ខេត្តស្វាយរៀង ៖ រថយន្ដកូរ៉េដឹកកម្មករ១គ្រឿងបានដាច់ទ្រុងក្រោយ បណ្តាលឱ្យចាក់កម្មករចោលមកលើចិញ្ចើមផ្លូវជាង៤០នាក់ឱ្យសង្កត់សង្កិនលើគ្នារដូករណែលធ្វើឱ្យរបួសធ្ងន់-ស្រាល២៧នាក់ ។ កម្មករស្រី-ប្រុស ដែលរបួសធ្ងន់-ស្រាលទាំង២៧នាក់ ក្នុងនោះមានតែប្រុសមា្នក់ទេ ហើយអ្នករបួសទាំងអស់ត្រូវបានដឹកបញ្ជូនទៅកាន់មន្ទីរពេទ្យខេត្ដទាំងយប់ដើម្បីធ្វើការសង្គ្រោះ ។ គ្រោះថា្នក់ចរាចរណ៍ដ៏គួរឱ្យរន្ធត់នេះ បានកើតឡើងនៅលើកំណាត់ផ្លូវជាតិលេខ១ វេលាម៉ោង៥ល្ងាចថ្ងៃទី៣១ កក្កដា នៅចំណុចខាងលិចខ្លោងទា្វរចូលតំបន់សេដ្ឋកិច្ចពិសេសតាយសេងចម្ងាយ២០ម៉ែត្រ ស្ថិតក្នុងភូមិតាបឹប សង្កាត់បាវិត ក្រុងបាវិត ។
នៅក្នុងហេតុការណ៍នេះ កម្មករដែលរងរបួសធ្ងន់មានចំនួន៨នាក់ និងរបួសស្រាលចំនួន១៩នាក់ មានអ្នកខ្លះធ្វើការនៅក្នុងរោងចក្រស្ថិតនៅក្នុងតំបន់សេដ្ឋកិច្ចពិសេសមេនហាតធេន និងមួយចំនួនទៀតធ្វើការនៅក្នុងរោងចក្រក្នុងតំបន់សេដ្ឋកិច្ចពិសេសតាយសេង ហើយកម្មករទាំងអស់នេះភាគច្រើនមានទីលំនៅក្នុងក្រុងសា្វយរៀង ។
តាមការរៀបរាប់របស់កម្មករម្នាក់ឈ្មោះ ស្រី សុភាព អាយុ៣៣ឆាំ្ន ដែលធ្វើការនៅក្នុងរោងចក្របេសវ៉េ ក្នុងតំបន់សេដ្ឋកិច្ចពិសេសមេនហាតធេន បានឱ្យដឹងថា រថយន្ដកូរ៉េចំណុះមួយតោនកន្លះមួយគ្រឿងនេះ តែងដឹកពួកគេចេញពីរោងចក្រត្រឡប់ទៅផ្ទះវិញជារៀងរាល់ថ្ងៃ មានគ្នាប្រមាណជាង៤០នាក់ ឈរប្រជ្រៀតគ្នាដូចប្រអប់ឈើគូស ។ នៅពេលកើតហេតុនោះ គឺរថយន្តដែលកំពុងបើកបរអែបមកចិញ្ចើមថ្នល់ ស្រាប់តែកង់រថយន្ដផ្នែកខាងស្ដាំធ្លាក់គែមថ្នល់ ក៏បណ្តាលឱ្យផ្អៀងរថយន្ដមួយចំហៀង ហើយក៏ទាញយោគកម្មករដែលជិះលើទ្រុងក្រោយទាំងអស់ឱ្យដួលទ្រេតលើគ្នា ក៏បណ្ដាលឱ្យទ្រុងរថយន្ដទាំងមូលផ្នែកខាងក្រោយទ្រាំទ្រទម្ងន់មិនបានក៏ដាច់ចេញពីតួរថយន្ដ ហើយចាក់កម្មករទាំងអស់ទៅលើដីជម្រាលផ្លូវសង្កត់ពីលើគា្នសន្លប់រដូករណែលតែម្ដង ។
