រាជធានីភ្នំពេញ ៖ បុរសម្នាក់ជាកម្មករសំណង់ក្រោយពីផឹកស៊ីស្រវឹងត្រូវម្តាយក្មេកស្តីបន្ទោសបន្តិចបន្តួចសោះក៏តូចចិត្តមកលោតទឹកសម្លាប់ខ្លួនពីលើស្ពានព្រះមុនីវង្សចាស់ ជិតគល់ស្ពានខាងលិច ស្ថិតក្នុងសង្កាត់ច្បារអំពៅទី២ ខណ្ឌមានជ័យ កាលពីវេលាម៉ោង៨និង៣០នាទីយប់ថ្ងៃទី៨ សីហា ។ ប៉ុន្តែការប៉ុនប៉ងធ្វើអត្តឃាតនេះមិនបានសម្រេចឡើយ ព្រោះពេលលោតទឹកនោះបែរជាធ្លាក់លើដីគោកមាត់ច្រាំងទៅវិញបណ្តាលឱ្យរូបគេបាក់ចង្កេះរងរបួសជាទម្ងន់ ។
បុរសខាងលើនេះឈ្មោះ យស់ យៀប អាយុ២៩ឆ្នាំ ជាកម្មករសំណង់ ស្នាក់នៅការដ្ឋានសំណង់ក្នុងសង្កាត់ចាក់អង្រែលើ ខណ្ឌមានជ័យ និងមានស្រុកកំណើតនៅខេត្តព្រៃវែង ។ក្រោយពេលកើតហេតុស្ត្រីជាប្រពន្ធបានមកមើលនិយាយថា មុនពេលប្តីនាងមកលោតទឹកសម្លាប់ខ្លួននេះគឺប្តីនាងបានផឹកស៊ីជាមួយមិត្តភក្តិនៅក្នុងការដ្ឋានសំណង់រហូតដល់ស្រវឹងក៏ទាស់ពាក្យសម្តីជាមួយម្តាយបង្កើតរបស់នាងរហូតឈានដល់ការស្តីបន្ទោស និងស្រែកគំហកដាក់គ្នាថែមទៀតផង ។
ស្ត្រីជាប្រពន្ធបានបន្តថា បន្ទាប់ពីម្តាយនាងស្តីបន្ទោសហើយនោះ ប្តីនាងបានដើរចេញពីការដ្ឋានទាំងទឹកមុខមិនសប្បាយចិត្ត ប៉ុន្តែពេលប្តីនាងដើរចេញទៅនោះរូបនាងមិនបានចាប់អារម្មណ៍ថា គាត់ទៅណាទេ ស្រាប់តែបានប្រហែលជា១ម៉ោងក៏ទទួលដំណឹងថា ប្តីនាងទៅលោតទឹកសម្លាប់ខ្លួនពីលើស្ពានព្រះមុនីវង្សចាស់ ។
សាក្សីដែលបានឃើញហេតុការណ៍នេះបាននិយាយថា មុនពេលកើតហេតុគេឃើញបុរសរូបនេះដើរឡើងលើស្ពានព្រះមុនីវង្សចាស់ទាំងទឹកមុខក្រៀមក្រំដូចជាមានវិបត្តិអ្វីមួយ ។ ពេលដើរជិតដល់ពាក់កណ្តាលស្ពានស្រាប់តែបុរសនេះបានឡើងលើបង្កាន់ដៃស្ពានរួចហក់ចុះក្រោមដោយគ្មាននរណាហាមឃាត់ទាន់ឡើយ ។ ប៉ុន្តែការលោតចុះនោះមិនធា្លក់ចូលទឹកទន្លេទេ បែរជាធា្លក់ចំដើមឈើ និងដីនៅក្រោមស្ពានទៅវិញបណ្តាលឱ្យរងរបួសបាក់ចង្កេះ ត្រូវបានដឹកបញ្ជូនទៅព្យាបាលនៅមន្ទីរពេទ្យកាល់ម៉ែត ។
មន្ត្រីប៉ូលិសយាមនៅគល់ស្ពានព្រះមុនីវង្សបានអំពាវនាវដល់បងប្អូនប្រជាពលរដ្ឋទាំងអស់សូមមេត្តាកុំយកតម្រាប់តាមបុរសម្នាក់នេះឱ្យសោះ ព្រោះការលោតទឹកសម្លាប់ខ្លួនគឺជាភាពល្ងង់ខ្លៅខ្លាំងណាស់ គ្មានបញ្ហាណាដែលយើងមិនអាចដោះស្រាយបានឡើយឱ្យតែយើងតាំងចិត្តដោះស្រាយវាមិនចាំបាច់មកលោតទឹកសម្លាប់ខ្លួនឯងចោលប្រពន្ធកូនដូច្នេះទេ ៕
ផ្តល់សិទ្ធដោយ កោះសន្តិភាព
បញ្ចូលអត្ថបទ ៖ បុប្ផា កោះ
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
