រាជធានីភ្នំពេញ ៖ ក្រុមក្មេងស្ទាវ២ក្រុម មានគ្នាប្រមាណជាជិត១០នាក់ ប្រដាប់ដោយដាវសាមូរ៉ៃ និងដុំថ្មគ្រប់ដៃ បានជិះរថយន្ត និងជិះម៉ូតូជាច្រើនគ្រឿង ធ្វើសកម្មភាពដេញវាយគ្នា តាមដងផ្លូវយ៉ាងសាហាវ ហើយរថយន្តបើកបំបុក កិនពីលើម៉ូតូមួយគ្រឿងបណ្តាលឱ្យ ជាប់នៅខាងក្រោម បង្កឱ្យភ្ញាក់ផ្អើលទាំងព្រឹក ហើយត្រូវកម្លាំងសមត្ថកិច្ច ខណ្ឌចំការមន ចុះមកធ្វើការដោះស្រាយ បែរទៅជារឿងគ្រោះថ្នាក់ចរាចរណ៍ទៅវិញ ។
ហេតុការណ៍នេះកើតឡើង កាលពីវេលាម៉ោង ០៥ និង៤៥នាទីព្រឹកថ្ងៃទី២២ កក្កដា ២០១៦ ស្ថិតនៅចំណុចផ្លូវលេខ២៩៤ កែងផ្លូវលេខ ២១ ក្នុងសង្កាត់ទន្លេបាសាក់ ខណ្ឌចំការមន ។
តាមប្រភពពី ប្រជាពលរដ្ឋម្នាក់ឱ្យដឹងថា រថយន្តបង្កគឺម៉ាកកាមរីបាឡែន បិទស្កុតពណ៌.សលាយខ្មៅ ពាក់ស្លាកលេខភ្នំពេញ២AK-៤២២១ បើកបរដោយយុវជនមិន ស្គាល់អត្តសញ្ញាណម្នាក់ ។ ចំណែកម៉ូតូរងគ្រោះ ម៉ាកវ៉េវអាល់ហ្វា ពណ៌ក្រហម ពាក់ស្លាកលេខភ្នំពេញ១BC-៣៣៨៩ ជិះគ្នា៣នាក់ ។
មុនពេលកើតហេតុ គេឃើញរថយន្តម៉ាកកាមរីបាឡែនខាងលើ ដោយមានម៉ូតូជាបក្សពួកចំនួន២គ្រឿងទៀត ប្រដាប់ដោយខ្សែ
ក្រវាត់ក្នុងដៃ និងមានគ្នាពី៥ ទៅ៦នាក់ជិះប្រដេញម៉ូតូម៉ាកវ៉េវ របស់ក្រុមយុវជនមួយក្រុមទៀត ដែលមានជិះគ្នា៣នាក់ ប្រដាប់ដោយដាវសាមូរ៉ៃមួយដើមផង ដោយមានសំឡេងស្រែកខ្លាំងៗ ។
ប្រភពដដែលបន្តថា លុះមកដល់ចំណុចខាងលើ ដោយភាពស្លន់ស្លោ ម៉ូតូរបស់ក្រុមយុវជនទាំង៣នាក់នោះ ក៏ជ្រុលចង្កូតទៅប៉ះ រថយន្តម៉ាកឡិចស៊ីស មួយគ្រឿងបណ្តាលឱ្យដួល ស្របពេលនោះ រថយន្តរបស់គូបដិបក្សរបស់ខ្លួនបើកមកទាន់ បំបុកនិងកិនពីលើ ជាប់ខាងក្រោមតែម្តង ។ ហើយពួកគេក៏បើកឆាកប្រយុទ្ធគ្នាប្រាវ និងបណ្តាលឱ្យរថយន្ត បែកកញ្ចក់មុខ-ក្រោយរងការខូចខាតយ៉ាងដំណំ ។ ពួកគេក៏នាំគ្នារត់គេចខ្លួនចោលបាត់អស់ តែមិនបណ្តាលឱ្យមានភាគី ណាម្នាក់រងរបួសឡើយ ។
តាមប្រភពមន្ត្រីនគរបាល មូលដ្ឋានឱ្យដឹងថា ហេតុការណ៍នេះ គឺកើតឡើងក្រោយពីពួកគេមានជម្លោះគ្នា និងដេញវាយគ្នាតាំងពី នៅក្បែររបងអតីតឌ្រីមលែនឌ៍ ក្នុងសង្កាត់ចតុមុខ ខណ្ឌដូនពេញមកម្ល៉េះ ។ លុះមកដល់ចំណុចខាងលើ ដោយមិនបានដឹងពីរឿងហេតុច្បាស់ ក៏ធ្វើការអនុវត្តត្រឹមតែ ជារឿងគ្រោះថ្នាក់ចរាចរណ៍ តែប៉ុណ្ណោះ ។
ក្រោយពេលកើតហេតុ កម្លាំងសម្ថកិច្ច ក៏បានចុះមកដល់ ឃើញត្រឹមតែរថយន្តបុក និងកិនម៉ូតូពីលើនោះ និងមិនមានមនុស្សណាម្នាក់រងគ្រោះ ឬភាគីណាមួយនៅនឹងកន្លែងកើតហេតុ ក៏ធ្វើការវាស់វែង និងយកទាំងរថយន្ត និងម៉ូតូបញ្ជូនយកទៅកាន់អធិការដ្ឋាននគរបាលខណ្ឌចំការមន ដោយមានតែតំណាងភាគី ទាំងសងខាងតែប៉ុណ្ណោះ ចូលខ្លួនមកធ្វើការដោះស្រាយ និងបញ្ចប់ទៅជារឿងគ្រោះថ្នាក់ចរាចរណ៍ទៅវិញ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]