រាជធានីភ្នំពេញ ៖ ប្រសិនយើងធ្វើការរាប់ថយក្រោយនោះ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ឆ្នាំ២០១៦ គឺនៅសល់តែ២០ថ្ងៃទៀតតែប៉ុណ្ណោះ នឹងធ្វើការប្រារព្ធក្នុងរយៈពេល៣ថ្ងៃ គិតចាប់ពីថ្ងៃទី១៣ ១៤ និងថ្ងៃទី១៥ វិច្ឆិកា ខាងមុខនេះ ។
ក្នុងរយៈពេលប៉ុន្មានថ្ងៃកន្លងមក បន្ទាប់ពីមានការណែនាំ ពីរដ្ឋបាលរាជធានីភ្នំពេញ មន្ទីរសាធារណៈការ និងដឹកជញ្ជូនរាជធានីភ្នំពេញ បានយកចិត្ថទុកដាក់ក្នុងផែនការតុនតែងកែលម្អរ តាមសួនច្បារ ដងផ្លូវ និងទីសាធារណៈនានាក្នុងរាជធានីភ្នំពេញ ដើម្បី
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ក្នុងរយៈពេលកន្លងមកនេះ រដ្ឋបាលរាជធានីភ្នំពេញ បាននិងកំពុងដំណើរការជួសជុល កែលំអរតាមសួនច្បារ និងទីសាធារណៈផ្សេងៗ ឲ្យមានសោភ័ណភាព ជាពិសេស នៅតាមតំបន់ដែលត្រូវរៀបចំ ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នាពេលខាងមុខ ក៏ដូចចូលរួមអបអរសាទរ ទិវាបុណ្យឯករាជជាតិលើកទី៦៣ ថ្ងៃទី៩ វិច្ឆិកា ១៩៥៣- ថ្ងៃទី៩ វិច្ឆិកា ២០១៦ នឹងធ្វើជាបន្តបន្ទាប់គ្នានេះ ផងដែរ ។
លោកបន្តថា ក្នុងពេលនេះ មន្ត្រីជំនាញគ្រប់ផ្នែក ក្រោមឱវាទរដ្ឋបាលរាជធានីភ្នំពេញ បាននិងកំពុងមមារញឹកជាខ្លាំង ក្នុងផែនការតុបតែងកែលម្អរ មានដូចជាផ្នែកភ្លើងបំភ្លឺសាធារណៈ ត្រូវបានជំរុញការផ្លាស់ប្តូរអំពូលភ្លើង និងដំឡើងអំពូលភ្លើងចម្រុះពណ៌ នៅតាមដើមឈើ សួនច្បារ តាមដងផ្លូវ ជាពិសេសនៅតំបន់ប្រារព្ធពិធីអុំទូកតែម្តង ផ្នែកសួនច្បារ ក៏កំពុងលាបកំបោរតាមគល់ឈើ លាបថ្នាំតាមការ៉ូឡា និងប័រឌារតាមចិញ្ចើមសួនច្បារ និងដាក់ពង្រាយបង្គន់អនាម័យជាង ៤០០បង្គន់ ដើម្បីត្រៀមទទួលស្វាគមន៍ ប្រជាពលរដ្ឋចូលរួមព្រះរាជ ពិធីបុណ្យអុំទូក ក្នុងនាមជាម្ចាស់ផ្ទះផងដែរ ។
លោកសាំ ពិសិដ្ឋ បានបញ្ជាក់ថា ជាក់ស្តែង នៅពេលនេះ រដ្ឋបាលរាជធានីភ្នំពេញ បានត្រៀមរៀបចំដំឡើងរបារ កាត់ទទឹងផ្លូវ អបអរសាទរបុណ្យអុំទូក ដែលត្រូវដាក់ចំនួន៤ទីតាំង គឺទី១-ដាក់នៅមហាវិថីព្រះនរោត្តម ខាងជើងជាប់រង្វង់មូលវិមានឯករាជ្យ ទី២-ដាក់មហាវិថីព្រះនរោត្តម មុខនាឡិការរមណីដ្ឋានវត្តភ្នំ ទី៣-ដាក់នៅតិរវិថីព្រះស៊ីសុវត្ថិមុខព្រះគន្លង់ និងទី៤-ដាក់នៅមហាវិថីព្រះសីហនុខាងលិចរង្វង់មូលសម្តេចសង្ឃ ជួន ណាត តែម្តង ក្នុងគោលបំណង ដើម្បីលើកកំពស់សោភណ្ឌ័ភាពរាជធានីភ្នំពេញឲ្យកាន់តែល្អប្រសើឡើង ។
