នកលក់ទូរសព្ទ័ដៃ រស់នៅផ្ទះលេខ១១១ ផ្លូវជាតិលេខ២ ភូមិទួលរការ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដែលបច្ចុប្បន្នកំពុងសម្រាកព្យាបាលនៅមន្ទីររុស្ស៊ី ដោយសារតែប្រជាពលរដ្ឋ ដែលខឹងសម្បាយ៉ាងខ្លាំង បាននាំគ្នាវាយស្ទើរស្លាប់នៅកន្លែងកើតហេតុ។
បើតាមលោក សែម គន្ធា សម្រាប់ជនរងគ្រោះដែលស្លាប់ទាំង៣នាក់នោះ មានស្រី២នាក់ ត្រូវជាម្តាយមីង និងក្មួយ ហើយបុរសម្នាក់ទៀត ត្រូវជាប្តីរបស់ស្រ្តីរងគ្រោះ (មីង)។ បុរសរងគ្រោះជាពលករខ្មែរនៅកូរ៉េ ហើយបានធ្វើដំណើរមកស្រុកវិញ ដើម្បីត្រៀមចូលរួមពិធីមង្គលការ ក្មួយស្រីរបស់ខ្លួន នាពេលខាងមុខដ៏ខ្លីនេះ។
ជនរងគ្រោះទី១ឈ្មោះ វ៉ង សុខណាក់ អាយុ៣៥ឆ្នាំ រស់នៅភូមិ៣ ឃុំកោះសំរោង ស្រុកកំពង់សៀម ខេត្តកំពង់ចាម និងប្រពន្ធដែលស្លាប់ជាមួយឈ្មោះ សេង អាន អាយុ២៥ឆ្នាំរស់នៅជាមួយគ្នានេះ។ ដោយឡែក ក្មួយស្រីដែលជិតរៀបការនោះឈ្មោះ ណា ស្រីនីន អាយុ២៣ឆ្នាំ រស់នៅផ្ទះលេខ៧សេ ផ្លូវលេខ៤៨៨ សង្កាត់បឹងត្របែក ខណ្ឌចំការមន។
លោក សែម គន្ធា បានបន្តទៀតថា សម្រាប់ជនរងគ្រោះទំាំង៨នាក់ មានរងរបួសធ្ងន់ចំនួន៦នាក់ និងស្រាល២នាក់ កំពុងសម្រាកនៅព្យាបាលនៅមន្ទីរស្ស៊ី មន្ទីរពេទ្យលោកសង្ឃ និងមន្ទីរពេទ្យកាល់ម៉ែត។ បើតាមមន្រ្តីនគរបាលរូបនេះ មុនពេលកើតហេតុ ជនបង្កបានបើករថយន្តម៉ាក Camry ពណ៌ទឹកមាស ពាក់ស្លាកលេខភ្នំពេញ 2M-2245 ធ្វើដំណើរបញ្ច្រាស់ទិសចរាចរណ៍ (បញ្ច្រាស់ផ្លូវ) តាមមហាវិថីព្រះមុនីវង្ស ក្នុងទិសដៅពីជើងទៅត្បូង លុះមកដល់ចំណុចកើតហេតុ បានបុករះម៉ូតូរបស់ជនរងគ្រោះទាំង៧គ្រឿងតែម្តង។ សម្រាប់មូលហេតុនេះ ត្រូវលោកបានបញ្ជាក់ថា បើកលឿន និងបញ្ច្រាស់ទិសចរាចរណ៍។
បើតាមសេចក្តីរាយពីភ្នាក់ងារ Fresh News បានឲ្យដឹងថា ដោយសារតែកំហឹងខ្លាំងពេក ប្រជាពលរដ្ឋនៅកន្លែងកើតហេតុ បាននាំគ្នាវាយអ្នកបើករថយន្តស្ទើរស្លាប់ និងនាំគ្នាទៅវាយរថយន្តបណ្តាលឲ្យខូចខាតស្ទើរទាំងស្រុងផងដែរ។ បន្ទាប់ពីកើតហេតុកម្លាំងសមត្ថកិច្ចបានព្យាយាមជួយយកអ្នកបើករថយន្ត ចេញពីកន្លែងកើតហេតុ និងជួយអន្តរាគមន៍ ដោយសារតែមានការផ្ទុះតវ៉ាយ៉ាងខ្លាំងពីប្រជាពលរដ្ឋ។
ជាមួយគ្នានេះ កម្លាំងនគរបាលក៏បានបញ្ជូនរថយន្តពន្លត់អគ្គិភ័យទៅជួយបាញ់ទឹក ខ្លាចក្រែងផ្ទុះឆេះនៅពេល ប្រជាពលរដ្ឋវាយកម្ទេចនោះ។
សម្រាប់រថយន្តបង្កដែលខូចខាតស្ទើរទាំងស្រុងនោះ និងម៉ូតូរបស់ជនរងគ្រោះផ្សេងទៀត ត្រូវបានសមត្ថកិច្ចយកទៅរក្សាទុក នៅការិយាល័យចរាចរណ៍ផ្លូវគោក ដើម្បីចាត់ការបន្តទៀតតាមផ្លូវច្បាប់។ យ៉ាងណាក៏ដោយ ស្ថានភាពរញ៉េរញ៉ៃ ដែលប្រជាពលរដ្ឋផ្ទុះកំហឹងយ៉ាងខ្លាំងនោះ បានស្ងប់ស្ងាត់ទៅវិញ នៅប៉ុន្មានម៉ោងក្រោយ៕
