ញាក់សាច់! រថយន្តប៉ូលិស Bugatti Veyron ក្នុងក្រុងឌូបៃ ជាប់កំណត់ត្រាពិភពលោក ជារថយន្តប៉ូលិសលឿនបំផុត (មានវីដេអូ)

អារ៉ាប់រួម៖ សារព័ត៌មាន CNN បានចុះផ្សាយថា រថយន្តប៉ូលិសម៉ាក Bugatti Veyron នៅក្នុងក្រុងឌូបៃ  ត្រូវបានប្រកាសថាជា រថយន្តប៉ូលិសលឿនជាងគេបំផុតលើពិភពលោកជាផ្លូវការ  ចុះក្នុងសៀវភៅកំណត់ត្រា Guinness World Records ដែលអាចបង្កើនល្បឿនអតិបរិមារហូតដល់ ៤០៧ គីឡូម៉ែត្រក្នុងមួយម៉ោង។

ប្រភពព័ត៌មានបានឲ្យដឹងថា រថយន្តប៉ូលិសម៉ាក Bugatti Veyron នេះត្រូវបានដាក់ឱ្យប្រើប្រាស់ក្នុងឆ្នាំ ២០១៦ ដោយចំណាយប្រាក់អស់ ១.៦លានដុល្លារ ប៉ុន្តែវាមិនមែនជារថយន្តស្ព័រ ល្បឿនលឿនរបស់កងកម្លាំងប៉ូលិសទីក្រុងឌូបៃទីមួយនោះទេ ដោយសារពួកគេមានរថយន្តស្ព័រចំនួន ១៤ គ្រឿងរួចទៅហើយ ដូចជារថយន្តម៉ាក Ferrari FF រថយន្ត Lamborghini Aventador និង Aston Martin One-77 ដែលផលិតតែ ៧៧គ្រឿងក្នុងលោក ជាដើម និងប្រភេទរថយន្តទំនើបៗមួយចំនួនទៀត។ 

គួររំឮកថា អ្នកកាន់កាប់កំណត់ត្រាដំបូង ជាកម្មសិទ្ធិរបស់កងកម្លាំងប៉ូលិសអ៊ីតាលី ដែលបានប្រើប្រាស់រថយន្តស្ព័រ ប្រភេទ Lamborghini Gallardo LP560-4 ដែលអាចបង្កើនល្បឿនអតិបរិមា ៣៧០ គីឡូម៉ែត្រក្នុងមួយម៉ោង។

ប្រភពបានបន្តថាក្រុមរថយន្តទំនើបរបស់ប៉ូលិសឌូបៃ ត្រូវបានដាក់ឱ្យប្រើប្រាស់ក្នុងឆ្នាំ ២០១៣ ដើម្បីជួយលើកកម្ពស់មុខមាត់សាធារណៈរបស់កងកម្លាំងប៉ូលិស។ ប៉ុន្តែរថយន្តទំនើបទាំងនេះមិនមែនប្រើសម្រាប់បើកប្រដេញបទល្មើសនោះទេ គឺវាត្រូវបានប្រើប្រាស់ដើម្បី បើកបរត្រូតពិនិត្យនៅជុំវិញតំបន់ទេសចរណ៍ និងសម្រាប់ជាការទាក់ទាញចំណាប់អារម្មណ៍។

ទន្ទឹមនឹងការប្រើប្រាសរថយន្តឆើតឆាយ ប៉ូលិសក្រុងឌូបៃ ក៏ចង់បង្ហាញពីសមភាពយេនឌ័រ របស់ខ្លួនផងដែរ ដោយការបង្ហាញពីការពិតដែលថាភាគច្រើននៃអ្នកបើកបររថយន្តប៉ូលិសទាំងនោះ គឺជាស្ត្រី និងមានភាពរួសរាយរាក់ទាក់ខ្លាំងមែនទែន។ ភាពរួសរាយរាក់ទាក់ គឺពិតជាសំខាន់មែនទែន ព្រោះថាមនុស្សម្នាតែងតែមកនិយាយលេងសើច ដោយសុំឲ្យប៉ូលិសចាប់ខ្លួនពួកគេ ដូច្នេះពួកគេអាចចូលជិះក្នុងរថយន្ទទំនើបទាំងនោះហើយ។

គួរបញ្ជាក់ថា បច្ចុប្បន្ននេះ ក្រុមមន្ត្រីប៉ូលិសឌូបៃ ចង់ពង្រឹងដល់ការរក្សាបរិស្ថាន និងមានគម្រោងប្រើប្រាស់រថយន្តហាយប្រ៊ីដ និង អគ្គីសនី ក្នុងចំនួន ២៥ភាគរយ នៃបណ្តុំរថយន្តរដ្ឋាភិបាលនៅត្រឹមឆ្នាំ ២០៣០៕ 

