(ភ្នំពេញ)៖ លោកបណ្ឌិត អ៉ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃទី២០ ខែមីនា ឆ្នាំ២០១៧នេះ បានព្រមានថា ដើម្បីកាត់បន្ថយហានិភ័យគ្រោះថ្នាក់ផ្សេងៗ រាជរដ្ឋាភិបាលកម្ពុជា នឹងចាត់វិធានការពង្រឹងការទប់ស្កាត់ លើពួកមេខ្យល់ដែលធ្វើសកម្មភាពនាំពលករខ្មែរ ឆ្លងដែនទៅធ្វើការនៅប្រទេសថៃ ដោយខុសច្បាប់។
ក្រោយបញ្ចប់ជំនួបពិភាក្សាការងារជាមួយ លោក Koichiro KAKEE ឧបការីរបស់រដ្ឋមន្រ្តីទទួលបន្ទុកកិច្ចការអន្តរជាតិ នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ ប្រទេសជប៉ុន នៅទីស្ដីការក្រសួងការងារ រួចមកលោករដ្ឋមន្រ្តី អ៊ិត សំហេង បានឲ្យដឹងថា កាលពីពេលកន្លងទៅ ប្រទេសបានប្រកាសដំឡើងប្រាក់ឈ្នួលដល់ពលករខ្មែរ និងពលករប្រទេសដទៃ តាមតំបន់ផ្សេងៗគ្នា ហេតុដូច្នេះហើយ ការសម្រុកចេញទៅធ្វើការនៅទីនោះ ក៏មាននឹងកើតមានច្រើនដែរ។
ប្រមុខក្រសួងការងារបានបញ្ជាក់ថា «ការបញ្ជូនពលករទៅធ្វើការនៅប្រទេសថៃ ក្រសួងនៅតែពង្រឹងប្រព័ន្ធគ្រប់គ្រងរបស់ខ្លួនដដែល ជាពិសេស ការទប់ស្កាត់ការជួញដូរមនុស្ស ជួញដូរកម្លាំងពលកម្ម តាមរយៈបណ្ដាញមេខ្យល់ និងពង្រឹងប្រព័ន្ធសហប្រតិបត្តិការជាមួយអាជ្ញាធរមានសមត្ថកិច្ច ដើម្បីបង្រ្កាបពួកមេខ្យល់ ដែលនាំពលករចេញទៅដោយខុសច្បាប់ តាមរូបភាពផ្សេងៗ ដើម្បីកាត់បន្ថយភាពហានិភ័យជូនពលករខ្មែរ»។
លោកបានបន្ត រាជរដ្ឋាភិបាលកម្ពុជា ក៏ដូចជាក្រសួងការងារ បានបន្តជំរុញប្រព័ន្ធផ្ដល់ភាពស្របច្បាប់ និងផ្ដល់ការការពារជូនពលករខ្មែរ ជាបន្តបន្ទាប់ហើយដែរ។ បច្ចុប្បន្ននេះ ភាគីកម្ពុជាបាននិងកំពុងបង្កើនកិច្ចសហប្រតិបត្តិការ ជាមួយភាគីថៃ ធ្វើយ៉ាងណាឲ្យពលករខ្មែរនៅទីនោះ ទទួលបានភាពស្របច្បាប់ត្រឹមត្រូវ ក៏ដូចជាការចែកបណ្ណពណ៌ស៊ីជម្ពូ (Pink Card) ជាដើម។
ជាមួយគ្នានោះ រាជរដ្ឋាភិបាល ក៏បានបង្កើនការធ្វើលិខិតឆ្លងដែនជូនដល់ពលករខ្មែរ ដែលចង់ទៅធ្វើការនៅបរទេស និងធ្វើអត្តសញ្ញាណបណ្ណសញ្ជាតិខ្មែរថ្មី ជូនពួកគាត់ផងដែរ។
