រាជធានីភ្នំពេញ ៖ នារីម្នាក់បានដួលម៉ូតូបោកក្បាល ខណៈត្រូវក្រុមចោរ២នាក់ជិះម៉ូតូ មកពីក្រោយឆក់យកកាបូបដែលនាងស្ពាយពីចំហៀង បន្សល់ទុកតែខ្សែកាបូបបន្តិចនៅជាប់នឹងស្មាម្ចាស់ កាលពីវេលាម៉ោង៨និង១៥នាទីយប់ ថ្ងៃទី២៦ កក្កដា នៅកែងផ្លូវលេខ៣៨០ និងផ្លូវលេខ៥១ ខាងកើតផ្សារបឹងកេងកង១ សង្កាត់បឹងកេងកង១ ខណ្ឌចំការមន ។
នារីដែលត្រូវចោរឆក់កាបូបនេះឈ្មោះ ចៅ ធារី អាយុ២៣ឆ្នាំ ស្នាក់នៅផ្ទះជួលលេខ០២២ ផ្លូវលេខ៦៣ សង្កាត់ទន្លេបាសាក់ ខណ្ឌចំការមន ។ នាងជិះម៉ូតូហ្វ៊ីណូ ពណ៌ក្រហម តាមផ្លូវលេខ៦៣ ពីកើតទៅលិចក្នុងទិសដៅស្របគ្នាជាមួយម៉ូតូសេ១២៥ ពណ៌ខ្មៅ ជិះគ្នា២នាក់ ជាយុវជនស្ទាវ ។ លុះពេលមកដល់ចំណុចខាងលើ ស្រាប់តែយុវជនទាំងពីរនាក់នោះ បានធ្វើសកម្មភាពឆក់យកកាបូបស្ពាយពីចំហៀងរបស់នាងរួចជិះគេចទៅបាត់ ធ្វើឱ្យនាងដួលម៉ូតូបោកក្បាលរងរបួស ព្រោះមិនបានពាក់មួកសុវត្ថិភាព និងមានការតក់ស្លុតយ៉ាងខ្លាំងក្នុងហេតុការណ៍នេះ ។
ក្រោយពេលកើតហេតុ ម្ចាស់ផ្ទះជួលរបស់នាងជិះម៉ូតូឆ្លងកាត់ឃើញក៏ទូរស័ព្ទប្រាប់បងប្អូននាង លុះពេលបងប្អូនប្រុសស្រីនាងមកដល់ក៏បានហៅរ៉ឺម៉កម៉ូតូដឹកយកទៅសង្គ្រោះនៅមន្ទីរពេទ្យ ។ ចំពោះកាបូបដែលជនសង្ស័យឆក់យកទៅបាត់នោះ គេពុំទាន់ដឹងថា តើមានរបស់ទ្រព្យអ្វីខ្លះនៅក្នុងនោះទេ ដោយសារនាងមិនទាន់អាចនិយាយបាន ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]