ប្រភព៖ CNN

ដោយឡែកព័ត៌មានគួរឲ្យចាប់អារម្មណ៍មួយទៀត៖ ប្រវត្តិតស៊ូរបស់លោក Elon Musk ពីបុគ្គលសាមញ្ញម្នាក់ ក្លាយទៅជាមហាសេដ្ឋីបច្ចេកវិទ្យាដ៏ល្បី

លោក អីឡូន ម៉ាសក៍ (Elon Musk) គឺជាមហាសេដ្ឋីក៏ល្បីល្បាញរបស់អាមេរិកមួយរូបដែល មានដើមកំណើតមកពីប្រទេសអាហ្រ្វិកខាងត្បូង។ បច្ចុប្បន្ន លោកមានក្រុមហ៊ុនល្បីៗនៅក្នុងដៃ ដូចជា SolarCity, SpaceX និង Tesla Motors ជាដើម ហើយដោយសារតែភាពជោគជ័យរបស់លោក ពេលនេះគាត់មានទ្រព្យសម្បត្តិសរុបប្រមាណ ១៣,៩ ពាន់លានដុល្លារអាមេរិកទៅហើយ។

លោក ម៉ាសក៍ បានរៀបការជាមួយប្រពន្ធចំនួន ២នាក់ និងមានកូនចំនួន ៥នាក់។ នៅឆ្នាំ២០០០ លោកបានរៀបការជាមួយអ្នកស្រី Justine Wilson ហើយនៅក្នុងឆ្នាំ២០០២ លោកក៏មានកូនប្រុសដំបូង តែត្រូវស្លាប់ក្រោយកើតបាន ១០សប្តាហ៍ ដោយសារជំងឺទារក SIDS ។ ក្រោយមកពួកគេក៏មានកូនចំនួន៥នាក់ទៀត ដោយជាកូនភ្លោះ២ និង៣។

បន្ទាប់ពីមានការលែងលះដ៏ចម្រូងចម្រាសរួចមក ម៉ាសក៍ ក៏បានរៀបការជាមួយប្រពន្ធទី២ គឺនាង Talulah Riley ដែលជាតារាសម្តែង នៅក្នុងឆ្នាំ២០១០។ ២ឆ្នាំក្រោយមកពួកគេក៏បានចែកផ្លូវគ្នា ប៉ុន្តែនៅឆ្នាំ២០១៣ ពួកគេក៏បានរៀបការជាថ្មីម្តងទៀត ហើយនៅទីបំផុត ទំនាក់ទំនងរបស់ពួកគេ បានបញ្ចប់ ដោយការលែងលះគ្នានៅឆ្នាំ ២០១៦។

រំឮកអំពីប្រវត្តិ៖

លោក អីឡូន ម៉ាសក៍ (Elon Musk) មានដើមកំណើតនៅប្រទេសអាហ្រ្វិកខាងត្បូង រូបលោកបានកើតនៅថ្ងៃទី ២៨ ខែ មិថុនា ឆ្នាំ ១៩៧១ ក្នុងទីក្រុង Pretoria។ លោក អីឡូន ម៉ាសក៍ (Elon Musk) គឺជាកូនប្រុសច្បងក្នុងចំណោម បងប្អូនចំនួន ៣នាក់ ដោយឪពុករបស់លោកគឺជាជនជាតិអាហ្រ្វិក ដែលមានដើមកំណើតពីចក្រភពអង់គ្លេស និងមានការងារជាអ្នកវិស្វករ ចំណែកម្តាយវិញ គឺជាជនជាតិកាណាដា និងមានការងារជាអ្នកជំនាញផ្នែកចំណីអាហារ។

លោកបានធំឡើងជាមួយនឹងប្អូនប្រុសឈ្មោះ Kimbal និងប្អូនស្រី Tosca នៅឯអាហ្រ្វិកខាងត្បូង ហើយនៅពេលមានអាយុ ១០ឆ្នាំ លោកក៏បានចាប់ផ្តើមមានចំណាប់អារម្មណ៍យ៉ាងខ្លាំងលើផ្នែកសរសេរកម្មវិធី ហើយបានចំណាយពេលជាច្រើនដើម្បីរៀនសូត្រដោយខ្លួនឯង ហើយនៅអាយុ ១២ឆ្នាំ លោកក៏បង្កើតបានកម្មវិធីហ្គេមមួយ ដែលមានឈ្មោះថា Blastar និងអាចរកលុយបានប្រមាណ ៥០០ដុល្លារអាមេរិក។

