ឡូយ! ជម្រើសជាតិប្រមូលផ្ដុំហ្វឹកហាត់ថ្ងៃដំបូង មានទាំងត្រាំទឹកកកទៀត

(ភ្នំពេញ)៖ ក្រុមបាល់ទាត់ជម្រើសជាតិកម្ពុជា បានចាប់ផ្ដើមប្រមូលផ្ដុំហ្វឹកហាត់ហើយ នៅថ្ងៃទី១៣ ខែមិនាម្សិលមិញ ដើម្បីត្រៀមការប្រកួតមិត្តភាពអន្ដរជាតិ ជាមួយក្រុមជម្រើសជាតិឥណ្ឌា នៅថ្ងៃទី២២ ខែមិនាខាងមុខ បន្ទាប់ពីគ្រូបង្វឹកថ្មីលោក Leonardo Vitorino ធ្វើការប្រកាសបញ្ជីឈ្មោះកីឡាករក្រុមជម្រើសជាតិកម្ពុជា កាលពីពេលថ្មីៗកន្លងទៅ ។

ប៉ុន្ដែក្រោយបញ្ចប់ការហ្វឹកហាត់ថ្ងៃដំបូង អ្នកគាំទ្របានចាប់រម្មណ៍ខ្លាំង ចំពោះការហាត់របៀបសម្រួលសាច់ដុំជាមួយនឹងការត្រាំទឹកកករបស់លោក Leonardo Vitorino ដែលខុសប្លែកពីគ្រូបង្វឹកមុនៗ ។ មិនតែប៉ុណ្ណោះគ្រូបង្វឹកជនជាតិប្រេស៊ីលរូបនេះ ថែមទាំងមានឧបករណ៍ និងក្បួនខ្នាតហ្វឹកហាត់បង្កើនសមត្ថភាព និងបច្ចេកទេសទំនើបៗជាច្រើនទៀតផង ។ នេះបើតាមការលួចបង្ហើបឲ្យដឹងពីកីឡាករម្នាក់ ក្នុងក្រុមជម្រើសជាតិខាងលើ ។

បើតាមការបញ្ជាក់របស់លោក Leonardo Vitorino បានឲ្យដឹងថា ការប្រមូលផ្ដុំដំបូងនេះ គឺមានរយៈពេល ៣ថ្ងៃ ចាប់ពីថ្ងៃទី១៣-១៥ ខែមិនានេះ បន្ទាប់មកនឹងត្រូវរំសាយមួយរយៈពេលខ្លួន ដើម្បីឲ្យកីឡាករជួយក្លឹបរៀងៗខ្លួន ក្នុងការប្រកួតលីគកំពូលកម្ពុជា មុននឹងប្រមូលផ្តុំជាថ្មី នាដើមសប្ដាហ៍ក្រោយ រហូតដល់ថ្ងៃប្រកួតជាមួយក្រុមភ្ញៀវឥណ្ឌា នៅលើទីលានពហុកីឡដ្ឋានជាតិ នាថ្ងៃទី២២ ខែមិនាខាងមុខតែម្ដង ៕

ប្រភព៖ Fresh News

ដោយឡែករំលឹកព័ត៌មានមួយផ្សេងទៀត៖ នុះ! បោះពាក្យសម្តីពេក ទីបំផុត Floyd ទ្រាំលែងបាន សម្រេចចិត្តចូលវ៉ៃវិញ

អង់គ្លេស៖ ការបោះពាក្យសម្តីឌឺដងផ្លែផ្កាដាក់គ្នា រវាងអ្នកប្រដាល់ Floyd Maywheather និងអ្នកប្រយុទ្ធក្នុងទ្រុង UFC កីឡាករ Conor McGregor ពេលនេះអាចនិយាយបានថា ជិតនឹងបញ្ចប់ហើយ ដោយសារ Floyd ទ្រាំលែងបាន សម្រេចចិត្តឡើងសង្វៀនប្រកួតវិញ ក្រោយពីចូលនិវត្តិបាន២ឆ្នាំ។

យោងតាមបណ្តាញសារព័ត៌មានកីឡាជាច្រើនបានផ្សាយឲ្យដឹងថា Floyd បានយល់ព្រមឡើងប្រកួតជាមួយ McGregor ហើយថែមទាំងបញ្ជាឲ្យអ្នកប្រយុទ្ធក្នុងទ្រុងរូបនេះ ទៅចុះហត្ថលេខាលើកិច្ចសន្យាទៀតផង ដូច្នេះពួកគេអាចនឹងឆាប់ជួបគ្នាលើសង្វៀន ក្នុងអំឡុងរដូវក្តៅខែមិថុនាខាងមុខ។

ថ្លែងនៅក្នុងសាលប្រជុំនៃដំណើរទស្សនកិច្ចក្នុងទីក្រុង Liverpool ប្រទេសអង់គ្លេស អ្នកប្រដាល់មិនដែលចាញ់ Floyd បានឲ្យដឹងថា «McGregor នៅត្រឹមកម្រិតB នៅឡើយទេ បើសិនជាគេខ្លាំងមែន គេត្រូវផ្តល់នូវឧទាហរណ៍មួយ ដើម្បីបញ្ជាក់ពីសមត្ថភាពរបស់គេ» ។ ដែលនេះហាក់បីដូចជា Floyd កំពុងព្យាយាមបញ្ចុះបញ្ចូល McGregor ឲ្យយល់ព្រមប្រកួតឆាប់ៗនេះ។

លើសពីនេះទៀត Folyd បានបន្តទៀតថា «នៅពេលដែលខ្ញុំប្រកួតជាមួយជើងខ្លាំង Arturo Gatti កាលនោះខ្ញុំនៅកម្រិតBនៅឡើយទេ ចំនែកគេនៅក្នុងកម្រិតA ហើយខ្ញុំមិនបានរអ៊ូអ្វីទាំងអស់ ចុងក្រោយខ្ញុំជាអ្នកឈ្នះ។ ដោយឡែកអតីតកំពូលអ្នកប្រដាល់Oscar De La Hoya ក៏ដូចគ្នា គេនៅក្នុងកម្រិតA ខ្ញុំនៅត្រឹមកម្រិតB តែចុងក្រោយខ្ញុំជាអ្នកឈ្នះ ដោយមិនបានរអ៊ូរទាំមុនការប្រកួតអ្វីទាំងអស់» ។

Floyd បានបន្ថែមឲ្យដឹងទៀតថា «ពេលនេះខ្ញុំបានសម្រេចចិត្តលាចេញពីការនិវត្តន៍វិញហើយ ដើម្បីឡើងទៅប្រកួតជាមួយ Conor McGregor ដោយមិនចង់ឮពាក្យដោះសារ ឬលេសអ្វីផ្សេងទៀតនោះទេ ជាពិសេសរឿងប្រាក់តែម្តង» ។ វាពិតជាធុញទ្រាន់ណាស់នៅពេលដែលគេរអ៊ូចំពោះរឿងនេះ ហើយញុះញង់ខ្ញុំជាច្រើនលើកច្រើនសា ដូច្នេះមានតែឆាប់ចុះកិច្ចសន្យា ហើយឡើងប្រកួតតែម្តងទៅ នៅខែមិថុនាខាងមុខនេះ» ។

គួរបញ្ជាក់ទៀតថា ចុងក្រោយ Floyd ក៏បានបោះពាក្យធ្ងន់ៗថា McGregor គឺជាកីឡាករកម្រិតB ប៉ុណ្ណោះបើប្រៀបជាមួយខ្ញុំកម្រិតA៕