(កំពង់ចាម)៖ រថយន្ដសាំងយ៉ុងដឹកអ្នកដំណើរមួយគ្រឿង បានបើកបរក្នុងល្បឿនយ៉ាងលឿន បានបុកម៉ូតូពីក្រោយ បន្ទាប់មកស្រាប់តែរេចង្កូតទៅបុកបង្គោលភ្លើង ដាច់ធ្លាក់រាបនិងរាយប៉ាយពេញផ្លូវ បណ្ដាលឱ្យមានអ្នករងរបួសធ្ងន់ និងស្រាលជាច្រើនអ្នកផងដែរ។
ហេតុការណ៍គ្រោះថ្នាក់ចរាចរណ៍នេះ កើតឡើងនៅរសៀលថ្ងៃទី៣១ ខែឧសភា ឆ្នាំ២០១៦នេះ នៅចំណុចថ្នល់កែង ស្ថិតក្នុងស្រុកបាធាយ ខេត្តកំពង់ចាម។ បើតាមមន្ដ្រីនគរបាលចរាចរណ៍ស្រុកបាធាយ បានឱ្យដឹងថា មុនពេលកើតហេតុ រថយន្ដសាំងយ៉ុងដឹងអ្នកដំណើរ បើកបរក្នុងទិសដៅពីភ្នំពេញទៅសៀមរាប ក្នុងល្បឿនយ៉ាងលឿន លុះមកដល់ចំណុចថ្នល់កែង បំបែកទៅព្រែកក្ដាម ស្រាប់តែបុកម៉ូតូពីក្រោយពេញទំហឹង បន្ទាប់មកបានរេចង្កូតទៅបុកបង្គោលភ្លើង បាក់រាបដល់ដី ធ្វើឱ្យដាច់ខ្សែភ្លើងពាសពេញផ្លូវ។
សមត្ថកិច្ចដដែលបន្ដថា ក្នុងករណីនេះ បណ្ដាលឱ្យតៃកុងរថយន្ដ និងអ្នកជិះក្នុងរថយន្ដនោះ រងរបួសធ្ងន់ស្រាលជាច្រើនអ្នក។ ក្រោយពេលកើតហេតុ ជនរងគ្រោះត្រូវបានរថយន្ដសង្គ្រោះ ដឹកយកទៅសង្គ្រោះនៅមន្ទីរពេទ្យ ចំណែករថយន្ដសមត្ថកិច្ចស្ទួចយកទៅរក្សាទុកនៅអធិការដ្ឋាននគរបាលស្រុកបាធាយ ដើម្បីរងចាំការដោះស្រាយតាមនីតិវិធី៕
ប្រភព៖ Fresh News
កំណត់ហេតុខ្មែរឡូត៖
ទាក់ទងនឹងករណី ជិះបុកបង្គោលភ្លើងនេះដែរ យុវជន៣នាក់ជិះម៉ូតូ ស្កុបពី បុកបង្គោលភ្លើងម្នាក់ស្លាប់ និង២ទៀតរងរបួសធ្ងន់ នៅម៉ោង ៥៖៣៥នាទី ល្ងាចថៃ្ងទី២៥ ខែមីនា ឆ្នាំ២០១៦ ស្ថិតនៅចន្លោះគីឡូម៉ែត្រលេខ៩០.៩១ ត្រង់បង្គោលភ្លើង កែងខាងកើត ការិយាល័យសភា ខេត្តកំពង់ឆ្នាំង ទល់មុខក្លោងទ្វារ មុខសាលាខេត្តកំពង់ឆ្នាំង។
សូមបញ្ជាក់ថា ក្នុងហេតុការណ៍គ្រោះថ្នាក់ចរាចរណ៍នេះ បណ្តាលអោយយុវជនម្នាក់បានស្លាប់ភ្លាមៗនៅកន្លែងកើតហេតុ និង២នាក់ទៀតរងរបួស៕
ជាមួយគ្នានេះ កាលពីពេលថ្ងៃត្រង់ក្នុងថ្ងៃទី៣០ ខែមករា ឆ្នាំ ២០១៦ យុវសិស្សមួយ រូបបានជិះម៉ូតូ ផ្លោងចុះ ទៅក្រោម ស្ពានជ្រោយចង្វារ ធ្វើឲ្យភ្ញាក់ផ្អើលយ៉ាងខ្លាំង។
នេះបើតាមប្រភពព័ត៌មានបានឲ្យដឹងថា យុវសិស្សជាជនរងគ្រោះ ដែលមិនដឹងអត្តសញ្ញាណ តែជាសិស្សរៀននៅសាលាឯកជន មួយរូប បានជិះម៉ូតូ ទៅបុកបង្គោលភ្លើង នៅលើស្ពានជ្រោយចង្វារ ហើយបានហោះផ្លោង មកខាងក្រោមស្ពាន ដែលសំណាងល្អមិនបាន ធ្លាក់ចុះទៅក្នុង ទឹកទន្លេ។ យ៉ាងណាមិញ យុវសិស្សរូបនេះ មិនបានបាត់បង់ជីវិតនោះទេ តែរងរបួសធ្ងន់ បែកមុខមាត់ និងទំនងជាបាក់ជើង។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]