ខេត្តរតនគិរី ៖ យុវជន២នាក់ត្រូវមន្ត្រីអភិរក្សពន្ធនាគារឃាត់ខ្លួនខណៈជនទាំងពីរនាក់បានបង្កប់រណាអារដែកនៅក្នុងស្បែកជើងពេលចូលជួបអ្នកទោស ហើយប្តូរស្បែកជើងឱ្យអ្នកទោសដែលចេញមកសាកសួរសុខទុក្ខនៅខាងក្រៅរបងពន្ធនាគារ ។ ជនសង្ស័យទាំងពីរត្រូវមន្ត្រីពន្ធធនាគារចាប់បញ្ជូនកសាងសំណុំរឿងភ្លាមៗក្រោយពីគេបានសារភាពដោយត្រង់នៅថ្ងៃទី៤ មីនា ឆ្នាំ២០១៧ ។ ពួកគេមានឈ្មោះ សូម ណាក់ ភេទប្រុស អាយុ២១ឆ្នាំ និងម្នាក់ទៀតឈ្មោះ ដុំ ផុន អាយុ២១ឆ្នាំ ដូចគ្នាគេទាំងពីរជាជនជាតិទំពួន និងមានទីកំណើតនៅជាមួយគ្នាក្នុងភូមិកាចូន ឃុំកាចូន ស្រុកវ៉ើនសៃ ។
ក្រោយពីមន្ត្រីពន្ធនាគារឆែកឃើញលាក់ផ្លែរណាអារដែកនៅក្នុងទ្រនាប់ជើងផ្ទាត់ពណ៌សគេបានសារភាពថា បងស្រីរបស់គេឈ្មោះ ពន់ ត្រូវជាប្រពន្ធជនជាប់ចោទឈ្មោះ សូម លូន (ជាពិរុទ្ធជនជាប់ពាក់ព័ន្ធក្នុងបទល្មើសគ្រឿងញៀន) បានពឹងឱ្យគេយកផ្លែរណាអារដែកនោះឱ្យទៅឈ្មោះ សូម លូន ហើយមន្ត្រីពន្ធនាគារមានការសង្ស័យរួចចាប់ឃាត់ឆែករកឃើញតែម្តង នៅប៉ុស្ដិ៍ឆែកឆេរអីវ៉ាន់ ។
សូមបញ្ជាក់ថា ពន្ធនាគារភ្នំស្វាយនៅក្នុងខេត្តរតនគិរីនេះគឺធ្លាប់មានអ្នកជាប់ឃុំរត់គេចខ្លួនរួចប៉ុន្មាននាក់កន្លងមកហើយ ដោយសារតែចំរឹងបង្អួចត្រូវគេលួចកាត់ឱ្យមានប្រហោង ។ មកដល់ ពេលនេះអ្នកដែលបានគេចខ្លួនចេញពីពន្ធនាគារនោះនៅមិនទាន់ដឹងថា ត្រូវគេចាប់បញ្ជូលមកក្នុងពន្ធនាគារវិញហើយឬនៅនោះទេ ។
គេកំពុងឆ្ងល់ថា តើស្ត្រីដែលត្រូវជាប្រពន្ធពិរុទ្ធជនដែលកំពុងជាប់ក្នុងពន្ធធនាគារនឹងត្រូវគេចាប់ខ្លួនដែរឬទេ ពីព្រោះថាតាមចម្លើយសារភាពរបស់យុវជនដែលបានឃាត់ខ្លួនគឺស្ត្រីនោះបានពឹងឱ្យយុវជននោះយកផ្លែរណាអារដែកឱ្យជនជាប់ចោទ ។ លោកប្រធានពន្ធនាគារភ្នំស្វាយ ទីន សុវណ្ណណី មិនអាចស្វែងរកការផ្តល់ព័ត៌មានបន្ថែមបានទេដោយសារប្រព័ន្ធទូរស័ព្ទរបស់លោកត្រូវបានបិទ ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ឆក់ទៀតហើយ! ជិះរ៉ឺម៉ក់កង់បីជូនប្តីឡើងយន្តហោះ ត្រូវចោរឆក់កាបូបអស់ជិត១ពាន់ដុល្លារ នៅមុខព្រលានយន្តហោះភ្នំពេញ
(ភ្នំពេញ)៖ ស្រ្តីម្នាក់ ខណៈកំពុងធ្វើដំណើរជូនប្តីឡើងយន្តហោះទៅស្រុកក្រៅ គ្រាន់តែទៅដល់មុខព្រលានយន្តហោះភ្លាម ក៏ស្រាប់តែមានជនសង្ស័យម្នាក់ ជិះម៉ូតូ១គ្រឿងយ៉ាងលឿន ធ្វើសកម្មភាពឆក់កាបូបស្ពាយទៅបាត់ដោយសុវត្ថិភាព ដោយទាំងលុយជិត១ពាន់ដុល្លារ។
