ខេត្តសៀមរាប ៖ ភ្លៀងមួយមេធំលាយឡំ នឹងខ្យល់កន្ត្រាក់ កាលពីវេលាម៉ោង៥ល្ងាច ថ្ងៃទី២៨ មេសា បណ្ដាលឱ្យប៉ះពាល់ដល់ភូមិមួយចំនួន ក្នុងនោះមាន ភូមិវត្ដ ភូមិស្រែពោធិ៍ ភូមិដៃរាវ ភូមិគោកវត្ដ ភូមិស្រែណូយ ក្នុងឃុំស្រែណូយ ស្រុកវ៉ារិន ។
លោកវរសេនីយ៍ទោ ណុប សារ៉ាក់ អធិការនគរបាលស្រុកវ៉ារិន បានប្រាប់កោះសន្ដិភាពនៅវេលាម៉ោង៧និង១៥នាទីរសៀល ថ្ងៃទី២៨ មេសា ថា បន្ទាប់ពីមានភ្លៀងធ្លាក់លាយឡំនិងខ្សល់ន្ដ្រាក់មួយមេធំ កាលពីវេលាម៉ោង១៧ រសៀល ថ្ងៃទី២៨ មេសា បណ្ដាលឱ្យប៉ះពាល់ដល់ភូមិចំនួន៥ បណ្ដាលឱ្យផ្ទះខូចខាត២៥៩ផ្ទះ ក្នុងនោះផ្ទះរលំដល់ដីទាំងស្រុងអស់២៤ខ្នង ស្មើនឹង២៤គ្រួសារ និងបុើងដំបូល២៣៥ខ្នង ស្នើនឹង២៣៥គ្រួសារ ខូចរថយន្ដ០៦គ្រឿង និងអីវ៉ាន់គ្រឿងឧបភោគ បរិភោគមួយចំនួនធំ ព្រមទាំងមានអ្នករបួសធ្ងន់ស្រាល៣នាក់ ។ ក្នុងនោះរងរបួសស្រាល២ និងធ្ងន់ម្នាក់ ភេទស្រីឈ្មោះ ម៉ង់ ពេញស្រី អាយុ៥៤ឆ្នាំ រស់នៅភូមិស្រែណូយ ឃុំស្រែណូយ ស្រុកវ៉ារិន ខេត្តសៀមរាប ។
ជនរងគ្រោះដែលត្រូវរបួសធ្ងន់ក្នុងហេតុការណ៍រលំផ្ទះ ត្រូវបានក្រុមគ្រួសារដឹកបញ្ជូនយកទៅមន្ទីរពេទ្យបង្អែកខេត្ដសៀមរាប ។ ចំណែកអ្នករបួសស្រាល ត្រូវបានក្រុមគ្រួសារដឹកយកមកព្យាបាលនៅមណ្ឌលសុខភាពឃុំស្រែណូយ ។
លោកបានបញ្ជាក់ទៀតថា លោកនឹងដាក់កម្លាំងអធិការដ្ឋាននគរបាលស្រុក ចុះជួយប្រជាពលរដ្ឋដែលរងការប៉ះពាល់ផ្ទះសម្បែងដោយសារខ្សល់កន្ដ្រាក់ នៅព្រឹកថ្ងៃទី២៩ មេសា ដើម្បីនាំគ្នាជួយសាងសង់ផ្ទះដែលរលំដល់ដី និងបុើងដំបូលជូនប្រជាពលរដ្ឋឡើងវិញ ។
ភ្លៀងមួយមេធំ រន្ទះបាញ់ស្លាប់អ្នកចិញ្ចឹមទាម្នាក់ នៅក្រុងព្រៃវែង
ខេត្ដព្រៃវែង ៖ បុរសម្នាក់ត្រូវរន្ទះភ្លើងបាញ់ឆេះខ្លោចពេញដងខ្លួន និងបានស្លាប់បាត់បង់ជីវិត ភ្លាមៗនៅនឹងកន្លែងកើតហេតុ ខណៈពេលដែលបុរសរូបនោះ កំពុងដេកក្នុងរោងមួយកន្លែងកណ្តាលវាលស្រែ ។
ហេតុការណ៍នេះ បានកើតឡើងកាលពីវេលាម៉ោង៣និង២៥នាទីទៀបភ្លឺ ព្រឹកថ្ងៃទី២៩ មេសា នៅចំណុចវាលស្រែក្នុងសង្កាត់កំពង់លាវ ក្រុងព្រៃវែង ។ បុរសរងគ្រោះមានឈ្មោះ ពុន សំអឿន អាយុ៤៨ឆ្នាំ មានមុខរបរជាអ្នកចិញ្ចឹមទា និងមានទីលំនៅក្នុងសង្កាត់ជើងទឹក ក្រុង ព្រៃវែង ។
