ខេត្តបាត់ដំបង ៖ ស្ត្រីម្នាក់ដែលគេស្គាល់ថា ជាថៅកែអាហារដ្ឋាន «គោដុតម្លប់ដូង» បានបើករថយន្តបុកសិស្សស្រីម្នាក់ដែលកំពុងជិះម៉ូតូ រួចចុះទះកំផ្លៀង និងជេរប្រមាថនាងយ៉ាងចាស់ដៃ កាលពីរសៀលថ្ងៃទី១៦ មករា នៅចំណុចផ្លូវលំមួយកន្លែង ក្នុងភូមិវត្តគរ សង្កាត់វត្តគរ ក្រុងបាត់ដំបង ហើយថែមទាំងរារាំងមិនឲ្យនគរបាលចរាចរណ៍ចុះអនុវត្តច្បាប់ទៀត ដោយសារតែស្ត្រីរូបនេះ ទំនងអាងខ្នងលោកអធិការក្រុងបាត់ដំបង ជួយអន្តរាគមន៍ពីក្រោយ។
លោកម៉ែន បូរី នាយផ្នែកចរាចរណ៍ខេត្តបានឲ្យដឹងថា ស្ត្រីបង្កគ្រោះថ្នាក់ចរាចរណ៍នោះឈ្មោះតាំង សុគន្ធា អាយុ៣១ឆ្នាំ ជាថៅកែអាហារដ្ឋាន «គោដុតម្លប់ដូង» មានទីតាំងនៅក្បែរផ្លូវជាតិលេខ៥៧ ក្នុងភូមិវត្តគរ សង្កាត់វត្តគរ ក្រុងបាត់ដំបង ជិះរថយន្តម៉ាកឡិចស៊ីស RX300 ពណ៌ស្ករ គ្មានស្លាកលេខ រីឯជនរងគ្រោះឈ្មោះកែវ គឹមលួ ភេទស្រី អាយុ២៥ឆ្នាំ ជាសិស្ស រស់នៅភូមិថ្មី ឃុំកំពង់ព្រៀង ស្រុកសង្កែ ជិះម៉ូតូម៉ាកហុងដាឌ្រីម ពាក់ស្លាកលេខបាត់ដំបង 2R-7856 ។
លោកបន្តថា ម្ចាស់ហាងគោដុតម្លប់ដូងនោះ បើករថយន្តបុកម៉ូតូនារីកូនសិស្ស ហើយព្យាយាមបើករត់តែត្រូវនារីរងគ្រោះរារាំង ទើបធ្វើឲ្យស្ត្រីនោះក្ដៅក្រហាយក៏ចុះពីរថយន្តទៅទះកំផ្លៀង ហើយជេរប្រមាថនាងកប់ៗមាត់បង្កឲ្យមានការភ្ញាក់ផ្អើល រួចស្ត្រីរូបនេះបើករថយន្តទៅទុកខាងមុខហាងរបស់ខ្លួនធ្វើព្រងើយ ថែមទាំងរារាំងមិនឲ្យសមត្ថកិច្ចយករថយន្តទៅកាន់ស្នងការទៀត ដោយសារស្ត្រីបង្កទំនងអាងខ្នងលោកយឹម វិចិត្រ អធិការក្រុងបាត់ដំបង។ លោកបានបញ្ជាក់បន្ថែមថា ការប្រឈមមុខដាក់គ្នារវាងម្ចាស់រថយន្តបង្ក និងកម្លាំងសមត្ថកិច្ចបានអូសបន្លាយពេលជាច្រើនម៉ោង រហូតត្រូវសុំជំនួយពីកម្លាំងព្រហ្មទណ្ឌខេត្តបន្ថែមទៀត។ លុះដល់ម៉ោង៦ល្ងាចថ្ងៃដដែល ក្រោយពីមានបទបញ្ជាពីលោកស្នងការខេត្ត ទើបម្ចាស់ព្រមប្រគល់រថយន្តឲ្យសមត្ថកិច្ច និងចូលខ្លួនទៅបំភ្លឺ ខណៈជនរងគ្រោះប្ដឹងពីបទបង្កគ្រោះថ្នាក់ចរាចរណ៍ និងប្ដឹងពីបទបង្ករបួស និងជេរប្រមាថផង។
ជុំវិញករណីនេះ កោះសន្តិភាពមិនអាចទំនាក់ទំនង សុំការបំភ្លឺពីលោកយឹម វិចិត្រ អធិការក្រុងបាត់ដំបងបានទេ នៅព្រឹកថ្ងៃទី១៧ មករា ដោយឡែក លោកម៉េង លៀង ប្រធានការិយាល័យព្រហ្មទណ្ឌកំរិតស្រាល ក៏បានបញ្ជាក់ដែរថា ការិយាល័យរបស់លោកក៏បានទទួលពាក្យបណ្ដឹងនារីរងគ្រោះឈ្មោះកែវ គឹមលួ នោះដែរ កាលពីល្ងាចថ្ងៃទី១៦ មករា។ លោកថា នារីរងគ្រោះបានបប្ដឹងចោទប្រកាន់ម្ចាស់រថយន្តនោះពីបទ «បង្ករបួសស្នាម» ហើយមន្ត្រីជំនាញរបស់លោកកំពុងចាត់វិធានការណ៍លើករណីនេះទៅតាមនីតិវិធីច្បាប់ហើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