ក្រោយកើតហេតុ ស្ដ្រីរងគ្រោះខាងលើ បានស្រែកថាចោៗ ដើម្បីឲ្យសមត្ថកិច្ចជួយ តែជនសង្ស័យបានគេចខ្លួនបាត់ស្រមោល។ ហេតុការណ៍នេះ បានកើតឡើងនៅវេលាម៉ោង ៦ព្រឹក ថ្ងៃទី០៥ ខែមីនា ឆ្នាំ២០១៧នេះ តាមបណ្តោយផ្លូវសហព័ន្ធរុស្ស៊ី នៅចំណុចមុខអាកាសយានដ្ឋានអន្តរជាតិភ្នំពេញ ស្ថិតនៅភូមិក្បាលដំរី សង្កាត់កាកាប ខណ្ឌពោធិ៍សែនជ័យ។
ស្រ្តីរងគ្រោះ ដែលត្រូវបានចោរឆក់កាបូបស្ពាយនោះ ឈ្មោះ ប្រាក់ និមល អាយុ៣៤ឆ្នាំ គាត់បានចេញដំណើរស្រុកកំណើត នៅភូមិព្រៃចំបក់ ឃុំតាំងយ៉ាប ស្រុកព្រៃកាបាស ខេត្តតាកែវ ដើម្បីជូនប្ដីមកឡើងយន្តហោះ។
ស្រ្តីរងគ្រោះបានឲ្យដឹងថា មុនពេលកើតហេតុខ្លួន និងប្តី រួមជាមួយប្អូន៣នាក់ទៀត បានធ្វើដំណើរលើរ៉ុកម៉ក់កង់បី ចាកចេញពីសណ្ឋាគារមួយកន្លែង នៅម្តុំគីឡូលេខ៤ ឆ្ពោះទៅអាកាសយានដ្ឋានអន្តរជាតិភ្នំពេញ តាមបណ្តោយផ្លូវសហព័ន្ធរុស្ស៊ី ក្នុងទិសដៅពីជើងទៅត្បូង គ្រាន់តែបានទៅដល់មុខព្រលានយន្តហោះ មិនទាន់បានចូលផង ក៏ស្រាប់តែលេចមុខជនសង្ស័យម្នាក់ ជិះម៉ូតូឌ្រីមសង់ មិនចាំស្លាកលេខ មកអែបរ៉ុកម៉ក់កង់បីដែលគាត់ជិះនោះ ឆក់យកកាបូបស្ពាយរបស់គាត់តែម្តង។
កាបូបស្ពាយនោះ គាត់បានដាក់កូនតូចរបស់គាត់ មានអាយុទើបតែ១ឆ្នាំ លើកាបូបនោះទៀត បណ្ដាលឲ្យកូនរបស់គាត់ធ្លាក់ដល់ដី វិសនឹងគ្រោះថ្នាក់ដល់ជីវិតទៀតផង។
ភ្លាមៗនោះដែរ ប្តីរបស់គាត់ រួមនិងអ្នកធ្វើដំណើរជាមួយគ្នា បានស្រែកថា ចោរៗ ឆក់កាបូបហើយ!! ដើម្បីឲ្យគេជួយ តែពេលនោះមិនសូវមានមនុស្សម្នាច្រើន ទើបធ្វើឲ្យជនសង្ស័យមានឱកាសគេចខ្លួនបានដោយសុវត្ថិភាព។ ហើយស្រ្តីរងគ្រោះ បានជូនប្តីឡើងហោះហើយ ទើបមកដាក់ពាក្យបណ្តឹង។
កម្លាំងសមត្ថកិច្ចបានឲ្យដឹងថា សម្ភារៈ របស់ជនរងគ្រោះដែលបានបាត់បង់នោះ មានទូរស័ព្ទស៊េរីទំនើបចំនួន ២គ្រឿង លុយចំនួន៥០០ដុល្លារ និងសម្ភារៈមួយចំនួនទៀត សរុបជាទឹកប្រាក់ ជាង១,០០០ដុល្លារ។
ក្រោយពីបានដាក់ពាក្យបណ្តឹងហើយ ស្រ្តីរងគ្រោះ បានធ្វើដំណើរទៅស្រុកកំណើតវិញ ហើយរងចាំមើលសមត្ថកិច្ច ធ្វើការស្រាវជ្រាវវែកមុខសញ្ញានេះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
