(ភ្នំពេញ)៖ ក្រសួងទេសចរណ៍នៅថ្ងៃទី១៥ ខែមីនា ឆ្នាំ២០១៧នេះ បានបញ្ជាក់លើបណ្ដាញសង្គម Facebook សារជាថ្មី អំពីការខិតជិតមកដល់ នៃបាតុភូតអច្ឆរិយៈ ព្រះអាទិត្យរះចំកំពូលប្រាង្គកណ្ដាល នៃប្រាសាទអង្គរវត្ត (Equinox) និងបានអំពាវនាវដល់ភ្ញៀវទេសចរ ចូលរួមប្រកួតថតរូប Selfie ទាំងអស់គ្នា ដើម្បីបង្ហាញទៅមនុស្សលើពិភភលោក ឲ្យឃើញពីអច្ឆរិយភាពដ៏អស្ចារ្យនេះ។
បាតុភូតដ៏មហស្ចារ្យគ្មានពីរនេះ នឹងកើតឡើងសារជាថ្មីនៅចន្លោះថ្ងៃទី២០-២១ ខែមីនា ឆ្នាំ២០១៧ខាងមុខខ្ទង់ម៉ោង៥ព្រឹក លើទឹកដីអង្គរសៀមរាប។
បើតាមក្រសួងទេសចរណ៍ នីតិវិធីនៃការប្រកួតថតរូបនេះ រួមមាន៖ ១.ថតរូប Selfie ជាមួយព្រឹត្តិការណ៍ ព្រះអាទិត្យរះចំកំពូលប្រាសាទអង្គរវត្ត។ ២.ផ្ញើរូប Selfie នោះ ទៅមកកាន់ Facebook Page របស់ក្រសួងទេសចរណ៍ (www.facebook.com/cambodiamot) ដោយភ្ជាប់ជាមួយឈ្មោះ និងលេខទូរស័ព្ទ។ ៣.ក្រុមការងារនឹងធ្វើការជ្រើសរើសរូប ដែលស្អាតបំផុតចំនួន៥ បង្ហោះលើ Facebook Page ក្រសួងទេសចរណ៍ ដើម្បីទាក់ទាញចំនួន Like។ ៤.បេក្ខជន៣រូប ដែលទទួលបានការ Like ច្រើនជាងគេ គឺជាម្ចាស់ជ័យលាភី។
សូមរំឭកថា ព្រឹត្តិការណ៍ព្រះអាទិត្យរះចំកណ្ដាលកំពូលប្រាសាទអង្គរវត្ត (Equinox) នេះ ត្រូវបានកើតមានឡើងចំនួន២ដងក្នុងមួយឆ្នាំ ដែលលើកទី១ កើតឡើងនៅអំឡុងខែមីនា និងលើកទី២ កើតឡើងនៅអំឡុងខែកញ្ញា។ បាតុភូតដ៏មហស្ចារ្យមានតែមួយនៅកម្ពុជានេះ ស្ដែងឱ្យឃើញពីអច្ឆរិយភាពនៃប្រាសាទអង្គរ ដែលបុព្វបុរសខ្មែរបានសាងសង់ឡើង ប្រកបដោយការគិតគូរយ៉ាងច្បាស់លាស់ ព្រោះបានផ្សាភ្ជាប់ជាមួយបាតុភូតធម្មជាតិ ដែលគួរឱ្យស្ញប់ស្ញែងបំផុត។
ដោយឡែកកាលពីព្រឹត្តិការណ៍ Equinox នៅថ្ងៃទី២៩ ខែកញ្ញា ឆ្នាំ២០១៦ កន្លងទៅ ក្រសួងទេសចរណ៍ បានរកឃើញយុវជន-យុវតី ចំនួន៣នាក់ ដែលជាម្ចាស់ជ័យលាភី ក្នុងការប្រកួតថតរូប Selfie នេះ រួមមាន៖ លេខ១.លោក ហ៊ូ សុខរ័ត្ននា ទទួលបាន ១៤,៣៨០ Like, លេខ២.កញ្ញា ផា ច័ន្ទវិច្ឆិកា ទទួលបាន ១៤,១៤៨ Like និងលេខ៣.កញ្ញា លុច ពេជ្រលីតា ទទួលបាន ៩,៧១៥ Like៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ អាជីវករខ្មែរនាំត្រីចូលផ្សារ៉ុងក្លឿប្រទេសថៃ បានចោទសមត្ថកិច្ចថៃច្រកក្លងឡឹកមិនគោរពតាមការសន្យា
