ខេត្តកំពង់ធំ ៖ ឧបទ្ទវហេតុដ៏រន្ធត់មួយបានកើតឡើងកាលពីវេលាម៉ោង៥ និង១០នាទីល្ងាច ថ្ងៃទី២៥ ខែកញ្ញា ឆ្នាំ២០១៦ ស្ថិតនៅលើផ្លូវកៅស៊ូក្នុងភូមិអាត់ស៊ូ ឃុំសំបូរ ស្រុកប្រាសាទសំបូរ ខេត្តកំពង់ធំ ដោយក្មេងស្រីម្នាក់ត្រូវបានរថយន្តបុកកិនចាប់កង់ក្រោយស្លាប់យ៉ាងអាណោចអាធ័ម ។
លោកវរសេនីយ៍ទោ យ៉េង សារ៉េន អធិការនគរបាលស្រុកប្រាសាទសំបូរបានឲ្យដឹងថា បើតាមប្រភពព័ត៌មានពីកន្លែងកើតហេតុប្រាប់ថា មុនពេលកើតហេតុគេឃើញរថយន្ត១គ្រឿងម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខកំពង់ធំ 3A-1183 បើកបរពីទិសខាងកើតទៅលិចក្នុងល្បឿនលឿន លុះមកដល់ចំណុចកើតហេតុខាងលើក៏បានបុកក្មេងស្រីម្នាក់កិនជាប់កង់រថយន្តខាងក្រោយបណ្តាលឲ្យកុមារីរងគ្រោះស្លាប់បាត់បង់ជីវិតភ្លាមៗយ៉ាងអាណោចអាធ័ម ខណៈក្មេងស្រីរងគ្រោះរត់ឆ្លងថ្នល់ ចំណែកអ្នកបើកបររថយន្តមិនស្គាល់អត្តសញ្ញាណបានចុះរត់គេចខ្លួនបាត់ ។
សមត្ថកិច្ចបញ្ជាក់ថា ក្មេងស្រីរងគ្រោះឈ្មោះ អឿន ដាលីន អាយុ៥ឆ្នាំ រស់នៅភូមិឃុំកើតហេតុខាងលើ ត្រូវបានប្រគល់ជូនឪពុកម្តាយយកទៅធ្វើបុណ្យតាមប្រពៃណី ចំណែករថយន្តត្រូវបានសមត្ថកិច្ចនាំយកទៅរក្សាទុកនៅអធិការដ្ឋានស្រុកប្រាសាទសំបូរ ដើម្បីចាត់ការតាមផ្លូវច្បាប់ ៕
ប្រភព៖ កោះសន្តិភាព
កំណត់ហេតុខ្មែរឡូត៖ ស្រដៀងគ្នានេះដែរ ករណីមួយផ្សេងទៀត ក្មេងស្រីម្នាក់ត្រូវរថយន្តបុកស្លាប់ក្នុងថ្លុកឈាម យ៉ាងអាណោចអាធ័ម កាលពីវេលាម៉ោង១២ និង២៥នាទី ថ្ងៃទី២៩ ខែសីហា ឆ្នាំ២០១៦ នៅកណ្ដាលផ្លូវជាតិលេខ៥៩ ស្ថិតក្នុងភូមិចំបក់ ឃុំជ្រៃសីមា ស្រុកសំពៅលូន ខេត្តបាត់ដំបង ។
សេចក្តីរាយការណ៍ បានឲ្យដឹងទៀតថា ក្មេងស្រីរងគ្រោះឈ្មោះ ឌី ស្រីនូ អាយុ៥ឆ្នាំ រស់នៅភូមិ-ឃុំកើតហេតុ ។
ប្រភពពីប្រជាពលរដ្ឋ នៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្ត១គ្រឿង ម៉ាកកាមរីឆ្លាមពណ៌ខ្មៅ ពាក់ស្លាកលេខ សៀមរាប 2A-6182 បើកយ៉ាងលឿនក្នុងទិសដៅពីជើងទៅត្បូង លុះដល់ចំណុចកើតហេតុ ស្រាប់តែក្មេងស្រីរងគ្រោះបានរត់ឆ្លងផ្លូវ ពីកើតទៅលិចក៏ត្រូវ រថយន្តនោះបុកចំ យ៉ាងពេញទំហឹងបណ្ដាលឲ្យក្មេងស្រីរងគ្រោះ ប៉ើងប្រមាណ ១០ម៉ែត្រស្លាប់ក្នុងថ្លុកឈាម យ៉ាងអាណោចអាធ័មក្រោមសម្រែកស្រែក ទ្រហោយំពីសំណាក់ជីដូន ព្រោះឪពុកម្តាយក្មេងស្រីរងគ្រោះបានទៅធ្វើការ នៅប្រទេសថៃអស់ ។
ក្រោយពេលកើតហេតុ ភ្លាមរថយន្តបង្កក៏បានបន្ថែមល្បឿន បើករត់គេចខ្លួនបាត់ស្រមោលតែម្តង ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]