ក្រោយមកនៅឆ្នាំ ១៩៨៩ ក្នុងវ័យ១៧ឆ្នាំ លោកក៏បានសម្រេចចិត្តចាកចេញពីគ្រួសារ ដើម្បីធ្វើដំណើរទៅកាន់ប្រទេសកាណាដា ដើម្បីបន្តការសិក្សាក្នុងសាកលវិទ្យាល័យ Queen បើទោះបីជាគ្រួសារមិនគាំទ្រក៏ដោយ ហើយក៏ដើម្បីគេចចេញពីកាតព្វកិច្ចយោធាក្នុងប្រទេសអាហ្វ្រិកខាងត្បូងផងដែរ។ នៅទីនោះ លោក អីឡូន ម៉ាសក៍ (Elon Musk) ត្រូវរស់នៅដោយលំបាក ព្រោះការងារដំបូង គឺទទួលបានប្រាក់ខែតិចតួចប៉ុណ្ណោះ ដែលមិនអាចឆ្លើយតបនឹងការចំណាយបាន។

នៅឆ្នាំ១៩៩២ លោកក៏បានចាកចេញទៅរៀនផ្នែកអាជីវកម្ម និងរូបវិទ្យា ក្នុងសាកលវិទ្យាល័យ Pennsylvania ដោយទទួលបានអាហារូបករណ៍ ដែលជាក្តីប្រាថ្នារបស់ខ្លួន។ លោកបានចំណាយពេលសិក្សារយៈពេលមួយឆ្នាំបន្ថែមទៀត ដោយសិក្សាលើផ្នែកសេដ្ឋកិច្ច ដូច្នេះលោក បានបញ្ចប់ការសិក្សាជាមួយនឹង សញ្ញាបត្រពីរ គឺ រូបវិទ្យា និង សេដ្ឋកិច្ច។

ក្រោយពីបញ្ចប់ការសិក្សា លោក អីឡូន ម៉ាសក៍ (Elon Musk) បានសម្រេចចិត្តបើកក្រុមហ៊ុនតូចមួយឈ្មោះ Zip2 ដែលជាក្រុមហ៊ុនដំបូងរបស់លោក នៅឆ្នាំ១៩៩៥ ដោយផ្ដោតសំខាន់លើផ្នែកព័ត៌មានវិទ្យា។ ជាក្រុមហ៊ុនមគ្គុទេសក៍ទីក្រុង លើបណ្តាញអ៊ិនធើណេត Zip2 បានទទួលការចាប់អារម្មណ៍ច្រើនពីអតិថិជន ក្នុងនោះក៏មានបណ្តេញសារព័ត៌មានដ៏ល្បីដូចជា New York Times និង Chicago Tribune ក៏មកទទួលសេវាក្រុមហ៊ុននេះផងដែរ។ ក្រោយមកនៅឆ្នាំ១៩៩៩ ក្រុមហ៊ុន AltaVista ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនកុំព្យូទ័រ Compaq Computer Corporation បានសម្រេចទិញក្រុមហ៊ុន Zip2 នៅឆ្នាំ១៩៩៩ ក្នុងតម្លៃ ៣០៧លានដុល្លារជាប្រាក់សុទ្ធ និង ៣៤លានដុល្លារអាមេរិកជាមូលធនប័ត្រ។

ក្រោយពីទទួលបានលុយយ៉ាងច្រើនពីក្រុមហ៊ុនដំបូងនៅឆ្នាំ ១៩៩៩ លោក អីឡូន ម៉ាសក៍ (Elon Musk) ក៏បានបើកក្រុមហ៊ុនមួយទៀត មានឈ្មោះថា X.com ដែលជាប្រភេទក្រុមហ៊ុនទូទាត់ការចំណាយទំនិញតាមប្រព័ន្ធអ៊ីនធឺណិត ហើយក្រោយមកក៏ប្តូរឈ្មោះមកជា PayPal ដោយមើលឃើញទីផ្សារ កាន់តែមានភាពទូលំទូលាយ ដោយបញ្ចូលជាមួយក្រុមហ៊ុនដែលជាគូមួយចំនួនទៀត។ បច្ចុប្បន្នក្រុមហ៊ុន PayPal ត្រូវបានគេស្គាល់យ៉ាងទូលំទូលាយ ហើយក៏ទទួលបានការគាំទ្រយ៉ាងច្រើនពីអតិថិជនផងដែរ។

នៅខែតុលា ឆ្នាំ២០០២ ក្រុមហ៊ុន eBay ក៏បានសម្រេចចិត្តទិញយកក្រុមហ៊ុន PayPal ក្នុងតម្លៃ ១,៥ ពាន់លានដុល្លារអាមេរិកដោយនៅពេលនោះ លោក អីឡូន ម៉ាសក៍ (Elon Musk) មានភាគហ៊ុនក្នុងក្រុមហ៊ុន PayPal ចំនួន១១ភាគរយ ដែលធ្វើឲ្យលោកមានលទ្ធភាពគ្រប់គ្រាន់ ក្នុងការបើកក្រុមហ៊ុនទី៣ គឺក្រុមហ៊ុន ស្រាវជ្រាវផ្នែកអវកាស ឬ SpaceX នៅក្នុងឆ្នាំ២០០២ ដោយភ្ជាប់មកជាមួយនូវគោលបំណង ក្នុងការសាងសង់យានអវកាស ទៅកាន់ទីអវកាសផងដែរ។