ខេត្តបន្ទាយមានជ័យ ៖ អាជីវករខ្មែរនាំត្រីចូលផ្សារ៉ុងក្លឿ ប្រទេសថៃ បានចោទសមត្ថកិច្ចថៃច្រកក្លងឡឹក មិនគោរពតាមការសន្យាថា យក១រទេះតម្លៃ១.៥០០បាត រយៈពេល២ថ្ងៃ តែថៃយកតម្លៃ១គីឡូក្រាម តម្លៃ១២បាតវិញ។ អាជីវករខ្មែរនាំត្រីចូលផ្សារ៉ុងក្លឿប្រទេសថៃ បានប្រាប់ថា អាជ្ញាធរមានសមត្ថកិច្ចថៃ នៅច្រកក្លងឡឹកប្រទេសថៃឈម និងច្រកអន្តរជាតិប៉ោយប៉ែតកម្ពុជា មិនគោរពតាមការសន្យានៅពេលដែលអាជីវករ ធ្វើការតវ៉ាហើយហៅ មកដោះស្រាយនៅខាងភាគីថៃ។
អាជីវកររូបនោះ បានបញ្ជាក់ថា កាលពីមុនអាជីវករខ្មែរ នាំត្រីចូលទៅលក់នៅផ្សារ៉ុងក្លឿប្រទេសថៃ គឺភាគីថៃយក១រទេះតម្លៃ ៣០០ទៅ៥០០បាត តែនៅដើមខែមីនា ឆ្នាំ២០១៧នេះ មន្ត្រីគយថៃបានកំណត់ ១រទេះបង់១៥០០បាត ក្រោយពេលមានការតវ៉ាបិទផ្លូវលើស្ពានមិត្តភាពកម្ពុជា.ថៃ ភាគីថៃចុះតម្លៃ ១រទេះ៨០០បាត អាជីវករក៏មិនយល់ព្រមព្រោះថៃយកតម្លៃថ្លៃ ហើយធ្វើការតវ៉ា ២ថ្ងៃជាប់គ្នាភាគីថៃក៏សម្រេចយកដឹក១រទេះតម្លៃ៨០០បាត។
អាជីវកររូបនោះ បានបញ្ជាក់ថា តែរយៈពេល២ថ្ងៃនេះសមត្ថកិច្ចថៃ បានកំណត់យកត្រី១គីឡូក្រាមតម្លៃ១២បាត ទៅវិញដែលធ្វើឲ្យអាជីវករខ្មែរ នាំត្រីចូលទៅថៃគិតថា តម្លៃថ្លៃពេកព្រោះភាគីថៃ និយាយមិនគោរពការសន្យា ហើយត្រីដែលកម្ពុជានាំចូលទៅថៃក្នុង១ថ្ងៃមិនតិចជាង២០តោននោះទេ។
បើនិយាយពីត្រីថៃនាំចូល មកកម្ពុជាមានដូច ត្រីប្រា ផ្លានីន ត្រីក្រហម ត្រីផ្លាធូ ដែលឈ្មួញនាំចូល១ថ្ងៃរាប់តោន ដូចគ្នាគឺបង់ឲ្យកម្ពុជា១រទេះត្រឹមតែ៥០ទៅ១០០បាត ឲ្យចូលសេរី។ បែបនេះគួរតែអាជ្ញាធរកម្ពុជា មានវិធានការរឹតបន្តឹង តម្លៃដូចគ្នាដើម្បីរកចំណូលពន្ធជូនរដ្ឋ និងអនុវត្តស្មើភាពគ្នា ព្រោះប្រទេសកម្ពុជា.ថៃ ជាសមាជិកអាស៊ានសេដ្ឋកិច្ចដូចគ្នា។
គួរំលឹកថា នៅពេលអាជីវករនាំត្រីចូល ទៅថៃធ្វើការតវ៉ាបិទផ្លូវលើស្ពានមិត្តភាពកម្ពុជា.ថៃ គឺអាជ្ញាធរកម្ពុជា.ថៃ បានជួបប្រជុំដោះស្រាយភាគីថៃកំណត់ថា អាជីវករនាំត្រីចេញទៅលក់នៅថៃក្នុង១រទេះ យកតម្លៃ៨០០បាត តែក្រោយមកភាគីថៃឡើងតម្លៃ១គីឡូក្រាមតម្លៃ១២បាតទៅវិញ ដោយមិនគោរពការសន្យាឡើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]