ទឹកក្រូចវល្លិ៍ ឬដែលយើងនិយមហៅថា Passion ជាទូទៅគឺវាមានរសជាតិជូរបន្តិច អាចធ្វើឱ្យមនុស្សមួយចំនួន មិនសូវចូលចិត្តបរិភោគវាប៉ុន្មានទេ ប៉ុន្តែបើនិយាយពី លក្ខណៈសម្បត្តិវិញ ផ្លែក្រូចវល្លិ៍នេះជាឱសថដ៏ល្អពិសេសមួយប្រភេទ សាកសមសួន បំផុតសម្រាប់អ្នកដែលមានវ័យចំណាស់។
អត្ថប្រយោជន៍សុខភាពរបស់វាចំពោះ មនុស្សវ័យចាស់ បើតាមការិយាល័យមូលនិធិស្រាវជ្រាវ (TRF) បានធ្វើការស្រាវជ្រាវ និងបានបញ្ជាក់យ៉ាងច្បាស់ថា មនុស្សចាស់គួរទទួលទានទឹកផ្លែឈើនេះ ជាប្រចាំប្រសិនជាអាចធ្វើបាន។
វេជ្ជបណ្ឌិត Supachai Watchara នៃមហាវិទ្យាល័យវេជ្ជសាស្ត្រ ក៏បានធ្វើការស្រាវជ្រាវ រកឃើញថា លទ្ធផលនៃទឹកផ្លែក្រូចវល្លិ៍នេះ មានសារធាតុប្រឆាំងអុកស៊ីតកម្ម និងប្រឆាំងនឹងការរលាកឆ្អឹងរបស់មនុស្សចាស់ ហើយវាក៏មានធាតុផ្សំសកម្មពីសារធាតុពណ៌លឿង ដែលបានរកឃើញថា ការពិសាផ្លែឈើនេះ បានរួមចំណែកធ្វើឱ្យ ចំនួននៃវីតាមីនA និងវីតាមីនE គឺមានការកើនឡើង នៅក្នុងរាងកាយកាន់តែច្រើន។ ឯសារធាតុ cytokine ដែលជាសារធាតុបង្កឱ្យរលាក ត្រូវបានកាត់បន្ថយបន្តិចម្តងៗ។
លើសពីនេះទៀត វាជួយបង្កើនបរិមាណនៃសារធាតុប្រឆាំងអុកស៊ីតកម្ម បង្កើតភាពស៊ាំផងដែរជាពិសេស នៅក្នុងមនុស្សដែលមានវ័យចំណាស់គួរពិសា ផ្លែឈើនេះឱ្យបានទៀងទាត់ដើម្បីជំរុញ ដល់ការការពារប្រព័ន្ធភាពស៊ាំក្នុងរាងកាយ។
ចំណែកឯមនុស្សដែលមានវ័យក្មេង ក៏អាចទទួលទានទឹកផ្លែក្រូចវល្លិ៍នេះ បានតាមចំណង់ចំណូលចិត្តផងដែរ ព្រោះវាក៏មានផ្ទុកនូវវីតាមីន ជួយចិញ្ចឹមកែវភ្នែក ពិសេសគឺផ្ទុកវីតាមីនC ដែលជួយធ្វើឱ្យស្បែកស្អាត កាត់បន្ថយស្នាមជ្រីវជ្រួញ និងកាត់បន្ថយជាតិខ្លាញ់ក្នុងឈាមបានយ៉ាងល្អ។
ជាចុងក្រោយ ក៏ចង់រំលឹកដាស់តឿនផងដែរថា ប្រសិនបើអ្នកទទួលទានទឹកក្រូចវល្លិ៍ ឬ Passion គួរកុំដាក់បន្ថែមនូវស្ករ ឬទឹកស៊ីរ៉ូច្រើនហួសហេតុពេក ដើម្បីបង្កើនជាតិផ្អែម ហើយបើអ្នកពិតជាពិបាកពិសា ដោយសារតែវាមានរសជាតិជូរខ្លាំង គួរបន្ថែមស្ករសចូលបន្តិចបានហើយ ដើម្បីទទួលបាននូវផលប្រយោជន៍ យ៉ាងពេញលេញពីផ្លែក្រូចវល្លិ៍ និងម្យ៉ាងគឺដើម្បីធានាថា គ្មានការភ័យខ្លាចពីជម្ងឺដែលតាមមកពេលក្រោយព្រោះការបន្ថែមជាតិស្ករ ឬផលប៉ះពាល់ពីសារជាតិផ្សេងៗទៀត៕
ប្រភព៖ បរទេស
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