តាមប្រភពព័ត៌មានពីសមត្ថកិច្ចបានឱ្យដឹងថា ជនរងគ្រោះតែងតែទៅដេកយាមទារបស់ខ្លួន នៅក្នុងកូនរោងកណ្តាលវាលស្រែ ជារៀងរាល់យប់ ហើយមិនដែលមានបញ្ហាអ្វីកើត ឡើងទេ ។ ប៉ុន្តែជាអកុសលនៅវេលាម៉ោង១រំលងអធ្រាត្រ ឈានចូលព្រឹកថ្ងៃទី២៩ មេសា នេះ មានភ្លៀងធ្លាក់មួយមេយ៉ាងធំ លាយឡំជាមួយខ្យល់កន្ត្រាក់បោកបក់យ៉ាងខ្លាំង និងមានផ្លេកបន្ទោរផងដែរ ។ លុះនៅវេលាម៉ោង៣និង២៥នាទីទៀបភ្លឺ ក៏មានរន្ទះបាញ់ចំរោងដែលជនរងគ្រោះកំពុងដេក ទើបបណ្តាលឱ្យឆេះខ្លោចជនរងគ្រោះ និងស្លាប់បាត់បង់ជីវិតភ្លាមៗនៅនឹងកន្លែង ប៉ុន្តែរហូតមកដល់ព្រឹកឡើងទើបមានអ្នកបានឃើញ ក៏មានការផ្អើលឆោឡោឡើង ។
សមត្ថកិច្ចបានបញ្ជាក់ថា តាមការពិនិត្យនៅកន្លែងកើតហេតុ ជនរងគ្រោះបានពាក់នាឡិកា ១នៅនឹងដៃ ព្រមទាំងមានទូរស័ព្ទ១គ្រឿងទៀតនៅក្នុងហោប៉ៅខោផងដែរ ដូច្នេះហើយទើបសមត្ថកិច្ចសន្និដ្ឋានថា រន្ទះដែលបាញ់ចំរោងដែលជនរងគ្រោះដេកនោះ គឺអាចបណ្តាលមកពីចរន្តរន្ទះ ស្រូបឆ្លងជាមួយនឹងនាឡិកា ឬក៏ទូរសព្ទ័ដៃនោះតែម្តង ។
គួរបញ្ជាក់ផងដែរថា ក្រៅពីរន្ទះបាញ់បុរសចិញ្ចឹមទាខាងលើឱ្យស្លាប់ហើយនោះ រន្ទះក៏ បានបាញ់ទៅលើពន្ធនាគារខេត្តព្រៃវែងផងដែរ និងបានបណ្តាលឱ្យខូចកាមេរ៉ាសុវត្ថិភាពនៅក្នុងពន្ធនាគារនោះអស់ចំនួន៩គ្រឿង ឧបករណ៍បញ្ជាកាមេរ៉ា១ឈុត ទូរទស្សន៍២គ្រឿង និងផ្ទះប្រជាពលរដ្ឋដែលនៅជុំវិញនោះ ក៏ខូចខាតទូរទស្សន៍អស់ប្រមាណ១០គ្រឿងផងដែរ ។
ធ្លាក់ភ្លៀងមួយមេ លាយឡំទៅដោយខ្សល់កន្ដ្រាក់បក់បោកខូចខាតលំនៅឋាន៣៤ខ្នង
ខេត្តឧត្ដមានជ័យ ៖ លំនៅឋានដួលរលំដល់ដី១៤ខ្នង និងប៉ើងដំបូល២០ខ្នង ខណៈភ្លៀងមួយមេបានធ្លាក់លាយឡំទៅដោយខ្យល់កន្ត្រាក់បានបក់បោកមកលើ កាលពីរសៀលថ្ងៃទី២៨ ខែមេសានៅក្នុងឃុំលំទង ស្រុកអន្លង់វែង ។
អ្នកភូមិនិយាយថា មុនពេលកើតហេតុនៅក្នុងអំឡុងដើមខែមេសាឆ្នាំនេះ មេឃក្តៅខ្លាំងណាស់ស្ទើរតែស៊ូទ្រាំមិនបាន ដោយឡែកកាលពីវេលាម៉ោង៣រសៀលថ្ងៃទី២៨ មេសា ស្រាប់តែមេឃបានប្រែពណ៌ខ្មៅ ហើយភ្លាមៗនោះភ្លៀងបានធ្លាក់មកបន្តិចបន្តួចបើយើងត្រងទឹកវិញមិនបានមួយធុងទេ តែខ្យល់កន្ត្រាក់បក់បោកខ្លាំងណាស់បណ្តាលឲ្យលំនៅឋានខូចខាតជាច្រើនខ្នង ។
