រៀងរាល់ថ្ងៃសុក្រ ខ្មែរឡូត នឹងធ្វើការដកស្រង់ ព័ត៌មានសំខាន់ៗ ពីប្រភពសារព័ត៌មានមួយចំនួន អំពីដំណើរវិវឌ្ឍន៍នយោបាយ នៅក្នុងប្រទេសកម្ពុជា យកមកចែករំលែក ជូនដល់ប្រិយមិត្តបានជ្រាប ជាដំណឹង។ នៅក្នុងសប្តាហ៍នេះ មានប្រធានបទ គួរឲ្យចាប់អារម្មណ៍ ដែលនឹងមានខ្លឹមសារត្រួសៗ ដូចខាងក្រោម៖
អ្នកស្រាវជ្រាវ ថាបក្សប្រឆាំង កុំឆ្លើយតបនឹងសំឡេង ដែលថាលោក កឹម សុខា មានស្នេហាលួចលាក់
លោក កែម ឡី បញ្ជាក់ថាបើយកល្អបក្សប្រឆាំង មិនគួរចេញមុខបកស្រាយ ករណីនេះទេ ដោយលោកគិតថាជារឿងអត់ប្រយោជន៍ តែលោកថា ទាំងពលរដ្ឋ ទាំងអ្នកគាំទ្រគណបក្សទាំងពីរ គួរជំរុញមេដឹកនាំរបស់ខ្លួន ឲ្យគិតពីប្រយោជន៍ជាតិ ជាជាងយករឿងបុគ្គល ទៅរិះគន់គ្នា។ លោកបន្តថា៖ “អ្នកនយោបាយធ្វើនយោបាយ ដើម្បីដោះស្រាយរឿងសង្គម មិនមែនដោះស្រាយរឿងបុគ្គលទេ ខ្លួនឯងក្រ ខ្លួនឯងមាន ខ្លួនឯងមានរឿងអាស្រូវ ខ្លួនឯងជាមន្ត្រីស្អាតស្អំ អាហ្នឹងវាមិនដោះស្រាយខ្លួនឯងទេ។ យើងត្រូវដោះស្រាយបញ្ហាសង្គម។ អញ្ចឹងយើងត្រូវមានការជជែកបញ្ហាសង្គមច្រើនជាងបញ្ហាបុគ្គល។ បើបញ្ហាបុគ្គលនោះ វាមិនចេះអស់ទេ ព្រោះថាមនុស្សអ្នកខ្លះ មុខក្រញ៉ូវ អ្នកខ្លះសើច អ្នកខ្លះចូលចិត្តផឹកស្រា អ្នកខ្លះអត់ចូលចិត្តផឹក។ អញ្ចឹងយើងចេះតែជជែក អាបញ្ហាហ្នឹង វាច្រមូកច្របល់ច្រើន អ្នកខ្លះចូលចិត្តនារីច្រើន អ្នកខ្លះចូលចិត្តតែប្រពន្ធខ្លួនឯង អញ្ចឹងវាលើសលប់។ អញ្ចឹងខ្ញុំថាបើមិនបកស្រាយល្អ“។ ម្យ៉ាងទៀតលោក កែម ឡី បង្ហាញការខកចិត្តថាបើការសន្ទនា ជាលក្ខណៈបុគ្គលត្រូវបានគេតាមដាន ស្តាប់និងបញ្ចេញជាសាធារណៈ គ្មានការទប់ស្កាត់បែបនេះ លោកបានប្រៀបធៀបការលួចស្តាប់នេះ ទៅនឹងរបបខ្មែរក្រហម។ លោកបន្ថែមថា៖ “ការលួចថតសំឡេងថតអីហ្នឹងវាជាអំពើអយុត្តិធម៌ណាស់! ព្រោះអីទូរសព្ទយើងតេក្នុងន័យបុគ្គលប្តីប្រពន្ធស្នេហា ពេលយប់ព្រលប់អី! ដល់គេស្តាប់រហូត អញ្ចឹងខ្ញុំគិតថា វាជាបរិបទសង្គមមួយ ដែលអាក្រក់ជាងសម័យប៉ុលពតទៅទៀត!“។ ប្រភព៖ VOD
