រាជធានីភ្នំពេញ ៖ ស្ត្រីអាណិកជនខ្មែរនៅសហរដ្ឋអាមេរិកម្នាក់បានទម្លាយព័ត៌មានដ៏គួរឱ្យចាប់អារម្មណ៍មួយ ដោយចោទប្រកាន់តារាសម្តែងលោកហេង ដារី ថា បោកប្រាស់នាងទាំងស្នេហា និងប្រាក់ក្នុងពេលទាក់ទងគ្នាតាមអីុនធើរណេត ។
ថ្លែងប្រាប់កោះសន្តិភាពតាមទូរស័ព្ទពីទឹកដីអាមេរិក អ្នកស្រី Leang Kem អះអាងថា អ្នកស្រីបានទាក់ទងជាមួយ លោកហេង ដារី តាមហ្វេសប៊ុក ក្នុងរយៈពេលប៉ុន្មានខែចុងក្រោយនេះ និងចាប់ផ្តើមស្រឡាញ់គ្នា ។ ទន្ទឹមនេះអ្នកស្រី Leang Kem បានផ្តល់លុយជាបន្តបន្ទាប់តាមតម្រូវការ របស់លោកហេង ដារី សម្រាប់យកទៅប្រើប្រាស់បញ្ហា ផ្សេងៗ។ តាមរយៈការជួយជា បន្តបន្ទាប់នេះលោកហេង ដារី ស្នើសុំលុយពីអ្នកស្រីចំនួន២៥០០ដុល្លារ ដើម្បីរត់ការឡើងបុណ្យសក្តិ ប៉ុន្តែអ្នកស្រីបានឆ្លើយតបថា នឹងផ្តល់ឱ្យនៅខែកុម្ភៈ ពេលអ្នកស្រីទៅស្រុកខ្មែរ ។ លើសពីនេះក៏មានគម្រោង ទិញផ្ទះដាក់ឈ្មោះរួមគ្នាផងដែរ ។
អ្នកស្រី Leang Kem ឱ្យដឹងថា ក្នុងរង្វង់មួយខែ ថ្មីៗកន្លងមកអ្នកស្រីបានផ្តល់លុយឲ្យលោកហេង ដារី ចំនួនជាង ១ពាន់ដុល្លារ ក្នុងនោះអ្នកស្រីក៏មាន គម្រោងផ្តល់លុយឲ្យតារា រូបនេះបន្តបន្ទាប់ទៀតដោយក្នុង មួយខែអ្នកស្រីសន្យានឹង ជួយពី៤០០ទៅ៥០០ដុល្លារ ។ នៅទីបំផុតអ្នកស្រី Leang Kem បានដឹងថាលោកហេង ដារី បោកប្រាស់ ព្រោះស្របពេល លោកហេង ដារី ទាក់ទងអ្នកស្រី លោកក៏បានលួចទាក់ទងជាមួយនារីផ្សេងទៀតឈ្មោះ Vanty You ជាងមួយឆ្នាំមកហើយ ក្រៅពីនេះក៏មានខ្ទើយម្នាក់ ដែររស់នៅអាមេរិកដូចគ្នា ។
ដោយដឹងរឿងនេះអ្នកស្រីLeang Kem សម្រេចចិត្តដកខ្លួនចេញពីលោកហេង ដារី វិញ ដោយអ្នកស្រីមិ នចង់ឲ្យមានអ្នកទី៣ ចូលទាក់ទងក្នុងរឿងស្នេហានេះឡើយ ហើយអ្នកស្រីមិននឹកស្មាដល់ថា ក្នុងនាមជាតារាមួយរូបលោកហេង ដារី ធ្វើរឿងដ៏អាម៉ាស់នេះឡើយ ។
អ្នកស្រី Leang Kem បញ្ជាក់ថា ប្រហែលជាអ្នកស្រីធ្វើបុណ្យល្អ បានជារឿងហេតុនេះធ្លាយឲ្យអ្នកស្រីដឹងលឿន បើមិនដូច្នេះទេអ្នកស្រីប្រាកដជាត្រូវ បង់ខាតប្រាក់រហូតដល់រាប់ម៉ឺនដុល្លារទៅឲ្យលោកហេង ដារី ។
ទោះជាយ៉ាងណាក្តីប្រាក់ដែលអ្នកស្រី Leang Kem ចំណាយទៅលើលោកហេង ដារី កន្លងមក អ្នកស្រីថា មិនសោកស្តាយឡើយ ប៉ុន្តែអ្នកស្រីខឹងលោកហេង ដារី ដែលបោកប្រាស់ និងយកស្នេហាអ្នកស្រីធ្វើជាការលេងសើច ។
អ្នកស្រីLeang Kem ចង់ឲ្យលោកហេង ដារី មានជំហរច្បាស់លាស់ តើយកនាង Vanty You ជាគូអនាគតពិតប្រាកដ ឬយ៉ាងណា ព្រោះ អ្វីៗនៅតែស្រពេច ស្រពិលនៅឡើយ ហើយក្នុងករណីលោកហេង ដារី យកនាង Vanty You ជាគូមែននោះ អ្នកស្រីចូលរួមត្រេកអរ ។
ពាក់ព័ន្ធការចោទប្រកាន់នោះតារាសម្តែងលោកហេង ដារី បានបកស្រាយប្រាប់កោះសន្តិភាពតាម ទូរស័ព្ទកាលពីពេល ថ្មីៗកន្លងមកថា លោកមិន ដែលបោកប្រាស់អ្នកណាម្នាក់ ហើយការលើកឡើងរបស់អ្នកស្រី Leang Kem គឺលោកមិនអាចទទួលយកបានទេ ។
លោកហេង ដារី លើកជាឧទាហរណ៍ថា «ធម្មតាពាក្យថាបោក គឺលុះត្រាតែយើងចូលហ៊ុនគ្នាធ្វើអ្វីមួយ ហើយយើងស៊ីដាច់គេ នោះទើបគេហៅថាជាការបោកប្រាស់ តែនេះបើគ្រាន់ជាលក្ខណៈស្នេហា ហើយគេនៅអាមេរិកគេ មានលុយច្រើនជាងយើង គេផ្តល់ឲ្យយើង ហើយពេលដែល ស្នេហានោះមិនត្រូវគ្នា គេបែរជាចោទយើងថាបោកគេទៅវិញ ។ ចំពោះពាក្យដែលថា ខ្ញុំបោកប្រាស់ស្នេហានោះ គឺមិនអាចនិយាយយ៉ាងដូច្នេះឡើយ ព្រោះស្នេហាគឺគេប្រើចិត្តនិងចិត្ត មិនមែននិយាយថាបោក ប្រាស់នោះឡើយ ។ ប្រសិនបើយើងទាក់ទងនារីណាម្នាក់ ហើយនារីម្នាក់នោះអន់ចរិត តើយើងអាចបន្តទៀត ឬយ៉ាងណា ហើយប្រសិនបើស្នេហាមួយមិនសមប្រកប ជាធម្មតាយើងមានសិទ្ធិទៅរកមនុស្សម្នាក់ទៀតដែលល្អជាងនេះ» ។
លោកហេង ដារី មិនអាចទទួលយកបានការលើកឡើងរបស់ស្ត្រីអាណិកជនម្នាក់នោះឡើយ ព្រោះចាត់ទុកការ ជួយគ្នាក្នុងចំណងស្នេហាមិនមែនជារឿង បោកប្រាស់ទេ ផ្ទុយទៅវិញវាគឺគ្រាន់តែជាការជួយក្នុងនាមជាអ្នកស្រឡាញ់គ្នាប៉ុណ្ណោះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
