រាជធានីភ្នំពេញ៖ កាលពីថ្ងៃទី ២៥ ខែសីហា ឆ្នាំ ២០១៥ កន្លងទៅនេះក្រុមហ៊ុន ខេ ស៊ីមេន បានរៀបចំសន្និសីទកាសែតមួយនៅស្ថានីយទូរទស្សន៍អាស៊ីអាគ្នេយ៍ក្រោមអធិបតីភាព ឯកឧត្តម តែម ម៉ឺន ប្រធានសហព័ន្ធកីឡាប្រដាល់កម្ពុជា លោក គិត គឹមអ៊ន ប្រធានផ្នែកលក់ និងជាតំណាងក្រុមហ៊ុន ខេ ស៊ីមេន និងអ្នកតំណាងពីស្ថានីយទូរទស្សន៍អាស៊ីអាគ្នេយ៍ ដើម្បីប្រកាសជាផ្លូវការនូវការឧបត្ថម្ភ ទាំងស្រុងក្នុងកម្មវិធីប្រកួតប្រដាល់គុនខ្មែរ រដូវកាលថ្មីដើម្បីស្វែងរក កំពូលអ្នកប្រដាល់ជើងឯក ខេ ស៊ីមេន ដែលបាននឹងកំពុងមាន ការគាំទ្រយ៉ាងខ្លាំងនៅស្ថានីយទូរទស្សន៍ អាស៊ីអាគ្នេយ៍តាំងពីរដូវកាលមុនមក។
សន្និសីទកាសែត នៅស្ថានីយទូរទស្សន៍អាស៊ីអាគ្នេយ៍
ព្រឹត្តិការណ៍ប្រដាល់ដែល មានកិច្ចសហការរវាងភាគីធំៗចំនួនបីគឺ ក្រុមហ៊ុន ខេស៊ីមែន សហព័ន្ធកីឡាប្រដាល់កម្ពុជា និងស្ថានីយទូរទស្សន៍ អាស៊ីអាគ្នេយ៍ នឹងបន្តនាំមកជូនទស្សនិកជន នូវកម្មវិធីប្រដាល់ដែលកាន់តែ ជក់ចិត្តដិតអារម្មណ៍ជាងមុន នៅរៀងរាល់ថ្ងៃ សៅរ៍ ចាប់ពីថ្ងៃទី ៥ ខែកញ្ញា ឆ្នាំ ២០១៥ ពីម៉ោង ២ រហូតដល់ ៤ រសៀលតទៅ ដែលបងប្អូនអ្នកស្នេហាវិស័យកីឡា ប្រដាល់អាចទស្សនាតាមរយៈ កញ្ចក់ទូរទស្សន៍ អាស៊ីអាគ្នេហ៍ ឬនៅសង្វៀនប្រដាល់ អាស៊ីអាគ្នេយ៍ដោយផ្ទាល់។ កីឡាករទាំង៨រូបរួមមាន៖ ១. ស៊ូ វណ្ណៈ ២. ឆៃ សារ៉ា ៣. សល់ ពិសិដ្ឋ ៤. តក់ សោភ័ណ្ឌ ៥. ប្រាក់ រស្មី ៦. ឯម លីថូ ៧. ហេង វាសនា និង ៨. សេង ស្រឿន។
បើតាមលោក គិត គឹមអ៊ន កម្មវិធីប្រដាល់នេះបាននឹង កំពុងមានការគាំទ្រយ៉ាងខ្លាំង ដែលជំរុញឱ្យក្រុមហ៊ុនសម្រេច ដាក់បន្ថែមការប្រកួតលក្ខណៈ មិត្តភាពអន្តរជាតិពីរសប្តាហ៍ ជារៀងរាល់ខែ ដោយមួយសប្តាហ៍ នឹងមានការប្រកួតមិត្តភាពអន្តរជាតិពីរគូ ដើម្បីជាការឆ្លើយតបចំពោះ ការគាំទ្ររបស់អ្នកស្នេហាវិស័យកីឡា ប្រដាល់ក្បាច់គុនបុរាណខ្មែរ ក៏ដូចជាអ្នកគាំទ្រកម្មវិធី កំពូលអ្នកប្រដាល់ជើងឯក ខេ ស៊ីមេន ។
