(កំពង់ស្ពឺ)៖ សោដនាកម្មគ្រោះថ្នាក់ចរាចរណ៍ដ៏ន្ធត់មួយ បណ្តាលឲ្យយុវជនចំនួន៣នាក់ ស្លាប់ភ្លាមៗ នៅកន្លែង ក្នុងគ្រោះថ្នាក់ចរាចរណ៍ម៉ូតូ បុកជាមួយរថយន្តកុងតឺន័រ នៅលើផ្លូវជាតិលេខ៤។ ហេតុគ្រោះថ្នាក់ចរាចរណ៍នេះ បានកើតឡើងនៅយប់ រំលងអាធ្រាត្រឈានចូលថ្ងៃទី២៣ ខែតុលា ឆ្នាំ២០១៦ ត្រង់ចំណុចផ្លូវបំបែកជា៤ ផ្សារព្រៃផ្តៅ ស្ថិតក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ។
មន្ត្រីនគរបាល បានឲ្យដឹងថា ជនរងគ្រោះ៣នាក់ ជិះម៉ូតូ១គ្រឿង ម៉ាក Honda Dream C125 ឆ្នាំ២០០៨ ពាក់ស្លាកលេខកំពង់ស្ពឺ 1C-2343 ធ្វើដំណើរមកពីទិសខាងជើងឆ្លងផ្លូវជាតិលេខ៤ ទៅត្បូង ស្រាប់តែបុករថយន្ត កុងទីន័រ១គ្រឿង ពាក់ស្លាកលេខភ្នំពេញ3D-6837 អ្នកបើកបរមិនស្គាល់ឈ្មោះ។ មន្ដ្រីនគរបាលបន្ដថា ម៉ូតូបានបានជ្រុលបុក ចំពីចំហៀងរថយន្តខាងឆ្វេងកង់ក្រោយ បណ្ដាលឲ្យរថយន្ដជាន់ស្លាប់ទាំង៣នាក់។ ចំណែកអ្នកបើកបររថយន្ត បានរត់គេចខ្លួនបាត់ស្រមោល។
ប៉ុន្ដែសាក្សី នៅកន្លែងកើតហេតុ បានបញ្ជាក់ថា ក្រោយពេលកើតហេតុ មានរថយន្តសាំយ៉ុងមួយគ្រឿងទៀត បានកិនសាកសពបន្ថែម ធ្វើបែកលលា ធ្លាយខួរពេញផ្លូវ បែបនេះ។
បច្ចុប្បន្នវត្ថុតាងទាំងពីរគ្រឿង ត្រូវបានយកមករក្សាទុកនៅអធិការដ្ឋាននគរបាលស្រុកសំរោងទង ដើម្បីកសាងសំណុំចាត់ការតាមនីតិវិធី រីឯសាកសពរក្សាទុកនៅ មន្ទីរព្យាបាល និងសម្ភពរស្មី ដើម្បីស្រាវជ្រាវរកសាច់ញាតិ៕
ប្រភព៖ Fresh News
កំណត់ហេតុខ្មែរឡូត៖
ដោយឡែក ករណីមួយផ្សេងទៀត កាលពីលើកមុន យ៉ាងហោចណាស់មនុស្ស២នាក់បានស្លាប់ និងម្នាក់ទៀតបានរងរបួសធ្ងន់ នៅក្នុងឧបទ្ទវហេតុគ្រោះថ្នាក់ចរាចរណ៍២ករណីដាច់ដោយឡែកពីគ្នា ដែលកើតឡើងនៅក្នុងស្រុកកំរៀង និងស្រុកសង្កែ រវាងរថយន្ត និងរថយន្ត ដែលផ្ដើមចេញពីការធ្វេសប្រហែស និងបើកបរបំពានច្បាប់ចរាចរណ៍ ។
មន្ត្រីនគរបាលចរាចរណ៍បានឲ្យដឹងថា ករណីទី១ បានកើតឡើងនៅវេលាម៉ោង១ និង២០នាទីរសៀល ថ្ងៃទី២២ខែតុលា ឆ្នាំ២០១៦ នៅលើផ្លូវជាតិលេខ៥៩ ត្រង់ចំណុចភូមិបឹងរាំង ឃុំបឹងរាំង ស្រុកកំរៀង ដែលបង្កឡើងដោយរថយន្តម៉ាកហ៊ីយ៉ាន់ដាយ ប្រភេទយីឌុប ពាក់ស្លាកលេខ ភ្នំពេញ 3C-0679 អ្នកបើកបរបានរត់គេចខ្លួនបាត់ ។
មន្ត្រីដដែលបន្តថា រថយន្តនេះបានព្យាយាមបើកជែងរថយន្ត១គ្រឿងទៀតនៅខាងមុខ តែជែងមិនផុតក៏ជ្រុលទៅបុករថយន្តកាមរី១គ្រឿងពាក់ស្លាកលេខ ភ្នំពេញ 2G-1077 ពេញទំហឹង ដែលធ្វើដំណើរបញ្ច្រាសទិសគ្នា បណ្ដាលឲ្យអ្នកបើកបរឈ្មោះ ញឹម សំអុល អាយុ៤០ឆ្នាំ ស្លាប់គាបជាប់ក្នុងរថយន្ត រីឯអ្នករួមដំណើរម្នាក់ទៀតរងរបួសធ្ងន់ ។
ដោយឡែក ករណីទី២ បានកើតឡើងនៅវេលាម៉ោង២ និង៣០នាទីរសៀល ថ្ងៃទី២២ ខែតុលា ឆ្នាំ២០១៦ នៅលើផ្លូវជាតិលេខ៥ ក្នុងភូមិថ្នល់បត់ ឃុំកំពង់ព្រៀង ស្រុកសង្កែ ដែលបង្កឡើងដោយរថយន្តដឹកទំនិញ ប្រភេទយីឌុបពាក់ស្លាកលេខ ព្រះស៊ីហនុ 3A-0469 បើកបរដោយឈ្មោះ សុខ អាន អាយុ២១ឆ្នាំ នៅខេត្តកំពង់ចាម ធ្វើដំណើរពីកើតទៅលិច ។
សមត្ថកិច្ចបានបន្តថា រថយន្តនេះបានព្យាយាមបើកឡើងជែងរថយន្តតូច១គ្រឿងនៅខាងមុខ តែជែងមិនរួចក៏ជ្រុលទៅបុករថយន្តដឹកទំនិញ១គ្រឿងទៀត ពាក់ស្លាកលេខ ពោធិ៍សាត់ 3A-0315 ក្នុងដំណើរបញ្ច្រាសទិសគ្នា បណ្ដាលឲ្យអ្នកបើកបរឈ្មោះ ពោត សាម៉ុន អាយុ៥៨ឆ្នាំ រស់នៅខេត្តពោធិ៍សាត់ ស្លាប់ភ្លាមៗនៅក្នុងកាប៊ីនរថយន្ត រីឯអ្នកបើករថយន្តបង្កមិនមានគ្រោះថ្នាក់ទេ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
