(តាកែវ)៖ ប្ដីកំណាចចិត្តជាសត្វតិរច្ឆានម្នាក់ បានវៃជាន់កប្រពន្ធរហូតស្លាប់ចោលកូន ៤នាក់ ព្រោះខឹងប្រពន្ធមិនឲ្យលុយពីរពាន់រៀល ទៅទិញស្រាសផឹក។ ហេតុការណ៍អំពើហឹង្សាក្នុងគ្រួសារនេះ បានកើតឡើងនៅយប់ថ្ងៃទី២៨ ខែមិថុនា ឆ្នាំ២០១៦ ស្ថិតក្នុងផ្ទះជនរងគ្រោះ នៅភូមិព្រៃតាម៉ៅ ឃុំគីរីចុងកោះ ស្រុកគីរីវង់ ខេត្តតាកែវ។
លោក យុគ សារ៉ាត់ អធិការនគបាលស្រុកគីរីវង់ បានឲ្យដឹងថា ជនសង្ស័យ ដែលវៃជាន់ករប្រពន្ធទាល់តែស្លាប់នេះ ឈ្មោះ វេត សាក់ អាយុ៣៦ឆ្នាំ រីឯនារីរងនូវអំពើហិង្សាជាប្រពន្ធឈ្មោះ ម៉ុស ស្ដើង អាយុ ៣០ឆ្នាំ។
លោកអធិការស្រុកគីរីវង់ បានបន្តថា ជនសង្ស័យតែងតែផឹកស្រាស្ទើររាល់ថ្ងៃ ហើយតែងតែប្រើអំពើហឹង្សាដាក់ប្រពន្ធ ដោយក្នុងនោះសមត្ថកិច្ច បានហៅអប់រំជាច្រើនលើកមកហើយ។ ដោយឡែកនៅថ្ងៃកើតហេតុ ជនសង្ស័យបានផឹកស្រាច្រៀងខារ៉ាអូខេ នៅផ្ទះតាំងពីថ្ងៃ លុះផឹកដល់ម៉ោង ១០យប់ ក៏សុំលុយប្រពន្ធ២ពាន់រៀល ទិញស្រាសផឹកបន្ត ក៏ប៉ុន្តែប្រពន្ធប្រាប់ថា គ្មានលុយ ពេលនោះជនសង្ស័យខឹង ក៏ស្ទុះទៅវ៉ៃជាន់ករបណ្ដាលឲ្យស្លាប់ភា្លមៗនៅកន្លែងកើតហេតុតែម្ដង។
ក្រោយពេលកើតហេតុ កូនស្រីរបស់ជនរងគ្រោះ បានឃើញម្ដាយដេកស្ដូកស្ដឹង ក៏បានរត់ទៅប្រាប់មេភូមិ ក្រោយមកបានមេភូមិបានទាក់ទង ទៅសមត្ថកិច្ចឲ្យមកឃាត់ខ្លួន ជនសង្ស័យតែម្ដង។
លោកអធិការ បានបន្ថែមថា គ្រូសារនេះជាគ្រូសារក្រីក្រ នៅក្នុងភូមិដែលមានកូន ៤នាក់នៅក្នុងបន្ទុក ហើយអ្វីដែលគួរឲ្យខ្លោចផ្សារបំផុតនោះ គឺកូនប្រុសរបស់ស្រ្តីរងគ្រោះ អាយុទើបតែ ១ខួបប៉ុណ្ណោះ ត្រូវការម្ដាយបំបៅ តែពេលនេះម្ដាយបានស្លាប់ចោលបាត់ទៅហើយ។
លោកអធិការស្រុកគីរីវង់ បានជួយរៀបចំពិធីបុណ្យសព និងបានផ្ដល់អង្ករ ២បាវ មី ២កេះ និងថវិកា ១០ម៉ឺនរៀល។ ជាចុងក្រោយលោក ក៏បានសំណូមពរឲ្យសម្បុរសជននានា ជួយគ្រួសារដ៏កម្សត់នេះ ព្រោះគ្មានអ្នកទីពឹងទៀតទេ ម្ដាយក៏ស្លាប់ ឪពុក៏ជាប់គុកទៀត៕
ប្រភព៖ Fresh News