តំណាងរាស្ត្របក្សប្រឆំាង ថាការដោះលែង សកម្មជន ១៥នាក់ ទើបបង្ហាញពី ភាពស្មោះត្រង់ នៃវប្បធម៌សន្ទនា
តំណាងរាស្ត្របក្សប្រឆាំងអះអាងថា បើសកម្មជនរបស់ខ្លួន នៅតែត្រូវបន្តឃុំខ្លួននៅក្នុងពន្ធនាគារ នោះវប្បធម៌សន្ទនាដែលបង្កើតឡើងរួមគ្នា ហាក់មិនទាន់ធានា ពីការបង្រួបបង្រួមជាតិ ជាលក្ខណៈគ្រួសារខ្មែរទេ។ នៅថ្ងៃចន្ទនេះ តំណាងរាស្ត្រគណបក្សសង្គ្រោះជាតិមួយចំនួន រួមទាំងលោក សុន ឆ័យ ផងចុះទៅសួរសុខទុក្ខ សកម្មជនទាំង១៥នាក់ របស់គណបក្សប្រឆាំង ម្តងទៀត នៅពន្ធនាគារព្រៃស។ លោក សុន ឆ័យ បានឲ្យដឹងដែរថា បើរដ្ឋាភិបាលមិនពិចារណាពីការលើកលែង ការចោទប្រកាន់ សកម្មជនរបស់លោកទាំង១៥រូបនោះទេ លោកថា វប្បធម៌សន្ទនា ហាក់នៅឆ្ងាយពីឆន្ទៈពិត នៃការចង់បង្រួបបង្រួមជាតិជាលក្ខណៈគ្រួសារខ្មែរ តាមស្មាតី នៃការឯកភាពគ្នាកន្លងទៅ។ លោកបន្តថា៖ “ដូច្នេះ យើងចេះតែជំរុញឲ្យថ្នាក់ដឹកនាំ គណបក្សទំាងពីរ រាល់ពេលមានឱកាសបានជួបគ្នាររវាងក្រុមភាគច្រើនភាគតិច ត្រូវតែមានការដោះស្រាយ ចំពោះអ្នកជាប់ទោសទំាងនេះ ឲ្យបានចប់សព្វគ្រប់ជាមុន បើពុំដូច្នោះ ខ្ញុំថាការជួបសន្ទនានេះគ្រាន់តែជាការជួបមួយ ដែលមិនមានភាពស្មោះត្រង់ ដែលអាចឲ្យគណបក្សទំាងពីរដោះស្រាយបញ្ហា សមសម្របទំាងឡាយបាន”។ ប្រភព៖ VOD
មេបក្សប្រឆាំង ថាអ្នកនិយាយពីបដិវត្តន៍ មិនគួរត្រូវកាត់ទោសនោះទេ
លោក សម រង្ស៊ី បានសរសេរថា៖ “ការលើកឡើងពី”បដិវត្តន៍ពណ៌” ណាមួយមិនមែនជាកំហុសអ្វីឡើយ ហើយក៏មិនត្រូវមានទោសអ្វីឡើយដែរ ដោយលោកថា”បដិវត្តន៍ពណ៌”ទាំងឡាយដែលបានកើតមានឡើងក្នុងពិភពលោកក្នុងរយៈពេល៣០ឆ្នាំកន្លងមកនេះ គឺសុទ្ធតែជាការផ្លាស់ប្តូរនយោបាយ ដោយសន្តិវិធីទាំងអស់ ដោយគ្មានអំពើហិង្សាអ្វីឡើយ ហើយដោយគ្មានការញុះញង់ពីនរណាឡើយ”។ លោកបញ្ជាក់ថា៖ “ព្រឹត្តិការណ៍ទាំងអស់នោះគឺកើតចេញពីទឹកចិត្ត ប្រជារាស្ត្រទាំងមូល ដែលស្រលាញ់សេរីភាព យុត្តិធម៌និងលទ្ធិប្រជាធិបតេយ្យ”។ លោក សម រង្ស៊ី បានលើកឧទាហរណ៍ នៃបដិវត្តន៍មួយចំនួន រួមមានបដិវត្តន៍ពណ៌លឿង នៅប្រទេសហ្វីលីពីន កាលពីឆ្នាំ១៩៨៦ បដិវត្តន៍ពណ៌ផ្កាកុលាប នៅប្រទេសហ្សកហ្ស៊ី កាលពីឆ្នាំ២០០៣ បដិវត្តន៍ពណ៌ទឹកក្រូច នៅប្រទេសអ៊ុយក្រែនកាលពីឆ្នាំ២០០៤ និងបដិវត្ដន៍ពណ៌រមៀត ដឹកនាំដោយព្រះសង្ឃ នៅប្រទេសមីយ៉ាន់ម៉ាកាលពីឆ្នាំ២០០៧។ លោក សម រង្ស៊ី និយាយថា៖ “តាមការពិតដែរ និស្សិតមួយរូបឈ្មោះ គង់ រ៉ៃយ៉ា នេះ គ្រាន់តែបានសម្តែងអំពីទឹកចិត្តរបស់យុវជនខ្មែររាប់លាននាក់ និងរបស់ប្រជារាស្ត្រខ្មែរទាំងមូល”។ ប្រភព៖ VOD
បើសង្គ្រោះជាតិឈ្នះឆ្នោត មន្ត្រី ប្តី ប្រពន្ធ កូន និងចៅមន្ត្រីត្រូវ ប្រកាសទ្រព្យសម្បត្តិទាំងអស់
ភ្នំពេញ៖ លោក ហូ វ៉ាន់ សមាជិកសភា មកពីគណបក្សសង្គ្រោះជាតិ បានលើកឡើងថា ប្រសិនបើយើងចង់បានប្រសិទ្ធភាពនៅក្នុងការងារគ្រប់គ្រង ការងាររដ្ឋបាល បម្រើសេវាសាធារណៈ ដល់មហាជនឲ្យមានតម្លាភាព កាត់បន្ថយអំពើរពុករលួយ និងត្រូវតាមគោលនយោបាយ របស់រាជរដ្ឋាភិបាល នោះគឺមន្ត្រីទាំងអស់ត្រូវហ៊ានប្រកាសទ្រព្យសម្បត្តិ ។ លោក ហូ វ៉ាន់ ដែលជាប្រធានគណៈកម្មការ អង្កេត បោសសំអាត និង ប្រឆាំងអំពើពុករលួយនៃរដ្ឋសភា ផងដែរនោះ បានលើកឡើងអំពីជំហ របស់គណបក្សសង្គ្រោះជាតិ ដោយអះអាងថា ប្រសិនបើគណបក្សខ្លួន ឈ្នះឆ្នោតបានទៅដឹកនាំរដ្ឋាភិបាល នៅអាណត្តិទី៦ គឺនៅឆ្នាំ២០១៨ខាងមុខនេះ គ្រប់សមាជិកទាំងអស់ត្រូវតែក្លាយជាគំរូ និងបង្ហាញពីភាពស្អាតស្អំរបស់ខ្លួន។ លោកបានលើកឡើងបែបនេះ នៅក្នុងកិច្ចសម្ភាសជាមួយអ្នកសារព័ត៌មាន នៅក្នុងសន្និសីទស្ដីពី «ការប្រកាសទ្រព្យសម្បត្តិដោយស្ម័គ្រចិត្ត» ដែលរៀចំឡើងដោយ អង្គការគណនេយ្យភាពកម្ពុជា។ ប្រភព៖ ThmeyThmey
លោក ញឹក ប៊ុនឆៃ៖ អ្នកនយោបាយ ដែលមានរឿងអាស្រូវស្នេហា នឹងមានវាសនា ដូចសម្ដេចក្រុមព្រះ