ទោះយ៉ាងណា លោករដ្ឋមន្រ្តីបានអំពាវនាវដល់ប្រជាពលរដ្ឋ ក៏ដូចជាពលករខ្មែរទាំងអស់ ដាច់ខាតកុំចេញទៅធ្វើការនៅក្រៅប្រទេស ដោយខុសច្បាប់ឲ្យសោះ ព្រោះអាចប្រឈមនឹងគ្រោះថ្នាក់ និងរងគ្រោះផ្សេងៗ ដូចជា ត្រូវសមត្ថកិច្ចប្រទេសគេឃាត់ខ្លួន ចាប់ដាក់ពន្ធនាគារ ក៏មាន។
លោក អ៉ិត សំហេង បានពន្យល់ថា ការដំឡើងប្រាក់ឈ្នួលរបស់ប្រទេសថៃ កន្លងមកនោះ មិនមែនជាការទាក់ទាញពលករក្រៅស្រុក ឲ្យចូលទៅធ្វើការច្រើននោះទេ តែជាលក្ខខណ្ឌដំឡើងប្រាក់ឈ្នួល ទៅតាមកំណើនសេដ្ឋកិច្ច និងកម្រិតវឌ្ឍនភាព ដើម្បីដោះស្រាយបញ្ហាជូនកម្មករនិយោជិតរបស់ប្រទេសគេ ទន្ទឹមនឹងនោះ ពលករខ្មែរ និងពលករប្រទេសដទៃនៅប្រទេសថៃ ក៏ទទួលបានដូចគ្នាដែរ៕
ប្រភព៖ Fresh News
ដោយឡែក ព័ត៌មានចាប់អារម្មណ៍មួយផ្សេងទៀត៖
គ្រាន់តែសួរ «ហេតុអ្វីបានជាលោកដើរមកបុកខ្ញុំយ៉ាងនេះ» ស្រាប់តែវ៉ៃគ្មានប្រណី
ខេត្តព្រះសីហនុ ៖ កាលពីម៉ោងប្រមាណ១០កន្លះយប់ ថ្ងៃទី១៨ ខែមីនា ឆ្នាំ២០១៧ មានករណីប្រើអំពើហិង្សាមួយកើតឡើង ក្នុងក្លិបខារ៉ាអូខេ ស៊ីធីហ្គោល ដែលមានទីតាំងស្ថិតនៅក្រុម១៣ ភូមិ១ សង្កាត់លេខ៤ ។
ជនរងគ្រោះមានឈ្មោះ ហេង រិទ្ធី ជាមេធាវីខេត្តព្រះសីហនុ មានអាយុ៣៦ឆ្នាំ ទីលំនៅបច្ចុប្បន្នភូមិ១ សង្កាត់២ ក្រុង ខេត្តព្រះសីហនុ។ លោកមេធាវីបានឱ្យដឹងថា ករណីប្រើអំពើហិង្សាបង្កឱ្យរបួសស្នាមបង្កឡើងដោយជនសង្ស័យមិនស្គាល់អត្តសញ្ញាណមកលើរូបគាត់ក្នុងក្លិបខារ៉ាអូខេ ខណៈពេលដែលរូបគាត់មានមិត្តភក្តិហៅទៅចូលរួមក្នុងកម្មវិធីនៅក្នុងក្លឹបខាងលើ។ ក្រោយពេលកើតហេតុលោកបានដាក់ពាក្យបណ្តឹងនៅនគរបាលប៉ុស្តិ៍រដ្ឋបាលសង្កាត់លេខ៤ ខេត្តព្រះសីហនុ ដើម្បីឱ្យសមត្ថកិច្ចស្រាវជ្រាវរកជនសង្ស័យម្នាក់នោះមកដោះស្រាយតាមនីតិវិធីច្បាប់ ។
