រាជធានីភ្នំពេញ ៖ សេចក្តីរាយការណ៍គិតត្រឹមវេលាម៉ោង០១ និង២០នាទីរសៀលថ្ងៃទី១៨ សីហា ២០១៦ នេះ សមត្ថកិច្ចចម្រុះ ដែលឡោមព័ទ្ធចាប់បក្រុមចោរប្លន់បានចំនួន៣នាក់ ស្ថិតក្នុងបុរីសន្តិភាព២ ក្នុងភូមិដំណាក់ត្រយឹង សង្កាត់ចោមចៅ ខណ្ឌពោធិ៍សែនជ័យ ។
ប្រភពឱ្យដឹងថា ជនសង្ស័យទាំង៣នាក់ ១-ឈ្មើសុខ រិទ្ធី អាយុ២៦ឆ្នាំ ២-ឈ្មោះដាវីត អាយុ១៨ឆ្នាំ និង៣-នារីឈ្មោះឃុន ផៃ អាយុ១៦ឆ្នាំ (ជាសង្សារជនឈ្មោះដាវីត) ដែលខណៈពេលនេះ កម្លាំងកំពុងស្រាវជ្រាវបន្តចាប់បក្សពួកទៀតផងដែរ ។
គួររំលឹកថា កាលពីវេលាម៉ោង១១ និង៣០នាទីថ្ងៃត្រង់ថ្ងៃទី១៨ ថ្ងៃដដែលនេះ សមត្ថកិច្ចចម្រុះកំពុងឡោមព័ទ្ធចាប់ក្រុមចោរប្លន់នៅក្នុងបុរីសន្តិភាព២ ស្ថិតនៅភូមិដំណាក់ត្រយឹង សង្កាត់ចោមចៅ ខណ្ឌពោធិសែនជ័យ ។
សេចក្តីរាយការណ៍បន្តថា ការឡោមព័ទ្ធចាប់ក្រុមចោរប្លន់នៅទីតាំងខាងលើនេះ ធ្វើឡើងបន្ទាប់ពីសមត្ថកិច្ចចាប់ជនសង្ស័យជាចោរប្លន់បានម្នាក់ ក្នុងចំណោម៦នាក់នៅព្រឹកថ្ងៃព្រហស្បតិ៍ដដែល ក្រោយពីពួកគេធ្វើសកម្មភាពវាយប្លន់ម៉ូតូ C125 មួយគ្រឿង ព៌ណខ្មៅ ពាក់ស្លាកលេខភ្នំពេញ 1CC 0635 ពីយុវជនឈ្មោះម៉ៅ ខួច អាយុ១៨ឆ្នាំ រស់នៅភូមិដុង ឃុំព្រៃស្តៅ ស្រុកព្រៃកប្បាស ខេត្តតាកែវ តែត្រូវបានសមត្ថកិច្ចដេញតាមយកម៉ូតូមកវិញ ។
សកម្មភាពវាយប្លន់ម៉ូតូនោះកើតឡើង កាលពីវេលាម៉ោងប្រមាណ១រំលងអធ្រាត្រឈានចូលថ្ងៃទី១៨ សីហា ២០១៦ នៅចំណុចភូមិស្រែជម្រៅ សង្កាត់ចោមចៅ ខណ្ឌពោធិសែនជ័យ ខណៈជនរងគ្រោះជិះម៉ូតូចេញពីក្លឹបកម្សាន្ត« មីតណាយ» ស្ថិតនៅតាមបណ្តោយផ្លូវវេងស្រេង ។
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន ក្រុមចោរប្លន់ប្រដាប់អាវុធចំនួន៦នាក់ ប្រដាប់ដោយកាំភ្លើងធ្វើសកម្មភាព៣ដើម រថយន្តមួយគ្រឿង ដែលតែងតែប្លន់កក្រើកនៅតាមបណ្តាខេត្តនោះ ហើយត្រូវបានបង្ក្រាបនៅទឹកដីឃុំក្រាំងយ៉ូវ ស្រុកស្អាង ខេត្តកណ្តាលនោះ ត្រូវបាននាយកដ្ឋាននគរបាលព្រហ្មទណ្ឌក្រសួងមហាផ្ទៃ បង្ហាញមុខនៅព្រឹកថ្ងៃទី៧ ខែសីហា ឆ្នាំ២០១៦នេះ មុនបញ្ជូនទៅកាន់តុលាការចាត់ការបន្តទៀត តាមនីតិវិធី។
យោងតាមរបាយការណ៍របស់នគរបាលនាយកដ្ឋានព្រហ្មទណ្ឌ ក្រសួងមហាផ្ទៃ បានបង្ហាញថា ក្រុមចោរទាំងនេះ បានធ្វើសកម្មភាពប្លន់ចំនួន១០លើកមកហើយ នៅខេត្តចំនួន៧ រួមមាន ខេត្តព្រៃវែង ២លើក ខេត្តកំពង់ឆ្នាំង ២លើក ខេត្តតាកែវ២លើិក ខេត្តក្រចេះ១លើក ខេត្តកំពង់ចាម១លើក ខេត្តត្បូងឃ្មុំ១លើក និងខេត្តកណ្តាល១លើក។
