រាជធានីភ្នំពេញ ៖ នារីជាកម្មការិនីរោងចក្រម្នាក់ ខណៈកំពុងជិះកង់ទៅរៀនអ៊ុតសក់ ក៏ត្រូវជនសង្ស័យថ្មើរជើងរត់មកឆក់កាបូប ហើយជះទឹកអាស៊ីតថែមទៀត បណ្តាលឱ្យនាងរងរបួសផ្ទៃមុខ កើតឡើងកាលពីវេលាម៉ោង០៨ និង១០នាទីយប់ថ្ងៃទី១៤ មីនា ស្ថិតនៅចំណុចខាងត្បូងវិហារចាម ម្តុំលក់ទឹកត្នោតជូរ ផ្លូវបេតុង ភូមិត្រពាំងពោធិ សង្កាត់ចោមចៅ ខណ្ឌពោធិ៍សែនជ័យ។
ប្រភពឱ្យដឹងថា នារីរងគ្រោះឈ្មោះស៊ន ចាន់ទី អាយុ២៣ឆ្នាំ ជាកម្មការិនីរោងចក្រ ស្នាក់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ ។ បើតាមការបំភ្លឺពីបុរសឈ្មោះផន ភឿក អាយុ២៧ឆ្នាំ ធ្វើការនៅកន្លែងហ្គេម ស្នាក់នៅបន្ទប់ជួលម្តុំផ្សារដេប៉ូ ខណ្ឌទួលគោក និងត្រូវជាសង្សារនារីរងគ្រោះឱ្យដឹងថា នាងបាត់សម្ភារមានលុយដុល្លារជាង៤០០ដុល្លារ, ខ្សែ.កអ៊ីតាលី មានតម្លៃជាង៦០០ដុល្លារ ។
ប្រភពដដែលបន្តថា មុនពេលកើតហេតុ នាងចេញពីធ្វើការដូចសព្វដង រួចជិះកង់ទៅរៀនអ៊ុតសក់ ។ លុះមកដល់ចំណុចកើតហេតុម្តុំទឹកត្នោតជូរ «វិហារចាម» ក៏មានជនសង្ស័យម្នាក់ រត់មកឆក់កាបូបស្ពាយរបស់នាង រួចបានជះទឹកអាស៊ីតទៅលើមុខបណ្តាលឱ្យរងរបួស ។ ភ្លាមៗក៏មានប្រជាពលរដ្ឋរត់មកជួយ ហើយទូរស័ព្ទហៅសង្សារមកជួយផងដែរ ។
បន្ទាប់មក នារីរងគ្រោះគេឃើញឡើងរថយន្តជាមួយបុរសជាសង្សារ ដើម្បីទៅព្យាបាលនៅមន្ទីរពេទ្យព្រះកុសមៈ ។ បច្ចុប្បន្ន នារីរងគ្រោះកំពុងសំរាកព្យាបាល ដោយសមត្ថកិច្ចបានទៅសាកសួរ និងបំភ្លឺពីបុរសសង្សារដើម្បីធ្វើកំណត់ហេតុ ។
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
ខេត្តបន្ទាយមានជ័យ ៖ អាជីវករខ្មែរនាំត្រីចូលផ្សារ៉ុងក្លឿ ប្រទេសថៃ បានចោទសមត្ថកិច្ចថៃច្រកក្លងឡឹក មិនគោរពតាមការសន្យាថា យក១រទេះតម្លៃ១.៥០០បាត រយៈពេល២ថ្ងៃ តែថៃយកតម្លៃ១គីឡូក្រាម តម្លៃ១២បាតវិញ។ អាជីវករខ្មែរនាំត្រីចូលផ្សារ៉ុងក្លឿប្រទេសថៃ បានប្រាប់ថា អាជ្ញាធរមានសមត្ថកិច្ចថៃ នៅច្រកក្លងឡឹកប្រទេសថៃឈម និងច្រកអន្តរជាតិប៉ោយប៉ែតកម្ពុជា មិនគោរពតាមការសន្យានៅពេលដែលអាជីវករ ធ្វើការតវ៉ាហើយហៅ មកដោះស្រាយនៅខាងភាគីថៃ។
អាជីវកររូបនោះ បានបញ្ជាក់ថា កាលពីមុនអាជីវករខ្មែរ នាំត្រីចូលទៅលក់នៅផ្សារ៉ុងក្លឿប្រទេសថៃ គឺភាគីថៃយក១រទេះតម្លៃ ៣០០ទៅ៥០០បាត តែនៅដើមខែមីនា ឆ្នាំ២០១៧នេះ មន្ត្រីគយថៃបានកំណត់ ១រទេះបង់១៥០០បាត ក្រោយពេលមានការតវ៉ាបិទផ្លូវលើស្ពានមិត្តភាពកម្ពុជា.ថៃ ភាគីថៃចុះតម្លៃ ១រទេះ៨០០បាត អាជីវករក៏មិនយល់ព្រមព្រោះថៃយកតម្លៃថ្លៃ ហើយធ្វើការតវ៉ា ២ថ្ងៃជាប់គ្នាភាគីថៃក៏សម្រេចយកដឹក១រទេះតម្លៃ៨០០បាត។
អាជីវកររូបនោះ បានបញ្ជាក់ថា តែរយៈពេល២ថ្ងៃនេះសមត្ថកិច្ចថៃ បានកំណត់យកត្រី១គីឡូក្រាមតម្លៃ១២បាត ទៅវិញដែលធ្វើឲ្យអាជីវករខ្មែរ នាំត្រីចូលទៅថៃគិតថា តម្លៃថ្លៃពេកព្រោះភាគីថៃ និយាយមិនគោរពការសន្យា ហើយត្រីដែលកម្ពុជានាំចូលទៅថៃក្នុង១ថ្ងៃមិនតិចជាង២០តោននោះទេ។
បើនិយាយពីត្រីថៃនាំចូល មកកម្ពុជាមានដូច ត្រីប្រា ផ្លានីន ត្រីក្រហម ត្រីផ្លាធូ ដែលឈ្មួញនាំចូល១ថ្ងៃរាប់តោន ដូចគ្នាគឺបង់ឲ្យកម្ពុជា១រទេះត្រឹមតែ៥០ទៅ១០០បាត ឲ្យចូលសេរី។ បែបនេះគួរតែអាជ្ញាធរកម្ពុជា មានវិធានការរឹតបន្តឹង តម្លៃដូចគ្នាដើម្បីរកចំណូលពន្ធជូនរដ្ឋ និងអនុវត្តស្មើភាពគ្នា ព្រោះប្រទេសកម្ពុជា.ថៃ ជាសមាជិកអាស៊ានសេដ្ឋកិច្ចដូចគ្នា។
គួរំលឹកថា នៅពេលអាជីវករនាំត្រីចូល ទៅថៃធ្វើការតវ៉ាបិទផ្លូវលើស្ពានមិត្តភាពកម្ពុជា.ថៃ គឺអាជ្ញាធរកម្ពុជា.ថៃ បានជួបប្រជុំដោះស្រាយភាគីថៃកំណត់ថា អាជីវករនាំត្រីចេញទៅលក់នៅថៃក្នុង១រទេះ យកតម្លៃ៨០០បាត តែក្រោយមកភាគីថៃឡើងតម្លៃ១គីឡូក្រាមតម្លៃ១២បាតទៅវិញ ដោយមិនគោរពការសន្យាឡើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]