ខេត្តត្បូងឃ្មុំ ៖ មេខ្លោងជួញដូរ គ្រឿងញៀនម្នាក់ ឈ្មោះ ងួន នី ហៅឃ្លី ភេទប្រុស អាយុ៣៥ឆ្នាំ នៅភូមិមេមត់ផ្សារ ឃុំមេមត់ ស្រុកមេមត់ ដែលបានព្យាយាមរត់គេចខ្លួន ទៅសម្ងំនៅកន្លែងមួយនោះ ទីបំផុតត្រូវបានកម្លាំងសមត្ថកិច្ចតាមប្រមាញ់ចាប់ខ្លួនបាន កាលពីវេលាម៉ោង១១ និង១៥នាទីព្រឹក ថ្ងៃទី០២ ខែកញ្ញា ឆ្នាំ២០១៥ ត្រង់ចំណុចភូមិជីវ ឃុំស្រែចារ ស្រុកស្នួល ខេត្តក្រចេះ ដោយដកហូតបានថ្នាំញៀន ក្រាមពណ៌ស ១៦កញ្ចប់ធំ និង៣៨កញ្ចប់តូច កាំភ្លើងខ្លីកា៥៤មួយដើម និងម៉ូតូ២គ្រឿងផងដែរ ។
លោកវរសេនីយ៍ត្រី ហុង គឹមហឿន អធិការនគរបាល ស្រុកមេមត់បានប្រាប់ឲ្យដឹងថា ក្នុងពេលដែលរូបលោកមកកាន់តំណែងជាអធិការ នគរបាលស្រុកមេមត់នោះ គឺផ្អែកតាមបញ្ជារបស់ លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត ត្រូវយកចិត្តទុកដាក់ក្នុងការ បង្ក្រាបបទល្មើស ដែលលេចធ្លោជាងគេ គឺគ្រឿងញៀននៅក្នុងទឹកដីស្រុកមេមត់ រួមនឹងបទល្មើសផ្សេងៗទៀត ។
លោកវរសេនីយ៍ត្រីបន្តថា នាពេលកន្លងទៅថ្មីៗនេះបទល្មើស គ្រឿងញៀនត្រូវបានបង្ក្រាប ជាបន្តបន្ទាប់ ដូចជាតាមចាប់ជនសង្ស័យគ្រឿងញៀន លុះពេលចាប់បាននាំទៅឆែកឆេរផ្ទះ រឹបអូសបានឈើប្រណីត ជាង៥០០កំណាត់ រួមទាំងអាវុធខ្លី ១ដើមផងដែរ ។
ពេលដែលរូបលោកបាន ទទួលដីកាចាប់ខ្លួន ចុះថ្ងៃទី២៣ ខែមិថុនា ឆ្នាំ២០១៥ របស់លោក គង់ ចន្ទខេមរិន្ទ ចៅក្រមស៊ើបសួរនោះ ដោយបង្គាប់ឱ្យតាមចាប់ខ្លួនឈ្មោះ ឃ្លី ដែលជាមេខ្លោងម្នាក់ល្បីខាងជួញដូរ ថ្នាំញៀននៅស្រុកមេមត់នាពេលកន្លងមក ។ លោកឱ្យដឹងទៀតថា ក្រោយពីកម្លាំងសម្ងាត់បានស៊ើបដឹងថា ជននេះកំពុងតែសម្ងំលាក់ខ្លួននៅក្នុងស្រុកស្នួល ខេត្តក្រចេះ ក៏បានចាត់ឲ្យកម្លាំងក្រោមឱវាទ ចុះទៅជាបន្ទាន់នាព្រឹកថ្ងៃទី០២ ខែកញ្ញា ឆ្នាំ២០១៥ ដោយសហការជាមួយ នឹងនគរបាលស្រុកស្នួល ។
ក្នុងពេលដែល ចាប់ខ្លួនជនសង្ស័យនោះ គឺដកហូតបានវត្ថុតាង មួយចំនួនខាងលើ រួចបញ្ជូនមកកាន់អធិការដ្ឋាននគរបាលស្រុកមេមត់ ដើម្បីចាត់ការបន្តទៅ សាលាដំបូងខេត្ត ។
លោកអធិការនគរបាលស្រុកមេមត់បញ្ជាក់ថា ជននេះត្រូវបានចាប់ខ្លួន តាមដីកាដោយចោទប្រកាន់ពី បទជួញដូរដោយខុសច្បាប់នូវសារធាតុញៀន ដែលបានប្រព្រិត្តកាលពីថ្ងៃទី១៦ ខែមីនា ឆ្នាំ២០១៥ នៅភូមិក្ងោក ឃុំគគី ស្រុកមេមត់ ។ ក្រោយពេលចាប់ខ្លួនបានលើកនេះ ជនសង្ស័យត្រូវបានចោទប្រកាន់ បទល្មើសរហូតដល់ទៅ៣ ក្នុងនោះមាន ១-ចាប់តាមដីកា ២-ជួញដូរថ្នាំញៀន ជាក់ស្តែង និង៣-ប្រើប្រាស់អាវុធខុសច្បាប់ ។
សូមបញ្ជាក់ថា នៅពេលណាដែលកម្លាំង សមត្ថកិច្ចចាប់បានជនណា ម្នាក់តាមដីកានោះ លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត នឹងផ្តល់រង្វាន់ប្រាក់លើកទឹកចិត្ត ចំនួន១៥ម៉ឺនរៀល ឬលើសពីនេះផងដែរ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
