ខេត្តកណ្ដាល ៖ បុរសម្នាក់ត្រូវរថយន្តធុនយក្សសណ្ដោងកន្ទុយរ៉ឺម៉កកិន បណ្ដាលឱ្យខ្ទេចមួយកំណាត់ខ្លួនចុះក្រោម ដោយមិនសង្ឃឹមថារស់នោះទេ ខណៈគាត់ជិះម៉ូតូ១គ្រឿងធ្វើដំណើរតាមផ្លូវ ហើយទាក់ដៃចង្កូតជាមួយម៉ូតូ១គ្រឿងទៀត ក្នុងទិសដៅស្រប គ្នា ដួលខ្ទាតចូលក្រោមកង់រថយន្តនោះដែលបើកមកស្របគ្នាដែរ ហើយអ្នកបើករថយន្តបានចុះរត់បាត់ស្រមោល ។
ហេតុការណ៍នេះកើតឡើង កាលពីវេលាម៉ោង០៦ និង៤០នាទីព្រឹកថ្ងៃទី៩ សីហា ២០១៦ ស្ថិតនៅលើកំណាត់ផ្លូវជាតិលេខ៤ ចន្លោះគីឡូម៉ែត្រលេខ២១ និងលេខ២២ នៅត្រង់ចំណុចភូមិត្រពាំងក្រសាំង ឃុំបែកចាន ស្រុកអង្គស្នួល ខេត្តកណ្ដាល ។
បុរសរងគ្រោះឈ្មោះម៉ៅ សុជាតិ អាយុ២៦ឆ្នាំ ជាកម្មកសំណង់ ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ 1CI-5854 ហើយ ជនរងគ្រោះបានពាក់មួកសុវត្ថិភាពត្រឹមត្រូវ និងម៉ូតូរបស់គេ ក៏មានកញ្ចក់ត្រឹមត្រូវដែរ ។ ចំណែកម៉ូតូ ដែលបានប៉ះដៃចង្កូតជាមួយម៉ូតូជនរងគ្រោះនោះ មិនស្គាល់ម៉ាកឡើយបានបើកគេចទៅបាត់ ។ រីឯរថយន្តដែលបានកិនជនរងគ្រោះបណ្ដាលឱ្យរងរបួសនោះម៉ាក អាំងទែរណាសូណាល់ ពណ៌ត្រួយចេក ពាក់ស្លាកលេខ ព្រះសីហនុ 3A-3405 ។
ប្រភពបន្តថា នៅមុនពេលកើតហេតុ ជនរងគ្រោះជិះម៉ូតូ១គ្រឿងខាងលើ ធ្វើដំណើរក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុខាងលើ បានប៉ះដៃចង្កូតជាមួយម៉ូតូ១គ្រឿងទៀតមិនស្គាល់ម៉ាក បណ្ដាលឱ្យដួលខ្ទាតចូលក្រោមកង់មុខខាង ស្ដាំរថយន្តនោះ កិនបណ្ដាលឱ្យខ្ទេចមួយកំណាត់ក្រោមតែម្ដង ។ ជនរងគ្រោះរងរបួសយ៉ាងធ្ងន់ធ្ងរ ដែលមិនសង្ឃឹមថារស់នោះទេ ហើយត្រូវគេបញ្ជូនទៅសង្គ្រោះបន្ទាន់ភ្លាមៗដែរ ។
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន ក្មេងស្រីម្នាក់បានស្លាប់ភ្លាមៗ នៅនឹងកន្លែងកើតហេតុ និងក្មេងប្រុសម្នាក់ទៀតដែលត្រូវជាប្អូនប្រុសបង្កើតបានរងរបួសធ្ងន់ ដោយសាររថយន្តដឹកដីប្រភេទយីឌុបបើកបរក្នុងល្បឿនលឿនបុកនិងកិនពីក្រោយ ក្នុងខណៈពេលដែលក្មេងរងគ្រោះទាំងពីរនាក់កំពុងជិះម៉ូតូ១គ្រឿងឌុបគ្នា និងបើកបរស្របគ្នាជាមួយរថយន្តនោះ។
គ្រោះថ្នាក់ចរាចរណ៍នោះបានកើតឡើងកាលពីវេលាម៉ោង១១ និង៣០នាទីថ្ងៃត្រង់ ថ្ងៃទី០៦ សីហា ២០១៦ នៅលើកំណាត់ផ្លូវលេខ ២១៧ ត្រង់ចំណុចភ្លើងស្តុបផ្សារថ្នល់ កែងនិងផ្លូវព្រៃ.ស ស្ថិតក្នុងភូមិថ្មី សង្កាត់ដង្កោ ខណ្ឌដង្កោ ។
