ស្លាប់រង្គាល! រយៈពេលត្រឹម១ខែ មនុស្ស៣០០នាក់ត្រូវបានសម្លាប់ ខណៈប្រធានាធិបតីហ្វីលីពីន ប្រកាសសង្គ្រាម ប្រឆាំងគ្រឿងញៀន

ហ្វីលីពីន៖ ប្រធានាធិបតីហ្វីលីពីន លោក Rodrigo Duterte បានឈ្នះឆ្នោតឡើងកាន់អំណាច កាលពីខែឧសភា ឆ្នាំ២០១៦ កន្លងទៅ បានធ្វើឲ្យមានការកែទម្រង់ច្បាប់ជាច្រើនដោយក្នុងនោះ ពាក់ព័ន្ធនឹងបញ្ហាគ្រឿងញៀន លោកបានបញ្ជាឲ្យក្រុមមន្រ្តីប៉ូលិស បង្ក្រាបដោយប្រើធម៌ក្តៅតែម្តង  រហូតដល់លោកត្រូវបានគេប្រសិទ្ធនាមឲ្យថា “The Punisher” ឬមានន័យថា "អ្នកដាក់ទណ្ឌកម្ម" ទៀតផង។

រូបភាពជាច្រើនសន្លឹក នៃការបាញ់ប្រហារសម្លាប់រង្គាល តាមដងផ្លូវលើឈ្មួញជួញដូរ និងប្រើប្រាស់គ្រឿងញៀនខុសច្បាប់ ត្រូវបានសារព័ត៌មានចុះផ្សាយ ។

រូបភាពទាំងនោះ បង្ហាញថា មនុស្សមួយចំនួនដែលភាគច្រើនជាមនុស្សប្រុស ត្រូវបានបាញ់សម្លាប់នៅនឹងកន្លែង   ខ្លះរបូតនៅសល់តែខោក្នុង និងថែមទាំងមានចងដៃចងជើងរបស់ពួកគេទៀតផង។ អ្នកខ្លះទៀតផ្ទៃមុខពោរពេញទៅដោយឈាម ហើយសម្លៀកបំពាក់ មានប្រឡាក់ឈាមជោកជាំ ដេកត្រាំក្នុងថ្លុកឈាមផងដែរ។ ខណៈដែលប្រពន្ធ និងគ្រួសារសពមានក្តីឈឺចាប់ជាទីបំផុត ដោយលើកឡើងថា ការប្រហារជីវិតដែលធ្វើឡើង ដោយក្រុមមន្រ្តីប៉ូលិស ពិតជាអំពើអយុត្តិធម៌ណាស់ ដោយគ្មានការកាត់ទោស ឲ្យបានត្រឹមត្រូវតាមផ្លូវច្បាប់នោះទេ។

ប្រភពបន្តថា ការសម្លាប់យ៉ាងរង្គាលទៅលើឈ្មួញគ្រឿងញៀនខុសច្បាប់ ពេញដងផ្លូវ ប្រៀបបីដូចជាសង្គ្រាមប្រឆាំងគ្រឿងញៀន  រាប់គិតចាប់ពីដើមខែកក្កដានេះតែម្តង ហើយចំនួនអ្នកស្លាប់ដោយសារតែប្រត្តិបត្តិការក្តៅនេះ  មានជាង ៣០០នាក់ហើយចំនួននេះនឹងអាចកើនឡើងទៀតផងដែរ។

មន្រ្តីប៉ូលិសបានអះអាងបញ្ជាក់ថា ចាប់តាំងពីប្រធានាធិបតី លោក Rodrigo Duterte ឡើងកាន់អំណាចមក  ការសម្លាប់ទៅលើជនសង្ស័យប្រើប្រាស់គ្រឿងញៀន  មានចំនួនច្រើន។

យោងតាមរបាយការណ៍ក្នុងស្រុក បានឲ្យដឹងថា យ៉ាងហោចណាស់ ឈ្មួញគ្រឿងញៀនខុសច្បាប់ ៤៣,០០០នាក់ ត្រូវបានបង្ក្រាប និងគ្រឿងញៀនប្រភេទ Shabu ទម្ងន់ ៣០០គីឡូក្រាម ដែលមានកម្រិតញៀន មេតាហ្វេតាមីនខ្ពស់ ត្រូវបានមន្រ្តីជំនាញរឹបអូសបានពីក្រុមឈ្មួញផងដែរ។

គូសបញ្ជាក់ដែរថា លោកប្រធានាធិបតី Duterte នៃប្រទេសហ្វីលីពីន បានព្រមានទាក់ទងនឹង ការបាញ់បង្ហូរឈាមនេះថា គឺជា “សង្គ្រាមគ្រឿងញៀន” ដែលជាផ្នែកមួយរបស់រដ្ឋាភិបាល ត្រូវចូលរួមក្នុងការលុបបំបាត់ចោល ៕ 

ទស្សនាបណ្តុំរូបភាព ខាងក្រោមទាំងអស់គ្នា៖

ប្រភព៖ បរទេស