លោកមេធាវីបានបញ្ជាក់ថា មុនពេលកើតហេតុ រូបលោកបានឡើងជណ្តើរទៅជាន់ខាងលើ រួចក៏បានប៉ះស្មាគ្នាជាមួយជនសង្ស័យដែលបានដើរចុះមកខាងក្រោមវិញ រួបគាត់ក៏បានសួរថា «ហេតុអ្វីបានជាលោកដើរមកបុកខ្ញុំយ៉ាងនេះ» ពេលនោះជនសង្ស័យមិនឆ្លើយតបទេ ហើយក៏ដាល់រូបលោកមួយដៃលើចិញ្ចើមភ្នែកខាងឆ្វេងឡើងហើមជាំ និងទាត់ធាក់បន្ថែមទៀត រួចក៏នាំបក្សពួកឡើងរថយន្ត VIGO ពណ៌ស ពាក់ស្លាកលេខ ខ.ម -2-2525 គេចខ្លួនបាត់ស្រមោល ដោយមិនមានការឃាត់ខ្លួនពីសំណាក់សមត្ថកិច្ច និងសន្តិសុខឯកជនដែលយាមប្រចាំការនៅក្លិបកម្សាន្តខារ៉ាអូខេខាងលើនោះឡើយ។
ក្រោយពេលកើតហេតុលោកមេធាវី ហេង រិទ្ធី បានទៅដាក់ពាក្យបណ្តឹងនៅនគរបាលប៉ុសរដ្ឋបាលសង្កាត់ ៤នៅវេលាម៉ោងប្រមាណជិត១០កន្លះយប់ ថ្ងៃ១៨ មីនា ដោយភ្ជាប់ជាមួយរូបភាពនៅក្នុងកាមេរ៉ាសុវត្ថិភាព ខណៈជនសង្ស័យ រួមនឹងបក្សពួកចូលច្រៀងនៅក្នុងបន្ទប់ខារ៉ាអូខេមុនពេលកើតហេតុ ។
រហូតមកដល់ពេលនេះ សមត្ថកិច្ចនគរបាលប៉ុស្តិ៍រដ្ឋបាលសង្កាត់លេខ៤ កំពុងធ្វើរការស្រាវជ្រាវរកជនសង្ស័យ និងបក្សពួក ដើម្បីយកមកដោះស្រាយទៅតាមតាមនីតិវិធីច្បាប់ មិនឱ្យជនបង្ករករួចផុតពីសំណាញ់ច្បាប់ឡើយ។
បើតាមរយៈភ្ញៀវដែលបានចូលទៅក្លិបកំសាន្តខាងលើ និងបានឃើញហេតុការណ៍បានសម្តែងការខកចិត្តយ៉ាងខ្លាំង ខណៈដែលសមត្ថកិច្ច និងសន្តិសុខឯកជន មិនបានឃាត់ខ្លួនជនបង្កររបួសស្នាមមកលើ ជនរងគ្រោះចូលមកកំសាន្តនៅក្នុងក្លិបខាងលើ ហើយពួកគាត់បានដាក់ការព្រួយបារម្ភថា ថ្ងៃណាមួយ មានករណីរហូតដល់ស្លាប់បាត់បង់ជីវិត ក៏មិនមានសមត្ថកិច្ច ឬថៅកែក្លិបខាងលើចេញមុខក្នុងការជួយអន្តរាគមន៍ និងមានចំណាត់ការទៅតាមផ្លូវច្បាប់ជូនដល់ជនរងគ្រោះឡើយ ដូចនេះគ្រប់អតិថិជនគួរមានការស្វែងយល់ដោយខ្លួនឯងថា តើគួរចូលទៅកំសាន្តនៅក្លិបខាងលើនោះឬយ៉ាងណា ?
ពាក់ព័ន្ធក្នុងហេតុការណ៍ខាងលើ ភ្នាក់ងារយកព័ត៌មានយើងមិនអាចរកការបកស្រាយពីម្ចាស់ក្លិបខាងលើនេះបានទេ ព្រោះមិនមានលេខទូរស័ព្ទ ដើម្បីទំនាក់ទំនង ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]