រថយន្តបង្កម៉ាក DONGFENG ពណ៍ស ពាក់ស្លាកលេខ ភ្នំពេញ 3C-7835 ជាប្រភេទរថយន្តយីឌុបដឹកដីរបស់ក្រុមហ៊ុន ទឹកស្អាត បើកបរដោយបុរសម្នាក់ឈ្នោះ អ៊ាម សារ៉ាន់ អាយុ៣២ឆ្នាំ មានទីលំនៅផ្ទះជួល ភូមិទ្រា៣ សង្កាត់ស្ទឹងមានជ័យ ខណ្ឌមានជ័យ និងមានស្រុកកំណើតនៅភូមិចិន្តា.ខ ឃុំស្ពឺ.ខ ស្រុកបាភ្នំ ខេត្តព្រៃវែង ។ ដោយឡែកក្មេងដែលជាជនរងគ្រោះស្លាប់នៅនឹងកន្លែងនោះឈ្មោះ ហេន ម៉ារីយ៉ា ភេទស្រី អាយុ១៥ឆ្នាំ ជាសិស្សរៀនថ្នាក់ទី៧ នៃអនុវិទ្យាល័យដង្កោ និងប្អូនប្រុសបង្កើតរបស់នាង រងរបួសធ្ងន់ឈ្មោះ ហេន សេរីសូនី អាយុ៣ឆ្នាំ ទាំង២នាក់បងប្អូននេះ មានទីលំនៅក្នុងភូមិម័ល សង្កាត់ដង្កោ ខណ្ឌដង្កោ ។
បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ទៀតថា ជនរងគ្រោះទាំងពីរនាក់បងប្អូន ត្រូវជាចៅបង្កើតរបស់លោកស្រី សឿង សេរី ចៅសង្កាត់រងសង្កាត់ដង្កោ ជិះម៉ូតូ ម៉ាក ស៑ុយហ្ស៊ុុយគី ឡែត ពណ៍ទឹកប្រាក់លាយ.ស ពាក់ស្លាកលេខ ភ្នំពេញ 1FJ-0135 ។
តាមប្រភពបានឲ្យដឹងថា នៅមុនពេលកើតហេតុ រថយន្តបង្កបានបើកបរក្នុងល្បឿនលឿនក្នុងទិសដៅពីជើងទៅត្បូង ប្រដេញតាមពីក្រោយម៉ូតូក្មេងប្រុសស្រីទាំងពីរនាក់ ដែលកំពុងបើកបរស្របគ្នានៅខាងមុខ ។ លុះពេលទៅដល់ត្រង់ចំណុចកើតហេតុខាងលើ ដែលជាចំណុចភ្លើងស្តុបមានមនុស្សធ្វើចរាចរណ៍ច្រើន ម៉ូតូបានបន្ថយល្បឿន ចំណែករថយន្តបង្កមិនបានបន្ថយល្បឿននោះទេ ក៏បានបុកម៉ូតូពីក្រោយទាំងកំរោល និងកិនក្មេងស្រីរងគ្រោះចំពាក់កណ្តាលខ្លួន បណ្តាលឲ្យស្លាប់ភ្លាមៗនៅនឹងកន្លែង ចំណែកប្អូនប្រុសរបស់នាងរងរបួសធ្ងន់។
ក្រោយពេលកើតហេតុ នគរបាលបានចុះទៅកាន់កន្លែងកើតហេតុ និងបានបញ្ជូនក្មេងប្រុសដែលរងរបួសទៅសង្គ្រោះនៅមន្ទីរពេទ្យ ។ ចំណែកអ្នកបើកបររថយន្ត ត្រូវបានកម្លាំងនគរបាលចរាចរណ៍ខណ្ឌដង្កោ ដែលប្រចាំការនៅចំណុចស្តុបផ្សារថ្នល់បត់នោះចាប់បានក្នុងខណៈពេលប្រុងរត់គេចខ្លួន ។ បន្ទាប់មកបានប្រគល់ជននោះ រួមជាមួយរថយន្តនិងម៉ូតូ ទៅឲ្យនគរបាលការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីចាត់ការបន្ត៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
