ខេត្តពោធិ៍សាត់ ៖ បុរសម្នាក់ស្លាប់ភ្លាមៗនៅនឹងកន្លែង បន្ទាប់ពីខ្សែភ្លើងឆក់ ខណៈដៃសើមភ្លេចខ្លួនទៅកាន់ទូរស័ព្ទបញ្ចូលថ្ម ដែលហេតុការណ៍នេះ កើតឡើងកាលពីវេលាម៉ោង០៧ និង៣០នាទីយប់ថ្ងៃទី០២ កញ្ញា ២០១៥ ស្ថិតនៅក្នុងផ្ទះជនរងគ្រោះ ក្នុងភូមិសំរោង ឃុំក្បាលត្រាច ស្រុកក្រគរ ខេត្តពោធិ៍សាត់ ។
លោកខៀវ សុខា នាយប៉ុស្តិ៍រដ្ឋបាលនគរបាលក្បាលត្រាចបានឱ្យដឹងថា ជនរងគ្រោះឈ្មោះអាន សារិត ភេទប្រុស អាយុ២៩ឆ្នាំរស់នៅភូមិ-ឃុំកើតហេតុខាងលើ ។
បើតាមការសាកសួរពីស្ត្រីជាម្ដាយបានប្រាប់ថា នៅយប់នោះ គាត់ឃើញកូនរបស់គាត់កាន់ទូរស័ព្ទ និងប្រដាប់សាកទៅឈរដោតកន្លែងព្រីភ្លើង ។ គាត់មិនបានចាប់អារម្មណ៍ថា កូនគាត់ត្រូវខ្សែរភ្លើងឆក់នោះទេ ប៉ុន្តែឃើញឈរឆ្កឹងមិនកំរើកអ្វីទាំងអស់ ប្រហែល០៥នាទីក្រោយមក ស្រាប់តែដួលគ្រាំងតែម្ដង លុះពេលទៅទៅចាប់លើកកូនបានដាច់ខ្យល់ស្លាប់បាត់ទៅហើយ ក៏មានការភ្ញាក់ផ្អើលឆោឡោទាំងយប់តែម្ដង ។
លោកនាយប៉ុស្តិ៍បញ្ជាក់ថា ក្រោយពីពិនិត្យសាកសពឃើញថា ជនរងគ្រោះពិតជាស្លាប់ដោយខ្សែភ្លើងឆក់ពិតប្រាកដមែន ដោយសារយកប្រដាប់សាកថ្មទៅដោតព្រីទាំងដៃសើម បណ្ដាលឱ្យឆ្លងចរន្តអគ្គិសនីឆក់តែម្ដង ។
នេះក៏ជាមេរៀនមួយផងដែរ ដែលយើងត្រូវតែមានការយល់ដឹង និងប្រុងប្រយ័ត្នទាំងអស់គ្នា ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
