អេស្ប៉ាញ៖ កាលពីយប់មិញនេះ ក្លិបបាល់ទាត់កំពូលរបស់អេស្ប៉ាញ Barcelona បានបំបាក់ Sevilla ៣-០ លើកពាន Spanish Super Cup បានសម្រេច ដោយសរុបលទ្ធផលទាំងពីរជើង Barcelona យកឈ្នះ ៥-០ ។
ទាក់ទងនឹងការប្រកួតកាលពីយប់មិញនេះ គឺជាការប្រកួតវគ្គផ្តាច់ព្រ័តជើងទីពីរនៃពានរង្វាន់ Spanish Super Cup ដែលប្រព្រឹត្តឡើងនៅឯកីឡដ្ឋាន Camp Nou ដែលជាទឹកដីរបស់ Barcelona ។
Barcelona គឺជាក្រុមដែលមានប្រៀបជាងគេ កាលពីយប់មិញ ដោយមិនបានឲ្យគូប្រកួតស៊ុតចូលវិញបាន សូម្បីមួយគ្រាប់ ពោលនៅក្នុងតង់ទី១ Barcelona បាននាំមុខមុន នៅនាទី១០ ដោយកីឡាករ Arda Turan។ ចូលមកដល់នាទី៣៣ Sevilla សឹងតែរកបានគ្រាប់បាល់តាមស្មើទៅហើយ ប៉ុន្តែកីឡាករ Vicente Iborra ខកខានស៊ុតមិនចូលបាល់ពិន័យប៉េណាល់ទី១១ម៉ែត្រ ធ្វើឲ្យលទ្ធផលតង់ទីមួយ Barcelona នាំមុខ ១-០ ។
ចូលដល់តង់ទី២ ប្រកួតទើបតែបាន២នាទី ពោលគឺនាទី៤៧ Arda Turan បានស្វែងរកគ្រាប់បាល់ឲ្យ Barcelona មួយគ្រាប់ទៀតធ្វើឲ្យក្រុមនាំមុខ ២-០។ ចូលមកដល់នាទី៥៦ Barcelona បន្ថែមបានមួយគ្រាប់ទៀត ស៊ុតដោយកីឡាករ Lionel Messi កាន់តែធ្វើឲ្យ Barcelona កក់ក្តៅនូវជ័យជំនះ ដែលលទ្ធផល ៣-០ នេះរក្សារហូតដល់បញ្ចប់ការប្រកួត។
សូមបញ្ជាក់ផងដែរថា គ្រាប់បាល់មួយគ្រាប់របស់ Messi កាលពីយប់មិញនេះ គឺជាគ្រាប់ទី១០០ របស់រូបគេ ក្រោមការដឹកនាំដោយលោកគ្រូបង្វឹក Luis Enrique និងថែមទាំងជាពានទី២៩ របស់រូបគេជាមួយក្លិប Barcelona ទៀតផង។
គួររំលឹកផងដែរថា កាលពីជើងទីមួយនោះ Barcelona ក៏បានយកឈ្នះ Sevilla មួយលើកហើយដែរ ក្នុងលទ្ធផល ២-០ ដូច្នេះគួបផ្សំនឹងលទ្ធផល ៣-០ កាលពីយប់មិញទៀត ធ្វើឲ្យ Barcelona យកឈ្នះ Sevilla ៥-០ ក្នុងលទ្ធផលសរុបទាំងពីរជើង និងលើកពាន Spanish Super Cup មុននឹងត្រៀមបើករដូវកាលថ្មី៕
ប្រភព៖ Dailymail
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