នៅក្នុងឆ្នាំ២០០៨ បានក្លាយជាក្រុមហ៊ុនដ៏មានស្ថេរភាពមួយ ហើយអង្គការណាសា របស់អាមេរិក ក៏បានចុះកិច្ចសន្យា ជាមួយក្រុមហ៊ុនមួយនេះ ក្នុងការធ្វើការដឹកជញ្ជូនទំនិញពីផែនដី ទៅកាន់ស្ថានីយ៍អវកាសអន្តរជាតិផងដែរ រួមជាមួយនឹងផែនការ សម្រាប់ការដឹកជញ្ជូនអវកាសយានិក នាពេលអនាគត ដើម្បីជំនួសបេសកកម្មយានអវកាស របស់អង្គការណាសា។

បន្ទាប់មកទៀតលោក អីឡូន ម៉ាសក៍ (Elon Musk) ក៏បានបើកក្រុមហ៊ុនមួយទៀត ឈ្មោះ Tesla Motors នៅឆ្នាំ ២០០៣ ដែលជាក្រុមហ៊ុនជំនាញផ្នែកផលិត និងរចនារថយន្តអគ្គិសនីដែលមានតម្លៃសមរម្យ។ រយៈពេល៥ឆ្នាំ ក្រោយក្រុមហ៊ុនត្រូវបានបង្កើត រថយន្តរបស់ក្រុមហ៊ុនមួយនេះ ក៏បានបង្ហាញខ្លួនលើទីផ្សារ ដែលជាប្រភេទរថយន្តស្ពត មានសមត្ថភាពអាចបង្កើនល្បឿន ពីសូន្យ ដល់៩៦គីឡូម៉ែត្រក្នុងមួយម៉ោង ត្រឹមរយៈពេលត្រឹមតែ ៣,៧វិនាទី និងអាចធ្វើដំណើរបានចម្ងាយជាង៤០០គីឡូម៉ែត្រ ពេលសាកថ្មប្រភេទ Lithum ion ពេញ ម្តងៗ។

ដោយមានភាគហ៊ុនក្នុងក្រុមហ៊ុនរបស់ Daimler ព្រមទាំងមានភាពជាដៃគូយុទ្ធសាស្រ្តជាមួយក្រុមហ៊ុន តូយ៉ូតា ផងនោះ ក្រុមហ៊ុន Tesla Motors ក៏បានបើកដំណើរការលក់ជាសាធារណៈលើកដំបូងរបស់ខ្លួននៅក្នុងខែមិថុនា ឆ្នាំ២០១០ ដោយរកប្រាក់ចំណូលបាន ២២៦លានដុល្លារ។

គួររំឮកថា នៅក្នុងឆ្នាំ២០០៣ ដដែលនោះ លោក អីឡូន ម៉ាសក៍ ក៏បានបើកក្រុមហ៊ុនមួយបន្ថែមទៀតឈ្មោះ SolarCity ដែលមានជំនាញផ្នែកបម្លែងថាមពលព្រះអាទិត្យ ដើម្បីប្រើប្រាស់ប្រចាំថ្ងៃរបស់មនុស្ស។ ហើយនៅឆ្នាំ២០១៦ លោកក៏បានបន្តកិច្ចខិតខំប្រឹងប្រែងដើម្បីលើកកម្ពស់ និងជំរុញថាមពលព្រះអាទិត្យ និងការផលិតផលប្រកបដោយនិរន្តរភាពសម្រាប់អតិថិជន ដោយចំណាយប្រាក់ប្រមាន ២,៦ពាន់លានដុល្លារ ដើម្បីពង្រីកការរួមបញ្ជូលគ្នា រវាងក្រុមហ៊ុនរថយន្តអគ្គិសនី និងក្រុមហ៊ុនថាមពលព្រះអាទិត្យរបស់គាត់ទាំងពីរ។

គួរបញ្ជាក់ថាលោក Elon Musk បានចូលសញ្ជាតិអាមេរិក នៅឆ្នាំ២០០២ ហើយទាំងអស់នេះ គឺជាភាពជោគជ័យដ៏ធំធេងរបស់លោក ដែលបានតស៊ូយ៉ាងខ្លាំងនៅក្នុងជីវិត ហើយក្លាយជាមហាសេដ្ឋីបច្ចេកវិទ្យាដ៏ល្បីល្បាញ របស់អាមេរិករហូតមកដល់ពេលបច្ចុប្បន្ន៕

• ទីកន្លែង