ខេត្តត្បូងឃ្មុំ ៖ មានហេតុការណ៍ភ្ញាក់ផ្អើលមួយ បន្ទាប់ពីប្រជាពលរដ្ឋនៅក្នុងភូមិតាំអាំ ឃុំកក់ ស្រុកពញាក្រែកមានអាការៈវិលមុខ ងងិតភ្នែក និងទន់ដៃ-ជើង ចាប់តាំងពីថ្ងៃទី៤ រហូតមកដល់យប់ថ្ងៃទី៦ តុលា ២០១៥ គឺមានចំនួន២៤អង្គ/នាក់ ហើយត្រូវបានគេដឹកតាមរថយន្តសាមុយរបស់មន្ទីរពេទ្យ មកសង្គ្រោះបន្ទាន់នៅមន្ទីរពេទ្យស្រុកពញាក្រែក ក្នុងនោះបណ្តាលឱ្យស្លាប់បន្តបន្ទាប់ចំនួន៣នាក់ហើយ ។
តាមប្រភពពីសមត្ថកិច្ចខេត្តត្បូងឃ្មុំឱ្យដឹងថា អ្នកដែលស្លាប់នោះ មានចំនួន៣នាក់ ១-ឈ្មោះចាន់ សារុន ភេទប្រុស អាយុ៦៦ឆ្នាំស្លាប់នៅនឹងផ្ទះ ២-ឈ្មោះមុត ផេង ភេទស្រី អាយុ៤០ឆ្នាំ ស្លាប់ពេលបញ្ជូនទៅសង្គ្រោះនៅមន្ទីរពេទ្យខេត្តកំពង់ចាម ហើយរហូតមកដល់វេលាម៉ោង០៣ និង៣០នាទីរសៀលថ្ងៃទី៦ តុលា ២០១៥ ស្លាប់ម្នាក់ទៀតឈ្មោះសោម វុធ ភេទប្រុស អាយុ៣៦ឆ្នាំ ។
សមត្ថកិច្ចបន្តថា នៅពេលដែលមានហេតុការណ៍ខាងលើនេះកើតឡើង លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត បានចាត់ឱ្យកម្លាំងជាច្រើននាក់ចុះទៅកាន់ភូមិ-ឃុំកើតហេតុ ដើម្បីតាមដានសភាពជំងឺ និងហៅរថយន្តមកដឹកប្រជាពលរដ្ឋដែលកើតជំងឺអាការៈបែបនេះមកសង្គ្រោះជាបន្ទាន់នៅមន្ទីរពេទ្យបង្អែកស្រុកពញាក្រែក មានដូចជាឈ្មោះ១-ឈ្មោះឈន សន ភេទស្រី អាយុ៥៥ឆ្នាំ ២-ឈ្មោះធុន ថុល ភេទប្រុស អាយុ២៩ឆ្នាំ ៣-ឈ្មោះស៊ឹម បុរី ភេទប្រុស អាយុ៣០ឆ្នាំ ៤-ឈ្មោះភួង សុខហន ភេទប្រុស អាយុ៤៧ឆ្នាំ និង៥-ឈ្មោះវ៉ា អាត ភេទប្រុស អាយុ៣៥ឆ្នាំ ។
កម្លាំងប៉ុស្តិ៍រដ្ឋបាលមូលដ្ឋាន ក៏ដូចជាស្រុកបានចុះទៅសហការជាមួយជំនាញសុខាភិបាល ដោយមានរថយន្តជាច្រើនគ្រឿងចេញទៅជួយសង្គ្រោះអ្នកភូមិដឹកមកកាន់មន្ទីរពេទ្យជាបន្តបន្ទាប់រហូតដល់វេលាម៉ោងជាង៩យប់ កើនដល់ទៅ២៤អង្គ/នាក់ហើយ ដោយបានដេករដូករណែលពេញក្នុងមន្ទីរពេទ្យ ដែលចំនួនអាចនឹងកើនឡើងថែមទៀត ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
