ភ្នំពេញ៖ ចំណងស្នេហ៍តារាសម្តែង កញ្ញា លី ច័ន្ទសីហា និងនិស្សិតយោធា ច័ន្ទ ថៃសេង បានឈានដល់ការភ្ជាប់ពាក្យ អស់មួយឆ្នាំហើយ ដោយពួកគេគ្រោងរៀបចំ ថ្ងៃសំពះផ្ទឹមរៀបការ តាមទំនៀមទម្លាប់ប្រពៃណីខ្មែរ នៅថ្ងៃទី៥ ខែឧសភា ឆ្នាំ២០១៧ខាងមុខនេះ ទោះយ៉ាងនេះក្តីក៏ពួកគេ ប្រឹងពង្រឹង និងពង្រីមុខជំនួញថ្មី ដើម្បីត្រៀមជីវិតគ្រួសារថ្មី។
កញ្ញា លី ច័ន្ទសីហា ជាថៅកែសម្អាងការវ័យក្មេង បានឲ្យដឹងថា នាងទើបនឹងបើកដំណើរការ ការងារហាងលក់កាបូប ស្បែកជើង និងគ្រឿងសម្អាងថ្មីមួយ នៅផ្លូវ៣១០ ខាងជើងសារមន្ទីរជាតិទួលស្លែង។ ហាងនេះបើកដំណើរការ មិនមែនជាផ្ទះផ្ទាល់ខ្លួនទេ គឺជាផ្ទះជួលដែលនាងចាយទុន ក្នុងការរៀបចំតុបតែង និងទិញទំនិញ អស់ប្រមាណជាង ១ម៉ឺនដុល្លារអាមេរិក។
តារាសម្តែងសម្បូរទឹកភ្នែករូបនេះ បានបញ្ជាក់ថា ហាងនេះក៏ជាទីតាំងសំខាន់ សម្រាប់ទទួលភ្ញៀវសម្អាងការនាង ផងដែរ។ នាងបញ្ជាក់ដែរថា វាគឺជាមុខរបរ ដែលនាងស្រលាញ់យូហើយដែរ ប៉ុន្តែកន្លងមកមិនមានឱកាសគ្រប់គ្រាន់ ក្នុងការបើក ហើយការបើក ដំណើរការថ្មីៗនេះ ក៏មិនមានពិធីធំដុំអីដែរ ព្រោះតែនាងទើបនឹងរៀបចំពិធីឡើងផ្ទះថ្មី និងកម្មវិធីមួយចំនួន បន្តបន្ទាប់ខ្លាចរំខានចិត្តមិត្តសិល្បៈ។
តួឯកស្រីរឿងមរណៈមាតា លី ច័ន្ទសីហា បន្តដែរថា អនាគតស្វាមីនាង គឺពេញចិត្តខ្លាំង ចំពោះរាល់ការងាររកស៊ី ហើយក៏មានគម្រោង ពង្រីកមុខរបរថ្មីផងដែរ។ នាងនិងគូដណ្តឹង ចង់បើកដំណើរការភោជនីយដ្ឋាន ថ្មីមួយទៀត នៅតំបន់សួនទឹកស៊ីដនី នៅតំបន់ព្រែកឯង ដែលជាសួនទឹក របស់អនាគតស្វាមីនាង។ ទោះបីជាមានការពង្រីកការងាររកស៊ី កាន់តែច្រើនក្តី ក៏នាងនៅតែមិនមានគម្រោង បញ្ចប់ការងារសម្តែងដែរ គឺនៅតែសម្តែងដដែលមិនបោះបង់ទេ ព្រោះនាងស្រលាញ់ពេញចិត្ត នឹងអាជីពនេះ ហើយអនាគតស្វាមីនាង ក៏មិនបានហាមឃាត់ដែរ។ អ្វីដែលនាងចង់បាន គឺក្រុមគ្រួសារ ដែលមានភាពកក់ក្តៅមួយ ពិសេសយើងចង់មានមុខរបរខ្លះ ដែលអាចជួយទ្រទ្រង់ជីវភាព ឲ្យបានសមរម្យ ។
សូមជម្រាបថា តារាសម្ដែង លី ច័ន្ទសីហា បានភ្ជាប់ពាក្យផ្លូវការ ជាមួយគូដណ្ដឹង ច័ន្ទ ថៃសេង កាលពីថ្ងៃទី ៥កុម្ភៈ ២០១៦ ក្នុងនោះ ក៏មានរឿងរ៉ាវប៉ះទង្គិចជាច្រើន ប៉ុន្តែចំណងស្នេហ៍អ្នកទាំងពីរនាក់ នៅតែបន្តទៅមុខ មិនដែលមានចិត្ត ចង់បោះបង់ចោលគ្នាឡើយ៕
ប្រភព៖ LookingToday
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
