ខេត្តសៀមរាប ៖ គ្រោះថ្នាក់ចរាចរណ៍ដ៏គួរឱ្យញាក់សាច់មួយ គឺរថយន្តកូរ៉េចំណុះ២,៥តោន ពណ៌ផ្ទៃមេឃ បើកបុកគោឈ្មោលមួយក្បាលផ្លោងធ្លាក់ថ្នល់ងាប់មួយរំពេច ហើយរថយន្តបានរអិលធ្លាក់ផ្លូវដាច់កង់មុខមួយចំហៀង តែមិនបណ្តាលឱ្យក្រឡាប់ទេ ចំណែកមនុស្ស១២នាក់ ដែលជិះក្នុងរថយន្តភ័យស្លន់ស្លោព្រលឹងចុងសក់ទាំងអស់គ្នា តែសំណាងណាស់គ្មាននរណាម្នាក់គ្រោះថ្នាក់ ។ ហេតុការណ៍នេះកើតឡើង កាលពីវេលាម៉ោង៣រសៀលថ្ងៃទី២២ កក្កដា នៅតាមផ្លូវជាតិលេខ៦ ចំណុចភូមិគំរូ ឃុំល្វា ស្រុកពួក ខេត្តសៀមរាប ។
តាមប្រភពព័ត៌មានឱ្យដឹងថា មុនពេលកើតហេតុគេឃើញរថយន្តកូរ៉េ ពណ៌ផ្ទៃមេឃមួយគ្រឿង បើកបរដោយឈ្មោះហីុ សឿន ភេទប្រុស អាយុ៥៨ឆ្នាំ រស់នៅភូមិច្រកទៀក ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ជាជាងសិប្បកម្ម បើករថយន្តមកដល់ចំណុចភូមិគំរូ ឃុំល្វា ស្រុកពួក ខេត្តសៀមរាប បានបុកគោមួយក្បាលផ្លោងធ្លាក់ផ្លូវបណ្តាលឱ្យងាប់ មួយរំពេច ឯរថយន្តបានរអិលធ្លាក់ថ្នល់ ដាច់កង់មុខម្ខាងផ្នែកខាងស្តាំ តែមិនបណ្តាលឱ្យក្រឡាប់ទេ ចំណែកមនុស្ស១២នាក់ដែលជិះក្នុងរថយន្តនោះពុំមាន គ្រោះថ្នាក់អ្វីទាំងអស់ គ្រាន់តែភ័យស្លន់ស្លោភ្នែកកញ្ចឹងកទាំងអស់គ្នា ។
ប្រភពបន្តថា មុនពេលកើតហេតុគោមួយក្បាលដែលម្ចាស់ចងឱ្យសីុ ស្មៅ បានដាច់ខ្សែហើយផ្អើលរត់ឡើងលើផ្លូវជាតិលេខ៦ ក៏ត្រូវរថយន្តបុកងាប់តែម្តង។ ចំណែកម្ចាស់គោឈ្មោះវ៉ែន វីន ភេទប្រុស អាយុ២៨ឆ្នាំ នៅភូមិដូនទ្រ ឃុំរវា ស្រុកពួក ខេត្តសៀមរាប ក្រោយពេលកើតហេតុ បានចូលមកដោះស្រាយជាមួយម្ចាស់រថយន្ត ពេលនោះខាងរថយន្តទាមទារសំណង២០០ដុល្លារ សម្រាប់ជួសជុលរថយន្តដែលត្រូវក្រពឹតនិងដាច់កង់ តែម្ចាស់គោបានអង្វរសងត្រឹម១៥០ដុល្លារ ខាងរថយន្តក៏យល់ព្រម៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]