ខេត្តកំពង់ស្ពឺ ៖ កម្មកររោងចក្រស្បែកជើងនិងស្រោមជើងចំនួន២នាក់ក្នុងចំណោម៤នាក់ពេល ជិះម៉ូតូ២គ្រឿងត្រឡប់មកផ្ទះវិញនៅវេលាម៉ោង៨យប់ថ្ងៃទី២២ កក្កដា ត្រូវបានពួកចោរមានគ្នាច្រើនជាង១០នាក់ស្ទាក់វាយប្លន់យក ម៉ូតូ តែពុំសម្រេចបណ្តាលឱ្យកម្មករពីរនាក់សន្លប់ធំនៅចំណុចស្រែ កសិកម្ម ក្នុងភូមិទួលតាកេត ឃុំត្រពាំងគង ស្រុកសំរោងទង ហើយត្រូវបានអ្នកភូមិនិងសមត្ថកិច្ចបញ្ជូនទៅសង្គ្រោះបន្ទាន់នៅ មន្ទីរពេទ្យបង្អែកខេត្តទាំងយប់ ។
ទាក់ទិនករណីស្ទាក់វាយប្លន់យកម៉ូតូនេះ ត្រូវមន្ត្រីប៉ូលិសមូលដ្ឋានរៀបរាប់ថា នៅវេលាម៉ោង៨យប់ថ្ងៃទី២២ កក្កដា ចំថ្ងៃអាទិត្យដោយកម្មករខ្លះសម្រាកខ្លះនៅធ្វើការបន្ថែមម៉ោង ទើបកម្មករពីរនាក់ ម្នាក់ឈ្មោះផូ ចាន់រ៉ាត់ អាយុ២២ឆ្នាំ និងម្នាក់ទៀតជាប្អូនបង្កើតធ្វើកម្មករជាមួយគ្នាឈ្មោះផូ ចាន់រី អាយុ១៨ឆ្នាំ មានទីលំនៅក្នុងភូមិចម្ការបុស្ស ឃុំរលាំងគ្រើល ស្រុកសំរោងទង ចេញពីធ្វើការពេលយប់ជិះម៉ូតូម៉ាកគុប៩០ ពណ៌បៃតងចាស់ ចេញពីរោងចក្រជាមួយកម្មករពីរនាក់ទៀតនៅភូមិជាមួយគ្នា ជិះម៉ូតូធុនសេ១២៥ពណ៌ខ្មៅ ស៊េរី២០១០ពីក្រោយ ។
ពេលមកដល់ចំណុចស្រែពិសោធន៍ស្រូវកសិកម្ម ក្នុងភូមិទួលតាកេត ឃុំត្រពាំងគង ក៏ស្រាប់តែមានចោរប្រមាណជាង១០នាក់ចេញមកស្ទាក់ផ្លូវ ឃាត់ម៉ូតូឱ្យឈប់ ។ ដោយដឹងថាមិនស្រួលកម្មកររងគ្រោះ២នាក់នោះបានជិះគេចទៅលើ ចិញ្ចើមផ្លូវត្រូវក្រុមចោរចាប់ដៃម៉ូតូឱ្យដួលរួចពួកគេ ព្រួតគ្នាវាយ ខ្លះប្រើដៃ ខ្លះដំបងនិងខ្លះទៀតប្រើខ្សែក្រវាត់ក្នុងបំណងប្លន់យក ម៉ូតូ។ ពេលនោះកម្មករ២នាក់ទៀត ដែលជិះម៉ូតូធុនសេ១២៥ ពីក្រោយឃើញហេតុការណ៍នេះ ក៏ជិះបកក្រោយយ៉ាងតក់ក្រហល់ និងស្រែកឱ្យគេមួយ ធ្វើឱ្យអ្នកភូមិផ្អើលឈូឆររត់មកជួយ ខ្លះកាន់ពិលបញ្ចាំងទៅរកក្រុមចោរ ។ ប៉ូលិសមូលដ្ឋានបានឱ្យដឹងទៀតថា ពេលមានការភ្ញាក់ផ្អើលធ្វើឱ្យក្រុមចោរភ័យនាំគ្នារត់ គេចខ្លួនបន្សល់ទុកម៉ូតូម៉ាកហុងដាធុនសេ១០០កូរ៉េកញ្ចាស់ មួយគ្រឿងនៅកន្លែងកើតហេតុ ។ ចំណែកកម្មករពីរនាក់ដែលជាបងប្អូនបានសន្លប់បាត់ស្មារតីត្រូវ គេបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពង់ស្ពឺទាំង យប់ ។
ឪពុកជនរងគ្រោះឈ្មោះវ៉ែន គីមេអង អាយុ៤៨ឆ្នាំបានប្រាប់ឱ្យដឹងថា ថ្ងៃអាទិត្យគេសម្រាកគ្រប់ៗគ្នា តែកូនគាត់ទាំងពីរនាក់និងមិត្តភក្តិពីរនាក់ទៀតក្នុងភូមិជាមួយ ពុំបានសម្រាកទេ គឺធ្វើការបន្ថែមម៉ោងដល់ម៉ោង៨យប់ទើបវិលមកផ្ទះវិញ មិនទាន់ដល់ផ្ទះផងក៏ត្រូវក្រុមចោរស្ទាក់វាយប្លន់យកម៉ូតូ តែពុំបានសម្រេចដោយសារមិត្តភក្តិជិះម៉ូតូធុនសេ១២៥ពី ក្រោយបានគេចត្រឡប់ក្រោយស្រែករកជំនួយ ទើបក្រុមចោរភ័យនាំគ្នាគេចខ្លួនបាត់អស់ដោយពុំបានយកម៉ូតូ កូនគាត់ទេ ព្រមទាំងបន្សល់ទុកម៉ូតូម៉ាកហុងដាធុនសេ១០០កូរ៉េមួយគ្រឿង នៅកន្លែងកើតហេតុទៀតផង ។
ម៉ូតូចោរ និងម៉ូតូកូនគាត់ត្រូវបានសមត្ថកិច្ចយកទៅរក្សាទុកនៅប៉ុស្តិ៍ រដ្ឋបាលត្រពាំងគងរង់ចាំពួកគាត់ដាក់ពាក្យបណ្តឹង ។ ករណីនេះសមត្ថកិច្ចការិយាល័យនគរបាលព្រហ្មទណ្ឌខេត្តកំពុងធ្វើ ការស្រាវជ្រាវរកមុខសញ្ញាក្រុមចោរទាំងនេះ ហើយ ៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