កំណត់ហេតុខ្មែរឡូត៖ ជុំវិញករណីអំពើហិង្សានេះ ក្រលេកមកមើលករណីមួយទៀត គឺ ជនសង្ស័យជាខ្មែរឥស្លាមម្នាក់ ដែលរងការចោទថា បានប្រើហិង្សាមកលើប្រពន្ធរហូតដល់ស្លាប់ ក្រោយពីនាំទៅព្យាបាល មានរយៈពេលជាច្រើនថ្ងៃមកនោះ ។ កាលពី ព្រឹកថ្ងៃទី០២ ខែមិថុនា កន្លងទៅ ត្រូវតុលាការខេត្តសម្រេច ធ្វើការឃុំខ្លួននៅពន្ធនាគារខេត្ត បើទោះបីជាជននេះ មិនព្រមសារភាពទោស កំហុសយ៉ាងណាក៏ដោយ ដោយអះអាងពីគ្រូពេទ្យថា ការស្លាប់របស់ស្រី្ត ជាប្រពន្ធគឺបណ្តាល មកពីជំងឺពុកឆ្អឹង។
ជនសង្ស័យដៃដល់ជាប្តីដែលរងការចោទថា បានវាយសម្លាប់ ប្រពន្ធនោះឈ្មោះ សា កក អាយុ៤៥ឆ្នាំ ជនជាតិខ្មែរឥស្លាម មានទីលំនៅឃុំពង្រ ស្រុកឆ្លូង ត្រូវបាននគរបាលព្រហ្មទណ្ឌឃាត់ខ្លួនកាលពីថ្ងៃទី០១ ខែមិថុនា ទៅតាមបណ្តឹងរបស់ ក្រុមគ្រួសារស្ត្រីជាប្រពន្ធ ដែលបានប្តឹងមកតុលាការ។ ជននេះក៏ត្រូវបានចៅក្រម ស៊ើបសួរសាលាដំបូងខេត្ត លោក រស់ សាម៉ាឌី សម្រេចការដាក់ឃុំបណ្តោះអាសន្នក្រោមការចោទប្រកាន់ពីបទ ហិង្សាដោយចេតនា មានស្ថានទម្ងន់ទោស។នគរបាលព្រហ្មទណ្ឌឲ្យដឹងថា ស្ត្រីរងគ្រោះជាប្រពន្ធឈ្មោះ មីន ស៊ីម៉ាស អាយុ៤២ឆ្នាំ ជាស្ត្រីមេម៉ាយកូនពីរ និងបានមកយកជនសង្ស័យជាប្តីក្រោយ ក្នុងអំឡុងរយៈពេលប៉ុន្មាន ឆ្នាំមុននេះ។
ស្ត្រីរងគ្រោះបានស្លាប់កាលពីថ្ងៃទី៣១ ខែឧសភា បន្ទាប់ពីកើតមានអាការៈធ្ងន់ធ្ងរ និងបានបញ្ជូនទៅសង្គ្រោះ នៅមន្ទីរពេទ្យវៀតណាម។ បើតាមការឲ្យដឹងពីសាច់ញាតិរបស់ស្ត្រីរងគ្រោះបានអះអាងថា ស្ត្រីរងគ្រោះបានរងការប្រើហិង្សា ពីបុរសជាប្តីកាលពីថ្ងៃទី១៣ខែឧសភា បណ្តាលឲ្យរងរបួសធ្ងន់។ ក្រោយពីបង្កហិង្សារួចជនសង្ស័យជាប្តីដៃដល់បាននាំស្ត្រី រងគ្រោះជាប្រពន្ធ ទៅព្យាបាលជំងឺនៅផ្ទះម្តាយនាងនៅភូមិអូរព្រះ ឃុំអូរគ្រៀង ស្រុកសំបូរ។ តែក្រោយពីព្យាបាលនៅនៅ ផ្ទះមានរយៈពេលជាច្រើនថ្ងៃអាការៈស្ត្រីរងគ្រោះ រឹតតែមានភាពធ្ងន់ធ្ងរ ហើយបានបញ្ជូនទៅសង្គ្រោះនៅពេទ្យ ប្រទេសវៀតណាម តែក៏ត្រូវបានស្លាប់។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]