បណ្ដាញសង្គមហ្វេសប៊ុក និងសារព័ត៌មានមួយចំនួន សង្ស័យសំឡេងសាសងស្នេហា រវាងបុរសម្នាក់ និងស្ត្រីម្នាក់ឈ្មោះអាមុំ ដែលបានផ្ទុះឡើង តាមរយៈការបង្ហោះលើសង្គមហ្វេសប៊ុកមួយ មានឈ្មោះថា Mon Srey នោះថា ជាសំឡេងឯកឧត្តម កឹម សុខា ។ លោក ញឹក ប៊ុនឆៃ វាយតម្លៃថា បើអ្នកនយោបាយមានករណីផ្ទុះរឿងអាស្រូវស្នេហានោះ នឹងធ្វើឲ្យពួកគេបាត់បង់ប្រជាប្រិយភាព ហើយនឹងបរាជ័យ ដូចសម្ដេចក្រុមព្រះ នរោត្តម រណឫទ្ធិ។ ឆ្លើយនឹងសំនួររឿងអាស្រូវស្នេហា ដែលសារព័ត៌មានថ្មីៗ សួរទាក់ទងនឹងសំឡេង ដែលគេចាត់ទុកថា ជាសំឡេងរបស់ឯកឧត្តម កឹម សុខា នោះ លោក ញឹក ប៊ុនឆៃ ក៏មិនហ៊ានសន្និដ្ឋាន លើសម្លេងឆ្លើយឆ្លងស្នេហានេះដែរ តែលោកបែរជារំឮកភ្លាមពីប្រវត្តិ របស់សម្ដេចក្រុមព្រះថា ទ្រង់ក៏ជាអ្នកនយោបាយ ដែលធ្លាប់មានភរិយាច្រើន ដែលធ្វើឲ្យបាត់បង់ប្រជាប្រិយភាពរបស់គណបក្ស និងបាត់បង់ជំនឿចិត្តពីសំណាក់មន្ត្រីបក្ស និងអ្នកគាំទ្រផងដែរ។ ប្រភព៖ThmeyThmey
បក្សប្រឆាំង ហៅការបញ្ចេញរឿងអាស្រូវ ស្នេហារបស់លោក កឹម សខា ថាជារឿងអត់ប្រយោជន៍
គណបក្សប្រឆាំងមិនបកស្រាយអ្វីឡើយអំពីខ្សែអាត់សំឡេង ដែលគេចាត់ទុកថា ជាសំឡេងឆ្លើយឆ្លងរវាងប្រធានស្ដីទីគណបក្សសង្គ្រោះជាតិ និងស្ត្រីម្នាក់តាមទូរស័ព្ទ។ នៅចុងខែកុម្ភៈ និងដើមខែមីនា នេះ លោក កឹម សុខា ត្រូវបានគេវាយលុកពីរឿងអាស្រូវស្នេហាជាថ្មីម្ដងទៀតជាមួយនារីវ័យក្មេងម្នាក់ ដែលគេសន្មតថាជាស្រីកំណាន់របស់លោក។ ចំណែកអ្នកវិភាគសង្គមចាត់ទុកថា រឿងរ៉ាវចម្រូងចម្រាសនេះ វាប្រៀបដូចជាល្បែងនយោបាយ ដែលមានគេរៀបចំទុក។ ថ្វីបើ លោក កឹម សុខា មិនបានបកស្រាយអ្វីជុំវិញ រឿងអាស្រូវរបស់លោកជាថ្មីទៀត អំពីសម្ពន្ធស្នេហានេះក្តី ប៉ុន្តែនៅក្នុងបណ្ដាញសង្គមផ្ទាល់ របស់លោកវិញ លោក កឹម សុខា សរសេរថា "កុំឈ្លោះ កុំឆ្លើយ និងកុំឆ្លង"។ លោក កឹម សុខា បញ្ចេញសារនយោបាយរបស់លោក ដោយអំនួតទៀតថា គណបក្សប្រឆាំងកំពុងដើរលើផ្លូវត្រូវហើយ គណបក្សនេះកំពុងតែរួបរួមគ្នាយ៉ាងរឹងមាំ។ ទាំងនេះហើយជាចំណុចខ្លាំង។ លោកបន្តថា«ធម្មតាសេចក្ដីថ្លែងការណ៍របស់គណបក្សមួយៗ គេនិយាយពីរឿងជាតិ។ ដូច្នេះយើងឥតយកចិត្តទុកដាក់ទៅលើរឿងទាំងអស់នោះទេ។ ដូចខ្ញុំបាននិយាយអ៊ីចឹង បើនិយាយពីមូលដ្ឋានច្បាប់ វាខុសច្បាប់បាត់ទៅហើយ»។ ប្រភព៖ RFA