របាយការណ៍បានបញ្ជាក់ទៀតថា ការបង្ក្រាបក្រុមចោរប្លន់ទាំងនេះ បានធ្វើឡើងមុនពេលដែលពួកវាគ្រោងចូលប្លន់ នៅផ្ទះលក់មាស លក់សាំង និងផ្ទេរលុយ Wing តាមផ្លូវចូលវត្តធន់មន្ត កាលពីថ្ងៃទី៤ ខែសីហា ឆ្នាំ២០១៦ ដោយធ្វើឡើងនៅឃុំក្រាំងយ៉ូវ ស្រុកស្អាង ហើយក្នុងប្រតិបត្តិការនោះ បានបាញ់ម្នាក់បណ្តាលឲ្យបាក់ជើងផងដែរ។
ប្រតិបត្តិការបង្ក្រាបក្រុមចោរប្លន់ប្រដាប់អាវុធខាងលើនេះ បានធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ នេត សាវឿន អគ្គស្នងការនគរបាលជាតិ អគ្គស្នងការរងនគរបាលជាតិទទួលផែនយុត្តិធម៌ ប្រធាននាយកដ្ឋានកណ្តាលនគរបាលយុត្តិធម៌ នាយកដ្ឋាននគរបាលព្រហ្មទណ្ឌ និងកម្លាំងនគរបាលតាមបណ្តាខេត្តមួយចំនួនទៀត។
ខាងក្រោមនេះគឺជាសង្ខេបចម្លើយសារភាព សកម្មភាពប្លន់ ១០លើក ០៧ ខេត្តរួមមាន៖
១. ខេត្តព្រៃវែង ០២លើក
-(ថ្ងៃទី២៧.០៣.២០១៥ ភូមិដូនយូ ឃំុ ជីខ្លា ស្រុកស្វាយអន្ទរ ខេត្តព្រៃវែង)
-(ថ្ងៃទី២៩.០៤.២០១៦ ភូមិព្រែកពោធិ ឃំុ រំលិច ស្រុកសីុធរកណ្ដាល ខេត្តព្រៃវែង)
២. ខេត្តកំពង់ឆ្នាំង ០២លើក
-(ថ្ងៃទី២១.១០.២០១៤ ផ្សារព្រៃខ្មែរ ភូមិ ព្រៃខ្មែរ ឃំុរលាផ្អៀ ស្រុករលាផ្អៀ ខេត្តកំពង់ឆ្នាំង)
-(ថ្ងៃទី៣១.០៧.២០១៦ ភូមិរ៉ា ឃំុត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង)
៣. ខេត្តតាកែវ ០២លើក
-(ថ្ងៃទី០៥.០៥.២០១៥ ភូមិ ឃំុ ស្រុកទ្រាំង ខេត្តតាកែវ)
-(ថ្ងៃទី០៩.០៧.២០១៥ ភូមិសីហា ឃំុ ចំបក់ ស្រុកបាទី ខេត្តតាកែវ)
៤. ខេត្តក្រចេះ ០១លើក
(ថ្ងៃទី២៤.០៧.២០១៦ ភូមិត្រពាំងស្រែ ឃំុ ២ធ្នូ ស្រុកស្នួល ខេត្តក្រចេះ)
៥. ខេត្តត្បូងឃ្មុំ ០១លើក
(ថ្ងៃទី២៨.០៧.២០១៦ ភូមិដា ឃំុ ស្រុកមេមត់ ខេត្តត្បូងឃ្មំុ)
៦.ខេត្តកំពង់ចាម ០១លើក
(ថ្ងៃទី២៦.០៥.២០១៦ ភូមិពង្រ ឃំុ ស្ដើងជ័យ ស្រុកជើងព្រៃ ខេត្តកំពង់ចាម)
៧. ខេត្តកណ្ដាល ០១លើក, បង្ក្រាប ចាប់ខ្លួន ០៦នាក់ ពេលកំពុងដើរមើលរកទីតាំងប្លន់
(ថ្ងៃទី០៤.០៨.២០១៦ ភូមិអំពិលលាស់ ឃំុ ក្រាំងយ៉ូង ស្រុកស្អាង ខេត្តកណ្ដាល)៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
