រាជធានីភ្នំពេញ ៖ រហូតមកដល់ពេលនេះជំងឺចាស់របស់នាយ វីតាមីនសេ នៅតែបន្តយាយីដល់គាត់ដដែល ។ មូលហេតុនេះក្លាយជាឧបសគ្គមួយចម្បង ធ្វើឲ្យនាយវីតាមីនសេអាក់ខានក្នុងការសម្តែងញឹកញាប់ដូចមុន ។
មួយរយៈចុងក្រោយនេះប្រិយមិត្តទស្សនិកជនមួយចំនួនងឿងឆ្ងល់ ព្រោះហាក់មិនសូវបានឃើញនាយវីតាមីនសេ ចូលរួមសម្តែងកំប្លែង ។
ជុំវិញបញ្ហានេះក្រុមគ្រួសារអះអាងកាលពីពេល ថ្មីៗកន្លងមកថា មូលហេតុដែលធ្វើឲ្យតារាកំប្លែងវីតាមីនសេ មិនសូវចេញមុខសម្តែងញឹកញាប់ដូចមុននោះ គឺដោយសារបញ្ហាសុខភាព ។ នាងប៉េងប៉ោង អះអាងប្រាប់កោះសន្តិភាពថា «រហូតមកដល់ពេលនេះលោកប៉ារបស់ខ្ញុំកំពុងតែញាំញីដោយជំងឺចាស់របស់គាត់នៅឡើយ ។ បច្ចុប្បន្នគាត់កំពុងសម្រាកព្យាបាលនៅគេហដ្ឋាន ប៉ុន្តែត្រូវទៅពិនិត្យនៅពេទ្យជាប្រចាំផងដែរ នៅពេលដែលជំងឺបានរើឡើង» ។
បើតាមអ្នកនាង ប៉េងប៉ោង ថានាយវីតាមីនសេ មានជំងឺលើសឈាម និងជំងឺផ្សេងទៀត តម្រូវឲ្យលេបថ្នាំជាប្រចាំ ក្នុងពេលដែលវ័យ របស់គាត់កាន់តែវិវឌ្ឍទៅរកភាពចាស់ជរា ។
នាយវីតាមីនសេ នៅអាចចូលរួមសម្តែងបានខ្លះដែរក្នុងវង់កំប្លែងរបស់គាត់សម្រាប់កម្មវិធីវិស្សមកាលតន្ត្រីរបស់ស្ថានីយទូរទស្សន៍បាយ័នរៀងរាល់ថ្ងៃសុក្រ ។
អ្នកនាងប៉េងប៉ោង ឲ្យដឹងថា រហូតមកដល់ពេលនេះនាយវីតាមីនសេ នៅតែតាំងចិត្តបន្តអាជីពសម្តែងទៀត ប្រសិនបើទស្សនិកជននៅតែគាំទ្រ និងអាស្រ័យលើបញ្ហាសុខភាព ។ ជាងនេះទៅទៀតនាយវីតាមីនសេ ទទួលយកការសម្តែងតាមបណ្តាខេត្តនានាដដែល ប៉ុន្តែក្នុងលក្ខខណ្ឌទៅជាក្រុម ជាពិសេសគឺមានវត្តមាននាងទៅជាមួយដែរ ។
កាលពីអំឡុងឆ្នាំ២០១៥តារាកំប្លែងលោក ម៉ៅ សាមឿន ហៅវីតាមីនសេ ត្រូវក្រុមគ្រួសារបញ្ជូនទៅកាន់មន្ទីរពេទ្យដើម្បីវះកាត់ ភ្លាមៗ ដោយគាត់មានបញ្ហាដោយសារជំងឺបូសហូរខ្ទុះ។ បន្ទាប់ពីទទួលការវះកាត់ជំងឺបូសហូរខ្ទុះដោយជោគជ័យរួចមក តារាកំប្លែងវីតាមីនសេមានជំងឺផ្សេងៗទៀត ដូចជាជំងឺលើសឈាម លើសជាតិស្ករ និងឫសដូងបាតជាដើម ដែលទាមទារឲ្យមានការព្យាបាលជាប្រចាំ ៕