ប្រភពពីសមត្ថកិច្ចប៉ូលិសក្រុងបាវិត និយាយថា ក្រោយពីហេតុការណ៍នេះបានកើតឡើងភ្លាម បានធ្វើឱ្យមានការកកស្ទះចរាចរណ៍នៅលើកំណាត់ផ្លូវជាតិលេខ១ ត្រង់ចំណុចកើតហេតុខាងលើ ស្ទើរតែមិនអាចធ្វើចរាចរណ៍បានរហូតសមត្ថកិច្ចជាច្រើននាក់ខំប្រឹងសម្រួលចរាចរណ៍បែកញើសដូចគ្រាប់ពោត ។ ការស្ទះនេះ គឺដោយសារតែក្រុមរថយន្ដដឹកកម្មករផ្សេងៗទៀតរាប់សិបគ្រឿង ដែលដឹកកម្មករចេញពីធ្វើការតាមក្រោយ បានឃើញហេតុការណ៍ និងឃើញក្រុមកម្មករនៅសន្លប់រដូករណែលលើផ្លូវ មា្នក់ៗភ័យខ្លាចមានបងប្អូនរបស់ខ្លួនស្ថិតក្នុងហេតុការណ៍នោះដែរ ក៏នាំគា្នឈប់ហើយប្រជ្រៀតគ្នាទៅរកមើលកាន់តែច្រើនឡើងៗរហូតទាល់តែមានការអន្ដរាគមន៍ពីសមត្ថកិច្ចទើបកម្មករទាំងនោះ នាំគា្នឡើងរថយន្តចេញទៅជាបណ្ដើរៗ។ ក្នុងហេតុការណ៍នេះដែរ ប៉ូលិសក្រុងក៏បានទំនាក់ទំនងហៅរថយន្ដសាមុយមន្ទីរពេទ្យដឹកកម្មកររងគ្រោះទៅកាន់គ្លីនិកផាសុខភាព ហើយក្រោយមកក៏បានហៅរថយន្ដសាមុយមន្ទីរពេទ្យបង្អែកជីភូ និងមន្ទីរពេទ្យបង្អែកសា្វយរៀង មកដឹកទៅព្យាបាលបន្ដនៅមន្ទីរពេទ្យបង្អែកខេត្ដសា្វយរៀងទាំងអស់ ។
គ្រូពេទ្យព្យាបាលនិយាយថា នៅក្នុងហេតុការណ៍នេះ បណ្ដាលឱ្យកម្មការិនីចំនួន៨នាក់របួសធ្ងន់ ១-ឈ្មោះ ស្រី សុភាព អាយុ៣៣ឆាំ្នរងរបួសបែកក្បាល បាក់ខ្ទង់ច្រមុះ និងត្រូវទ្រុងរថយន្ដសង្កត់ពីលើ ២-ឈ្មោះ កាន់ ផល្លា អាយុ២១ឆាំ្ន រងរបួសបែកក្បាល និងរយះកំភួនជើងទាំងសងខាង ៣-ឈ្មោះ ម៉ៅ រ៉ាវិន អាយុ៤៦ឆាំ្ន របួសបែកក្បាល និងរយះកំភួនជើងទាំងសងខាង ៤-ឈ្មោះ សុខ ចិន្ដា អាយុ២៥ឆាំ្ន របួសបាក់ចង្កេះ និងត្រូវកម្មករដូចគា្នសង្កត់ពីលើ ៥-ឈ្មោះ សៀវ ចាន់នី អាយុ១៨ឆាំ្ន របួសបាក់ចង្កេះ និងបែកក្បាល ៦-ឈ្មោះ ព្រំ គន្ធា អាយុ៣៦ឆាំ្ន របួសបែកក្បាល និងដាច់ផ្ទៃមុខ ៧-ឈ្មោះ ហ៊ុន សាវុន អាយុ២២ឆាំ្ន របួសជាំដើមទ្រូង និងខ្លួនប្រាណនិយាយមិនចេញ និង៨-ឈ្មោះ សួន ចន្ថា អាយុ២២ឆាំ្ន ត្រូវគេជាន់ពីលើបណ្ដាលឱ្យរបួសជាំពេញខ្លួនប្រាណ និងសន្លប់បាត់ស្មារតីនៅនឹងកន្លែង ។ ដោយឡែកកម្មករ និងកម្មការិនីចំនួន១៩នាក់ទៀត គ្រាន់តែរបួសស្រាល និងជាង១០នាក់ផ្សេងទៀតពុំមានរងរបួសទេ៕
ផ្តល់សិទ្ធដោយ កោះសន្តិភាព
បញ្ចូលអត្ថបទ ៖ បុប្ផា កោះ
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]