អគ្គិភ័យឆេះផ្ទះប្រជាពលរដ្ឋ នៅក្រោយមន្ទីរពេទ្យកុមារជាតិ បានរលត់ហើយ, មូលហេតុឆ្លងភ្លើងពេលសាកទូរស័ព្ទ

(ភ្នំពេញ)៖ អគ្គិភ័យដែលឆាបឆេះ ផ្ទះប្រជាពលរដ្ឋ នៅខាងក្រោយមន្ទីរពេទ្យកុមារជាតិ សង្កាត់ទឹកល្អក់ទី១ ខណ្ឌទួលគោកបានរលត់ ទៅវិញហើយ នាព្រឹកថ្ងៃទី១ ខែកញ្ញា ឆ្នាំ២០១៦នេះ ក្រោយម្ចាស់ផ្ទះ និងប្រជាពលរដ្ឋ នៅជិតខាងជួយពន្លត់ទាន់។

សមត្ថកិច្ចបានឲ្យដឹងថា មូលហេតុគឺបណ្តាលមកពីឆ្លងភ្លើង នៅពេលម្ចាស់ផ្ទះសាកថ្មទូរស័ព្ទ ហើយដាក់លើពូក។ គ្រោះអគ្គិភ័យមួយ ចំអិតកំពិសនេះ បានបណ្តាលឲ្យខូចខាតពូកដេក និងទ្រព្យសម្បត្តិមួយចំនួនតូច។

រថយន្តពន្លត់អគ្គិភ័យចំនួន២គ្រឿង បានទៅជួយអន្តរាគន៍ដែរ ប៉ុន្តែមិនបានបាញ់នោះទេ៕

ប្រភព៖ Fresh News

កំណត់ហេតុខ្មែរឡូត៖

ដោយឡែក ករណីមួយផ្សេងទៀត កាលពីលើកមុន  អគ្គិភ័យដែលឆេះភោជនីយដ្ឋាន «ចេនឡា» នៅខណ្ឌជ្រោយចង្វារ បំផ្លាញទ្រព្យសម្បត្តិមួយចំនួន។ គួររំលឹកផងដែរថា អគ្គិភ័យដែលបានឆាបឆេះភោជនីយដ្ឋាន «ចេនឡា» ស្ថិតនៅតាមបណ្តោយផ្លូវជាតិលេខ៦អា ក្នុងភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ បានរលត់ទៅវិញហើយ កាលពីវេលាម៉ោងប្រមាណ៣៖៥០នាទី រសៀលថ្ងៃទី១៦ ខែសីហា ឆ្នាំ២០១៦ កន្លងទៅ ក្រោយពីមានការអន្តរាគមន៍ពីរថយន្តពន្លត់អគ្គិភ័យ។

ភ្នាក់ងារ Fresh News បានរាយការណ៍ថា សម្រាប់គ្រោះអគ្គិភ័យនេះ បានបំផ្លាញទ្រព្យសម្បត្តិមួយចំនួននៅក្នុងហាង ហើយពេលឆាបឆេះនោះ ម្ចាស់ហាងមិននៅនោះឡើយ។

បើតាមសមត្ថកិច្ច មូលហេតុដែលនាំឲ្យគ្រោះអគ្គិភ័យ គឺបណ្តាលមកពីឆ្លងចរន្តអគ្គិសនី ហើយរថយន្តពន្លត់អគ្គិភ័យពី៥ទៅ៦គ្រឿង របស់សាលាខណ្ឌ និងស្នងការដ្ឋាននគរបាលរាជធានីភ្នំពេញ​ បានជួយអន្តរាគមន៍បាញ់ពន្លត់៕