ភ្នំពេញៈ ក្រោយពីទទួលបាន កូនប្រុស ៣នាក់ ជាចំណងដៃ ក្នុងជីវិតអាពាហ៍ពិពាហ៍ សម្រស់របស់ពិធីការិនីចាស់វស្សា អ្នកនាង មាស ម៉ូលីណា ដូចជាមិនមាន ការប្រែប្រួលសោះឡើយ ធ្វើឲ្យទស្សនិកជនកោតសរសើរ គ្រប់ៗគ្នា ។
មាស ម៉ូលីណា អាចរកបានកម្មវិធី ផ្សាយផ្ទាល់ ណាមួយផ្សេងទៀត របស់ស៊ីធីអិនមិនខាន ដោយសារតែនាង នៅតែមានសមត្ថភាពធ្វើជាពិធីការិនីល្អ ដូចពីមុន ឯរូបសម្រស់នៅតែស្អាត ទោះជាមានកូនដល់ទៅ ៣នាក់ ទៅហើយក្តី ។ កាលពីអំឡុងឆ្នាំ២០០២ អ្នកនាងមាស ម៉ូលីណា នៅតែបណ្តែតជីវិត ជាមួយអាជីពសិល្បៈ តាមរយៈតួនាទីជាពិធីការិនី ទោះជានាងមានអាជីព នៅក្រៅរង្វង់សិល្បៈនឹងធឹងបែបណាក្តី ។
បច្ចុប្បន្ននេះ មាស ម៉ូលីណា កំពុងតែកាន់ការងារ នៅទូរទស្សន៍ស៊ីធីអិន ក្រោយលាឈប់ពីប៉ុស្តិ៍លេខ៣ តែមិនមែនជាកម្មវិធីចេញមុខខ្លាំង ឬល្បីដូចជាកម្មវិធីផ្សាយផ្ទាល់ទេ គឺភាគច្រើន នាងគ្រងកម្មវិធីស្ត្រីមេផ្ទះ ថតទុក និងចាក់ផ្សាយប៉ះចំម៉ោង ដែលទស្សនិកជនមមាញឹក ការងាររកស៊ី មិនសូវបើកមើល ។ តាមរយៈការបង្ហាញមុខ ជាសាធារណៈ កាលពីពេលថ្មីៗ កន្លងទៅនេះ ក្នុងកម្មវិធីមន្តស្នេហ៍សំនៀង គេកត់សម្គាល់ឃើញ អ្នកនាងមាស ម៉ូលីណា មានឫកពាចាស់ទុំ ព្រោះមានកូន៣នាក់ទៅហើយ តែមិនទាន់ទៅណាឆ្ងាយពីសិល្បៈឡើយ ។
ការបង្ហាញមុខ កាលពីពេលកន្លងទៅ របស់ម៉ូលីណា នាំឱ្យមានមតិលើកឡើងថា នាងអាចនឹងវិលទៅកាន់ការងារសិល្បៈ ពេញទំហឹងមិនខាន ព្រោះអំឡុងពេលនេះ បើនិយាយពីតារាជើងចាស់ ម្នាក់ៗស្រវាការងារយ៉ាងច្រើន ដោយខ្លះងាកទៅសម្តែងភាពយន្ត ធ្វើជាគណៈកម្មការដាក់ពិន្ទុ ជាក់ស្តែងលោកអ៊ិត សេដ្ឋា អ្នកនាងគង់ សុជាតិ និងអ្នកនាងចាន់ តារាទី ជាដើម ។ ក្នុងជំនួបផ្ទាល់នៅពេលកំពុងបង្ហាញមុខ ក្នុងកម្មវិធី «មន្តស្នេហ៍សំនៀង» អ្នកនាងមាស ម៉ូលីណា ដែលគ្រងសម្លៀកបំពាក់ បែបប្រពៃណីមើលទៅស្អាត បែបសុភាព បាននិយាយថា នាងមិនមែនឆក់យកកម្មវិធី របស់អ្នកនាងយុគ ចិន្តា ទេ គ្រាន់តែមកជំនួសពេលរវល់ប៉ុណ្ណោះ ។ វាជាការជួយគ្នាក្នុងពេលរវល់ គឺម្តងគេ ម្តងយើង ។
ម៉្យាងនាងបានចូលបម្រើការងារ នៅស៊ីធីអិនដែរហើយ ។ ហ្វ្រេស៊ីហ្គើលជំនាន់ទី១ ដែលទើបតែប្តូរទ្រនំនេះ បានថ្លែងថា សិល្បៈនាងមិនប្រឡូកឱ្យពេញទំហឹង ប្រជែងគេឯងដូចមុនទេ គឺនាងធ្វើការងារនេះ ល្មមៗប៉ុណ្ណោះ មិនចូលជ្រៅឡើយ ។ រាល់លើកដែលនាងចេញថតកម្មវិធី ម្តងៗ នាងបែងចែកពេលវេលាច្បាស់ណាស់ ដើម្បីកុំឱ្យទាក់ទិននឹងការរកស៊ី និងពេលមើលថែកូនប្រុស ទាំង៣នាក់របស់នាង ។
ត្រឹមតែពិធីការិនីមួយមុខនេះ នាងសប្បាយចិត្តសម្រាប់បំពេញ តែបើឱ្យងាកធ្វើអីទៀត គឺប្រហែលជាមិនអាចទេ ដោយរាល់ថ្ងៃនេះ នាងធ្វើការដល់ទៅ៣កម្មវិធីនៅស៊ីធីអិន ។ បើចង់ដឹងច្បាស់ថាអ្នកនាង មាស ម៉ូលីណា សម្រស់ប្រែប្រួលឬ ឬនៅតែស្រស់ស្អាត ដដែលនោះ សូមទស្សនារូបថតខាងក្រោមនេះ ទាំងអស់គ្នា៕
ប្រភព៖ ដើមអម្ពិល
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