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក រំលឹកព័ត៌មានចាស់លើកមុនផងដែរថា ដោយមើលឃើញ ពីការលំបាក របស់តារាកំប្លែងជើងចាស់ពីរដួង និងកំពុងតែមានជំងឺ ប្រចាំកាយទៀតនោះ ប្រធានសមាគមន៍សិល្បករខ្មែរ លោក សុះ ម៉ាច បាននាំយកថវិកាមួយចំនួន ដែលបានមកពីសប្បុរសជន ទៅឧបត្ថម្ភ ជូនលោកតា វីតាមីនសេ និងតាចេក ដែលបច្ចុប្បន្នកំពុងមានជំងឺជាប់ខ្លួន និងជូបការលំបាក សម្រាប់ជីវភាពប្រចាំថ្ងៃ។
កាលពីថ្ងៃទី២៥ ខែកញ្ញា ឆ្នាំ២០១៥កន្លងទៅនេះ លោក សុះ ម៉ាច បានសរសេរ នៅលើហ្វេសប៊ុកថា ព្រឹកនេះខ្ញុំបានយកថវិកា ទៅឧបត្ថម្ភលោក តាវីតាមីនសេ ចំនួន ៣០,០០០០រៀល លោក តាចេក២០,០០០០រៀល និងអ្នក មីងស៊ីថា ១៥,០០០០រៀល។
លោក សុះ ម៉ាច បានបញ្ជាក់ទៀតថា «ថវិកាខាងលើនេះ គឺបានមកពីសប្បុរសជន រួមមានលោកពៅ និង ភរិយា, ប្អូនស្រី chan DA និង ថវិកាផ្ទាល់ខ្លួនរបស់លោកខ្លះផងដែរ។ លោកក៏សូមអរគុណ ចំពោះសន្តានចិត្ដ ដ៏សប្បុរស របស់លោកអ្នក និងសូមជូនឲ្យជួបនូវពរបួនប្រការ គឺ អាយុ វណ្ណៈ សុខៈ ពលះ កុំបីឃ្លាតឡើយ»។
សូមបញ្ជាក់ថា តារាកំប្លែងនាយ វីតាមីនសេ កាលពីថមុននេះ បានធ្លាក់ខ្លួនឈឺធ្ងន់ ត្រូវក្រុមគ្រួសារបញ្ជូនបន្ទាន់ ទៅសង្គ្រោះ នៅឯមន្ទីពេទ្យកាល់ម៉ែត្រ ខណៈដែលជំងឺចាស់ ត្រូវរើសឡើងវិញ។បើតាមការឲ្យដឹង ពីក្រុមគ្រួសារតារា កំប្លែងនាយ វីតាមីនសេ បច្ចុប្បន្នកំពុងប្រឈមមុខជំងឺដូចជា លើសឈាម ទឹកនោមផ្អែម ខ្លាញរុំបេះដូង និង ជំងឺពុកឆ្អឹងដែលតម្រូវឲ្យ មានការព្យាយាបាល ដោយយកចិត្តទុកដាក់ព្រមទាំង ការតាមដានជាប្រចាំ ពីសំណាក់ក្រុមគ្រូពេទ្យ។
ដោយឡែក ទន្ទឹមគ្នានេះដែរតារាកំប្លែង ស្ថិតនៅក្រុមរបស់នាយកុយ គឺតាចេក កាលពីកន្លង ទៅក៏បានធ្លាក់ខ្លួនឈឺត្រូវសម្រាកព្យួសេរ៉ូម នៅឯផ្ទះផងដែរ។ ការដែលនាយចេកសម្រេចជ្រើស យកការព្យាបាលនៅគេហដ្ឋាន របស់គាត់នោះក៏ព្រោះតែនាយជួបភាពលំបាក មកពីកត្តាគ្រួសារ មានវិភាពខ្វះខាត៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