សំរាប់ព្រះរាជពិធីបុណ្យអុំទូក ឆ្នាំ២០១៦នេះ គេសង្ឃឹមថា នឹងមានប្រជាពលរដ្ឋចូលរួមទស្សនាកាន់តែកើនឡើងជាងឆ្នាំមុនៗ បន្ទាប់ពីអាក់ខាន អស់រយៈពេលប៉ុន្មានឆ្នាំជាប់ៗគ្នាកន្លងមក ។
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា បុណ្យអុំទូកឆ្នាំនេះមានកាមេរ៉ាសុវត្ថិភាព៦០០គ្រឿង សម្រាប់តាមដាន និងទប់ស្កាត់បទល្មើស។
ក្រុមការងារបាន និងកំពុងមមាញឹកក្នុងការតម្លើងប្រពន្ធ័កាមេរ៉ាសុវត្ថិភាពចំនួន៦០០គ្រឿង ក្នុងរាជធានីភ្នំពេញ ធ្វើយ៉ាងណាឱ្យរួចរាល់មុនថ្ងៃព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ដែលនឹងប្រព្រឹតទៅក្នុងពេលឆាប់ខាងមុខនេះ។ លោក សាំ ពិសិដ្ឋ នាយកមន្ទីរសាធារណៈការ និងដឹកជញ្ជូនរាជធានីភ្នំពេញ បានឲ្យដឹងថា កាលពីរសៀលថ្ងៃទី២១ ខែកញ្ញា កន្លងទៅ ឯកឧត្តម ប៉ា សុជាតិវង្ស អភិបាលរាជធានីភ្នំពេញ បានដឹកនាំប្រជុំសម្របសម្រួលជាមួយក្រុមការងាររៀបចំតម្លើងកាមេរ៉ាសុវត្ថិភាពទាំង៦០០គ្រឿងគ្របដណ្ដប់ទូទាំង១២ខណ្ឌ ដើម្បីពន្លឿនឱ្យបានរួចរាល់មុនពិធីបុណ្យអុំទូក។
លោកបន្តថា ពេលនេះសម្ភារភាគច្រើនត្រូវបានបញ្ជូនមកដល់ និងប្លង់ដែលត្រូវបំពាក់ក៏រៀបចំរួចរាល់ហើយដែរ ចំណែកក្រុមការងារ កំពុងមមាញឹកជម្រុញឲ្យបានឆាប់រួចរាល់តាមផែនការ ដើម្បីការពារសន្តិសុខ សណ្តាប់ធ្នាប់ និងសុវត្ថិ ភាពជូនប្រជាពលរដ្ឋ ។
សមត្ថកិច្ចរាជធានីភ្នំពេញ បានឲ្យដឹងថា ការបំពាក់កាមារ៉ាសុវត្ថិភាព តាមដងផ្លូវសំខាន់ៗមួយចំនួនកន្លងមក បានធ្វើឲ្យសមត្ថកិច្ចងាយស្រួយក្នុងការកំណត់រកមុខសញ្ញា និងទប់ស្កាត់ បានទាន់ពេលវេលា និងឈានដល់ការចាប់ខ្លួនជនសង្ស័យដែលបង្កបទល្មើសផ្សេងៗ។
សូមបញ្ជាក់ថា ប្រពន្ធ័កាមេរ៉ា ៦០០គ្រឿងនេះ ត្រៀមបំពាក់នៅតាមច្រកសំខាន់ៗមួយចំនួននៅក្នុងខណ្ឌទាំង១២ក្នុងរាជធានីភ្នំពេញមាន ខណ្ឌចំការមនចំនួន១៤៧គ្រឿង ដូនពេញ១១៦គ្រឿង ៧មករា ៧៥គ្រឿង ទួលគោក៥៤គ្រឿង ដង្កោ៨គ្រឿង មានជ័យ៥១គ្រឿង ឬស្សីកែវ៥៣គ្រឿង សែនសុខ២១គ្រឿង ពោធិសែនជ័យ២២គ្រឿង ជ្រោយចង្វា១៩គ្រឿង ព្រែកព្នៅ៨គ្រឿង និងខណ្ឌច្បារអំពៅចំនួន២៦គ្រឿងផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