នៅក្នុងសន្និសីទកាសែតនេះ ដែរឯកឧត្តម តែម ម៉ឺន ប្រធានសហព័ន្ធកីឡា ប្រដាល់កម្ពុជាបានមានប្រសាសន៍ទាក់ទងនឹងការប្រកួតនេះថា លោកពិតជា មានសេចក្តីរីករាយដែល ស្ថានីយទូរទស្សន៍ SEA TV តែងយកចិត្តទុកដាក់ សហការជាមួយ សហព័ន្ធកីឡាប្រដាល់ ដើម្បីរួមចំណែក លើកកំពស់វិស័យកីឡាប្រដាល់ ក្បាច់គុនបុរាណខ្មែរយើង ហើយ ការប្រកួតនេះ នឹងជួយបង្កើនសមត្ថភាពកីឡាករ មន្ត្រីបច្ចេកទេស និងគណៈកម្មការ ប្រដាល់បន្ថែមទៀត ដែលវាជាធនធានមួយក្នុងការ ត្រៀមលក្ខណៈរបស់កម្ពុជាក្នុងការ ធ្វើម្ចាស់ផ្ទះ កីឡាស៊ីហ្គេម ឆ្នាំ ២០២៣ នាពេលខាងមុខ ។
ដោយឡែក តំណាងស្ថានីយទូរទស្សន៍អាស៊ីអាគ្នេយ៍ លោក ហេង សុធា ក្នុងឱកាសនោះ បានមានប្រសាសន៍ឱ្យដឹងផងដែរថា នាពេលបច្ចុប្បន្នលោក មើលឃើញថា កីឡាប្រដាល់ក្បាច់គុនបុរាណ មានការរីកចំរើន គួរឲ្យកត់សំគាល់ ហើយលោកសង្ឃឹមថា វិស័យនេះ នឹងកាន់តែមានសន្ទុះកាន់តែ ខ្លាំងក្លាថែមទៀត ហើយលោក សូមថ្លែងអំណរគុណ យ៉ាងជ្រាលជ្រៅ ដល់ក្រុមហ៊ុន ខេ ស៊ីមេន ដែលបានឧបត្ថម្ភផ្តាច់មុខ ដល់ការប្រកួតប្រដាល់នេះ ដែលជានិច្ចកាល ក្រុមហ៊ុនតែងជួយ លើកស្ទួយវិស័យកីឡានានា នៅកម្ពុជាឥតឈប់ឈរ ។
ជាថ្មីម្តងទៀត សូមកុំខកខានក្នុងការទស្សនាកីឡា ប្រដាល់ដ៏ធំអស្ចារ្យដែលមានចម្រុះ ដោយការប្រកួតដណ្តើមខ្សែក្រវាត់ និងមិត្តភាពអន្តរជាតិនេះ ដើម្បីចូលរួមគាំទ្រកីឡាករដែលអ្នកពេញចិត្តក្នុងកម្មវិធី “កំពូលអ្នកប្រដាល់ជើងឯក ខេ ស៊ីមេន” នៅស្ថានីយទូរទស្សន៍អាស៊ីអាគ្នេហ៍ និងរង់ចាំមើលថាតើកីឡាករណាមួយដែលនឹងក្លាយជាកំពូលជើងឯកក្នុងកម្មវិធីប្រដាល់នេះ។ ការចូលរួមទស្សនារបស់លោកអ្នក មានតម្លៃស្មើនឹងការចូលរួមគាំទ្រកីឡាប្រដាល់ក្បាច់គុនបុរាណខ្មែរ៕
បញ្ចូលអត្ថបទដោយ៖ រ័ត្ន
ខ្មែរឡូត
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
