បុរសឆែបក្បាលមួយចំហៀងដ៏ល្បីនៅរដ្ឋផ្លរីដា ជាប់ចោទពីបទប៉ុនប៉ងមនុស្សឃាត ក្រោយដុតពូកខ្លួនឯងចោល

អាមេរិក៖ ទីភ្នាក់ងារសារព័ត៌មានដេលីម៉ែល បានផ្សាយកាលពីថ្ងៃទី១៩ ខែតុលា ឆ្នាំ២០១៦នេះថា បុរសនៅទីក្រុងម៉ៃអាមីម្នាក់ ដែលបាត់បង់ក្បាលមួយចំហៀង នៅក្នុងគ្រោះថ្នាក់រថយន្ត ត្រូវបានចាប់ខ្លួនពីបទប៉ុនប៉ងមនុស្សឃាត បន្ទាប់ពីគាត់បានដុតពូកខ្លួនឯងចោល។

លោក Carlos Rodriguez ដែលត្រូវមិត្តភក្តិហៅថា “អាក្បាលឆែប” ត្រូវបានចាប់ខ្លួនកាលពីថ្ងៃចន្ទ បន្ទាប់ពីបានដុតពូករបស់ខ្លួននៅក្រៅផ្ទះរបស់គាត់ នៅផ្លូវ 266 NW 61 Ave នៃក្រុងម៉ៃអាមី រដ្ឋផ្លរីដា សហរដ្ឋអាមេរិក។ 

បុរសអាយុ ៣១ ឆ្នាំរូបនេះ ត្រូវបានជាប់ចោទពីបទប៉ុនប៉ងមនុស្សឃាត ព្រោះពូកដែលឆាបឆេះនោះគឺស្ថិតនៅកៀកនឹងផ្ទះរបស់អ្នកជិតរបស់គាត់ នេះបើតាមសេចក្តីរាយការណ៍របស់ភ្នាក់ងារសារព័ត៌មាន NBC Miami ។

បើយោងទៅតាមរបាយការណ៍ចាប់ខ្លួនបុរសឆែបក្បាលនេះ បានឱ្យដឹងថា អគ្គីភ័យ បង្កការគំរាមកំហែងភ្លាមៗដល់អាយុជីវិត និងសុវត្ថិភាពរបស់អ្នករស់នៅជិតខាងរបស់គាត់។ ប៉ុន្តែនៅមិនទាន់ដឹងច្បាស់ទេថា ហេតុអ្វីបានជាបុរសរូបនេះដុតពូករបស់គាត់ចោល។

គួរបញ្ជាក់ថា លោក Rodriguez ក៏ជាប់ចោទពីបទដុតផ្ទះក្នុងកម្រិតទី១ រួមជាមួយការចោទបទឧក្រិដ្ឋប៉ុនប៉ងមនុស្សឃាតផងដែរ។

ប្រភពព័ត៌មានបន្តថា លោក Rodriguez បានបង្ហាញមុខនៅតុលាការកាលពីថ្ងៃអង្គារនេះ ប៉ុន្តែចៅក្រមបានបង្គាប់ឱ្យកំណត់សវនាការឡើងវិញនៅថ្ងៃពុធ ដោយផ្អែកថា Rodriguez មានបញ្ហាផ្លូវចិត្ត។

គួរបញ្ជាក់ថា Rodriguez មានក្បាលឆែបបែបនេះ ដោយសារលោកបានបើកបុកបង្គោលនៅតាមផ្លូវ ហើយបង្គោលទាំងនោះហោះមកបុកក្បាលលោក។ នេះក៏ដោយសារតែលោកបានបើកបរទាំងសភាពស្រវឹង និងប្រើប្រាស់ថ្នាំញៀន។

ដូច្នេះអ្នកទាំងអស់គ្នា មិនគួរបើកបរទាំងសភាពស្រវឹងនោះទេ ព្រោះអាចបង្កគ្រោះថ្នាក់ដល់ខ្លួនឯង និងអ្នកដទៃ៕

ប្រភព៖ Dailymail