ពលរដ្ឋខេត្តស្វាយរៀង ចោទវៀតណាមថា បន្តសង់ផ្លូវទន្ទ្រាន ចូលដីខ្មែរជាង៥០០ហិកតា
ពលរដ្ឋនៅខេត្តស្វាយរៀង ចោទអាជ្ញាធរវៀតណាម ថានៅតែបន្តសាងសង់ផ្លូវទន្ទ្រាន ចូលដីខ្មែររាប់រយហិកតារនៅតាមក្រវាត់ព្រំដែននាស្រុកចន្ទ្រា ខេត្តស្វាយរៀង ដែលផ្ទុយនឹងកិច្ចព្រមព្រៀងព្រំដែន នៃភាគីទាំងពីរ គឺកម្ពុជា-វៀតណាម ដែលឲ្យផ្អាកសកម្មភាពឈូសឆាយ ធ្វើហេដ្ឋារចនាសម្ព័ន្ធនានាតាមព្រំដែន មុនមានដំណោះស្រាយ។ ជុំវិញរឿងនេះ គណៈកម្មាធិការចម្រុះខណ្ឌសីមា និងបោះបង្គោលព្រំដែនកម្ពុជា ថាមិនទាន់ទទួលរបាយការណ៍ច្បាស់លាស់ទេ។ ចំណែកអាជ្ញាធរមូលដ្ឋានអះអាងថា បានបញ្ជូនសំណុំរឿងនេះ ទៅកាន់ថ្នាក់លើពិនិត្យជាយូរមកហើយ។ ទឹកដីខ្មែរនៅតាមបណ្ដោយព្រំដែនកម្ពុជា-វៀតណាម ចំនួន ៤០០ហិកតារទៅ ៥០០ហិកតារ ដែលប្រជាពលរដ្ឋរស់នៅឃុំចន្ទ្រា ស្រុកចន្ទ្រា ខេត្តស្វាយរៀង អះអាងថា បានធ្លាក់ចូលក្នុងកណ្ដាប់ដៃវៀតណាមនោះ គឺចាប់ពីបង្គោលព្រំដែនលេខ ១៩៤ ដល់បង្គោលលេខ១៩៨។ ប្រភព៖ RFA
សហភាពអឺរ៉ុប ផ្ដល់ជំនួយដល់សង្គមស៊ីវិល ដើម្បីតាមដានកំណែទម្រង់វិស័យអប់រំ
សហភាពអឺរ៉ុប បានផ្ដល់ប្រាក់ជាង ៨០ម៉ឺនដុល្លារសហរដ្ឋអាមេរិក ដល់សង្គមស៊ីវិល ដើម្បីតាមដានការអនុវត្តគោលនយោបាយកំណែទម្រង់វិស័យអប់រំ។ សង្គមស៊ីវិលដែលធ្វើការងារ ផ្នែកអប់រំសង្កេតឃើញថា កម្ពុជាមានគោលនយោបាយកំណែទម្រង់ វិស័យអប់រំល្អ ក៏ប៉ុន្តែខ្វះការអនុវត្ត ឲ្យមានប្រសិទ្ធភាព។ គម្រោងនេះមានឈ្មោះថា "ការកៀរគរសង្គមស៊ីវិល ក្នុងការដោះស្រាយភាពខ្វះចន្លោះ នៃការអនុវត្តកំណែទម្រង់វិស័យអប់រំ" ដោយត្រូវចាប់អនុវត្តពីឆ្នាំ២០១៦ ដល់ឆ្នាំ២០១៨។ ប្រភព៖ RFA
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]