មន្ត្រីអាវុធហត្ថស្រុកអន្លង់វែង បានឲ្យដឹងថា ភ្លៀងបានធ្លាក់លាយឡំទៅដោយខ្យល់កន្ត្រាក់ទៅលើភូមិចំនួន៣គឺ ១-ភូមិគោកសំព័រផ្ទះ១០ខ្នងបាក់ដួលដល់ដី ១៥ខ្នងប៉ើងដំបូល។ ចំណែកត្រាក់ទរ័មួយគ្រឿង រថយន្ត១គ្រឿង និងម៉ូតូ២គ្រឿងត្រូវផ្ទះរលំសង្កត់ខូចខាតស្ទើរទាំងស្រុង ។ ២-ភូមិត្រពាំងធំ ផ្ទះ៣ខ្នងប៉ើងដំបូល និង៣-ភូមិទំនប់ថ្មី ផ្ទះ៤ខ្នងបាក់ដួលដល់ដី ២ខ្នងប៉ើងដំបូល និងមនុស្សចំនួន៤នាក់រងរបួសធ្ងន់និងស្រាល ត្រូវបាននាំទៅសង្រោះនៅមន្ទីរពេទ្យបង្អែកស្រុកអន្លង់វែង ។
បញ្ហាគ្រោះធម្មជាតិនេះហាក់កំពុងយាយីកាន់តែអាក្រក់ពីមួយឆ្នាំទៅមួយឆ្នាំ ព្រោះថាអាកាសធាតុក្តៅខ្លាំងរហូតទ្រាំមិនបានបើគ្មានម្លប់ជ្រក ។ ម្នាក់ៗចង់ឱ្យមានភ្លៀងធ្លាក់ដើម្បីឱ្យសីតុណ្ហភាពថយកម្តៅ ក៏ស្រាប់តែជួបខ្យល់កន្ត្រាក់បោកបក់រលំផ្ទះសម្បែងទៅវិញ ។
ខេត្តរតនគិរី ភ្លៀងកក់ខែមួយមេ នាំមកខ្យល់កន្ដ្រាក់ បំផ្លាញផ្ទះ៣៦ខ្នង និងស្លាប់មនុស្សម្នាក់
ភ្លៀងកក់ខែមួយមេយ៉ាងធំ លាយឡំដោយខ្យល់កន្ត្រាក់ បណ្តាលឱ្យខូចខាតផ្ទះប្រជាពលរដ្ឋអស់៣៦ខ្នង ក្នុងនោះរលំដួលដល់ដី៧ខ្នង និងស្លាប់មនុស្សម្នាក់ ។
ទាក់ទិនទៅនឹងករណីខាងលើ ត្រូវបានអាជ្ញាធរមូលដ្ឋានបានឱ្យដឹងថា កើតឡើងកាលពីវេលាម៉ោង៧និង៣០នាទីយប់ ថ្ងៃទី២៨ មេសា ស្ថិតនៅក្នុងភូមិប៉ុង ឃុំប៉ុង ស្រុកវ៉ើនសៃ ហើយនៅព្រឹកថ្ងៃទី២៩ មេសា លោកទេសរដ្ឋមន្ដ្រី លី ធុជ បានដឹកនាំកម្លាំងចម្រុះចុះទៅដល់កន្លែងកើតហេតុ និងនាំអំណោយដូចជាគ្រឿងឧបភោគបរិភោគជូនដល់ប្រជាពលរដ្ឋដែលរងគ្រោះដោយខ្យល់កន្ត្រាក់រលំផ្ទះ។
បើតាមអាជ្ញាធរមូលដ្ឋានបានឱ្យដឹងថា នៅមុនពេលកើតហេតុមានភ្លៀងធ្លាក់មួយមេយ៉ាងខ្លាំង និងមានខ្យល់កន្ត្រាក់ថែមទៀតផង បណ្តាលឱ្យបុរសម្នាក់ឈ្មោះ ប៉ូ ហិន ភេទប្រុស អាយុ៣៧ឆ្នាំ ស្លាប់ដោយសារផ្ទះបាក់សង្កត់ ។ ផ្ទះប្រជាពលរដ្ឋខូចខាតចំនួន៣៦ខ្នង មាន៧ខ្នងដួលរាបដល់ដី និង២៩ខ្នងទៀត ប៉ើងដំបូលស័ង្កសី ។