សូមទស្សនាវិដេអូផ្សាយផ្ទាល់ ពីកន្លែងកើតហេតុ៖
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ ដោះស្រាយគ្នាមិនត្រូវទៅស្បថនៅព្រះអង្គដងកើរ
រាជធានីភ្នំពេញ ៖ ស្ត្រីម្នាក់ជាអាជីវករលក់ដូរ អីវ៉ាន់ចាប់ហួយ បានដាក់ពាក្យបណ្ដឹងសុំឲ្យនគរបាលប៉ុស្ដិ៍កាកាប ជួយអន្តរាគមន៍ដើម្បីឃាត់បុគ្គលិកផ្នែកលក់បារីម្នាក់ ចាត់ការតាមច្បាប់ ដោយនាងបានចោទប្រកាន់ថា បុគ្គលិកម្នាក់នោះបានយកបារីទៅដាក់នៅកន្លែងលក់ដូររបស់នាង ហើយឆ្លៀតពេលកំពុងជាប់រវល់ធ្វើម្ហូប ក៏ធ្វើសកម្មភាពលួចដោះយកខ្សែ.កប្លាទីនកូនស្រីរបស់នាង ។
ហេតុការណ៍នោះបានកើតឡើង កាលពីវេលាម៉ោង១១និង៤៥នាទីថ្ងៃត្រង់ ថ្ងៃទី២៧ ខែមីនា ឆ្នាំ២០១៧ នៅចំណុចផ្ទះលក់ចាប់ហួយដែលមានយីហោ «មុំ ស្រីឌី» ស្ថិតនៅក្នុងភូមិប៉ប្រ៉កខាងជើង សង្កាត់កាកាប ខណ្ឌពោធិ៍សែនជ័យ។
ជនសង្ស័យដែលរងការចោទប្រកាន់នោះ មិនត្រូវបានស្គាល់ឈ្មោះឡើយ ចំណែកស្ត្រីអ្នកលក់អីវ៉ាន់ចាប់ហួយនោះ ក៏មិនត្រូវបានស្គាល់ឈ្មោះដែរ ប៉ុន្តែនាងបានប្រាប់ថា នៅមុនពេល កើតហេតុ ខណៈពេលដែលគាត់ទៅធ្វើម្ហូបនៅខាងក្រោយ បានដាក់កូនតូចឲ្យដេកនៅលើគ្រែខាងមុខ ពេលនោះជនសង្ស័យបានយកបារីទៅដាក់ឲ្យគាត់ ហើយឆ្លៀតពេលដែលគាត់កំពុងជាប់ដៃមិនបានមើល ជននោះក៏បានធ្វើសកម្មភាពដោះយកខ្សែ.កពីកូនស្រីរបស់គាត់អាយុទើបមានអាយុ៤ខែ ១ខ្សែទម្ងន់២ជី ពីកូនស្រីគាត់តែម្ដង។
បន្ទាប់មកជននោះបានដាក់បារីរួចរាល់ ក៏បានចាកចេញទៅបាត់ ចំណែកគាត់ក្រោយពេលដែលគាត់ធ្វើម្ហូបរួច បានដើរទៅខាងមុខ ស្រាប់តែបាត់ខ្សែ.កកូនស្រី ទើបសង្ស័យទៅលើជននោះ ហើយបានខលឲ្យជននោះឈប់ ហើយគាត់បានទៅនាំជននោះត្រឡប់ទៅផ្ទះគាត់វិញ ដើម្បីជជែកគ្នា ប៉ុន្តែខណៈនោះគាត់បានត្រឡប់មកដល់ផ្ទះយូរហើយ ស្រាប់តែបាត់ជននោះ ទើបគាត់តាមរកម្ដងទៀត រហូតដល់ឃើញ ហើយនាំទៅដោះស្រាយគ្នាមិនត្រូវ ក៏បានប្ដឹងឲ្យនគរបាលឃាត់ខ្លួននាំទៅសាកសួរតែម្ដង។
នគរបាលបាននិយាយថា ទាំងជនសង្ស័យ និងស្ត្រីអ្នកប្ដឹងនោះមិនត្រូវបានស្គាល់ឈ្មោះនោះទេ ព្រោះនៅពេលនោះកម្លាំងមិនបានទទួលពាក្យបណ្ដឹង ដោយសារគ្មានភស្តុតាង ហើយជននោះបានប្រកែករហូត ទើបកម្លាំងមិនអាចកំណត់បានថា ជននោះគឺជាអ្នកលួចខ្សែ.កនោះ ឬយ៉ាងណា ទើបមិនបានធ្វើកំណត់ហេតុឡើយ។ បន្ទាប់មកភាគីទាំងសងខាងបានដឹកដៃគ្នាទៅស្បថនៅព្រះអង្គដងកើរ មុខព្រះបរមរាជវាំងតែម្ដង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
