ក​ម្លាំងគយចល័ត ចាប់រថយន្ត២គ្រឿង នៅស្រុកមេមត់ ដែលប្រុងដឹកឈើយ៉ាងច្រើនចេញតាមច្រករបៀង

(ត្បូងឃ្មុំ)៖ រថយន្ត២គ្រឿង ដែលផ្ទុកដោយឈើប្រភេទលេខ១ ប្រុងលួចដឹកចេញតាមច្រករបៀងនៅស្រុកមេមត់ ខេត្តត្បូងឃ្មុំ ទៅកាន់ប្រទេសវៀតណាម ត្រូវបានកម្លាំងគយចល័តចាប់ឃាត់បាននៅព្រឹកថ្ងៃទី២៦ ខែមិថុនា ឆ្នាំ២០១៦នេះ។

លោក ព្រាប ការ៉ាត់ មន្រ្តីគយចល័ត ដែលបានចូលរួមដឹកនាំការបង្រ្កាបនេះ បានអះអាងថា ឈើយ៉ាងច្រើននោះ ត្រូវបានឃាត់នៅភូមិអូរអង្កាម ឃុំចាន់មូល ស្រុកមេមត់ ខេត្តត្បូងឃ្មុំ ដែលសុទ្ធសឹងជាឈើគេចពន្ធ។ ក្នុងនោះសមត្ថកិច្ចគយចល័ត ក៏បានឃាត់រថយន្ត២គ្រឿងផងដែរ។

សូមបញ្ជាក់ថា នាពេលកន្លងមក កម្លាំងគយចល័ត បានក៏បានធ្វើយុទ្ធនាការចាប់ឈើគេចពន្ធ នៅក្នុងខេត្តត្បូងឃ្មុំនេះ ក៏ដូចជាតាមបណ្តាខេត្តមួយចំនួន ជាបន្តបន្ទាប់ផងដែរ៕ 

ប្រភព៖ freshnews

កំណត់ហេតុខ្មែរឡូត៖

យ៉ាងណាមិញ កាលពីថ្ងៃទី ២៨ ខែឧសភា ឆ្នាំ២០១៦ មានរថយន្តចំនួន៤គ្រឿងលួចដឹកឈើប្រណិតល្មើសច្បាប់ បំរុងនាំចេញទៅកាន់ប្រទេសវៀតណាម តាមច្រករបៀង នៅស្រុកអូយ៉ាងដាវ ខេត្តរតនគីរី ត្រូវបានកម្លាំងគយចល័ត ដឹកនាំឲ្យលោក ព្រាប ការ៉ាត់ សហការជាមួយសាខាគយ និងរដ្ឋាករខេត្តរតនគិរី និង កងរាជអាវុធហត្ថ ស្រុកអ៊ូរយ៉ាដាវ និងកងរាជអាវុធហត្ថលើផ្ទៃប្រទេស និងមានការសម្របសម្រួលពីសំណាក់លោក លាង ស្រេង ព្រះរាជអាជ្ញាខេត្តរតនគិរី ចាប់បាននៅចំណុចតាមបណ្តោយផ្លូវលេខ៧៨ ភូមិ អ៊ុន ឃុំលំជ័រ ស្រុកអូយ៉ាដាវ ខេត្តរតនគិរី នៅមុខវត្តអូយ៉ាដាវ នាវេលាម៉ោង២១៖៣០នាទីថ្ងៃទី២៨ ខែឧសភា ឆ្នាំ២០១៦។

រថយន្តដឹកឈើប្រណិតល្មើសច្បាប់ចំនួន៤គ្រឿងនេះមានម៉ាក៖ Camry មួយគ្រឿង, Tacoma មួយគ្រឿង និង Tundra ពីរគ្រឿង។ ចំណែកឈើមិនទាន់ដឹងចំនួនពិតប្រាកដនៅឡើយទេ មន្រ្តីជំនាញកំពុងធ្វើការវាស់វែង និងរក្សាទុកនៅសាខាគយ និងរដ្ឋាករខេត្តរតនគិរី។

មន្រ្តីគយចល័ត លោក ព្រាប ការ៉ាត់ បានបញ្ជាក់ Fresh News ថា ការចាប់ឃាត់រថយន្តនេះធ្វើឡើងតាមបទបញ្ជាផ្ទាល់ពីលោក កើត សុធារ៉ា ប្រធាននាយកដ្ឋានគយ និងនាយកដ្ឋាន ស្រាវជ្រាវបង្ការ និងបង្រ្កាបបទល្មើសគយ និងទទួលបានព័ត៌មានសំងាត់ពីកម្លាំងគយ។ ឈើប្រណិតល្មើសច្បាប់ទាំងនេះគឺជាទំនិញល្មើសច្បាប់គយ, ដូច្នេះនាយកដ្ឋានគយត្រូវតែចាត់វិធានការណ៍ និងតម្រូវឲ្យមានការបង់ពន្ធតាមច្បាប់របស់គយកំណត់។ ឈើខុសច្បាប់នេះមានតម្លៃរាប់សិបម៉ឺនដុល្លារ សហរដ្ឋអាមេរិក នេះបើតាមការបញ្ជាក់ពីមន្រ្តីគយដែលដឹកនាំការបង្រ្កាប។

ពាក់ព័ន្ធនឹងសកម្មភាពរត់ពន្ធឈើខុសច្បាប់ និងបង្រ្កាបរថយន្តអត់ពន្ធ នារដូវកាលចុងក្រោយនេះ មហាជនបានសម្តែងនូវការ កោតសរសើរចំពោះនាយកដ្ឋានគយ និងនាយកដ្ឋាន ស្រាវជ្រាវបង្ការ និងបង្រ្កាបបទល្មើសគយ ដែលបានធ្វើសកម្មភាពយ៉ាងសកម្មចំពោះ ជនមានអំណាចនិងមានទឹកលុយ ប្រើប្រាស់រថយន្តខុសច្បាប់។ ជាងនេះទៅទៀត ការបង្រ្កាបរថយន្តអត់ពន្ធពីសំណាក់កម្លាំងគយចល័ត នឹងត្រូវធ្វើឡើងជាប់ជានិច្ចដូចភ្លៀងរលឹម៕