បើតាមរបាយការណ៍របស់របស់អាជ្ញាធរខេត្តរតនគិរី បានឱ្យដឹងថា មានភ្លៀងធ្លាក់មួយមេ និងខ្យល់កន្ត្រាក់នេះ ធ្វើឱ្យដួលរលំផ្ទះរបស់ប្រជាពលរដ្ឋអស់ចំនួន២ស្រុក និងក្រុងមួយ សរុបចំនួន៧២ខ្នងផ្ទះ ។ ពេលនេះអាជ្ញាធរខេត្ត កំពុងយកចិត្តទុកដាក់ចំពោះគោលការណ៍របស់រដ្ឋាភិបាល មិនឱ្យប្រជាពលរដ្ឋណាម្នាក់រងគ្រោះអត់រហូតដល់ថ្នាក់អត់បាយហូបទេ ។ សូមបញ្ជាក់ថា ពលរដ្ឋនៅស្រុកវ៉ើនសៃ ក៏មានអ្នករងគ្រោះដោយសារពស់ចឹកស្លាប់ម្នាក់ផងដែរ ។
ភ្លៀងធ្លាក់ដើមឆ្នាំមួយមេធំ លាយនឹងផ្គរន្ទះបាញ់ស្លាប់ម្នាក់នៅស្រុកសំបូរ
ខេត្តក្រចេះ ៖ ក្រៅពីសន្ឋឹកភ្លៀងបានបង្អុរធ្លាក់យ៉ាងជោកជាំមួយមេធំ មានរយះពេលជាច្រើនម៉ោងស្ទើរគ្រប់បណ្តាស្រុក-ក្រុងនៅទូទាំងខេត្ត កាលពីវេលាជិតពាក់កណ្តាលយប់ ថ្ងៃទី២៨ មេសា ក៏នៅមានបាតុភាពគ្រោះធម្មជាតិរន្ទះបាញ់ស្លាប់បុរសវ័យចំណាស់ម្នាក់នៅស្រុកសំបូរ ។
ភ្លៀងលាយជាមួយសន្ឋឹកខ្យល់បោកបក់ ផ្លេកបន្ទោរ និងរន្ទះ បានកើតមានយ៉ាងខ្លាំងនៅវេលាពាក់កណ្តាលយប់ ធ្វើឱ្យបុរសចំណាស់ម្នាក់់រងគ្រោះស្លាប់ដោយរន្ទះបាញ់ ឈ្មោះ សៅ សារី អាយុ៦២ឆ្នាំ រស់នៅភូមិយាវ ឃុំកំពង់ចាម ស្រុកសំបូរ ត្រូវបានស្លាប់នៅលើផ្ទះតែម្ដង ។
ក្រុមគ្រួសាររបស់ជនរងគ្រោះឲ្យដឹងថា នៅយប់ថ្ងៃកើតហេតុ នៅពេលមេឃមានភ្លៀងធ្លាក់ខ្លាំង គាត់បានចុះមកក្រោមផ្ទះចាប់បំភ្លឺភ្លើងអាគុយ ក៏ត្រូវរន្ទះបាញ់បណ្តាលឲ្យបាក់សសរផ្ទះមួយដើម និងស្លាប់់តែម្ដង ។
ករណីបាតុភូតធម្មជាតិដែលត្រូវរន្ទះបាញ់បណ្តាលឲ្យស្លាប់មនុស្សនេះ ត្រូវបានអាជ្ញាធរចាត់ទុកថា បានកើតមានជាលើកដំបូង នៅដើមរដូវវស្សានេះ បន្ទាប់ពីកើតមានគ្រោះរាំងស្ងួត បានអូសបន្លាយអស់រយះពេលយូររួចមកនោះ ។ ជាមួយនឹងការស្លាប់របស់បុរសរងគ្រោះវ័យចំណាស់ដោយសាររន្ទះបាញ់ លោកឧត្តមសេនីយ៍ លន់ សុផាត ស្នងការនគរបាលខេត្តក្រចេះ បានចូលរួមរំលែកទុក្ខ មានបច្ច័យចំនួន៤០ម៉ឺនរៀល ជូនដល់គ្រួសារសព ។
មិនមានសេចក្តីរាយការណ៍ណាមួយបន្ថែមឲ្យច្បាស់អំពីគ្រោះធម្មជាតិដែលបានកើតឡើងផ្សេងទៀតនៅក្នុងខេត្តក្រចេះ ជាមួយនឹងសន្ឋឹកភ្លៀងដែលបានបង្អុរធ្លាក់ខ្លាំងមួយមេធំនេះទៀតទេ ក្រៅពីគ្រោះរន្ទះបាញ់សម្លាប់មនុស្សមួយករណីនេះ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]