កម្មករនាវា ២នាក់ លិចទូកកណ្តាល សមុទ្រ ស្រែករកជំនួយ គ្មានអ្នកឮ តែសំណាងណាស់ មានស្ត្រីចំណាស់ ត្រចៀកថ្លង់ ម្នាក់ឮទៅវិញ

អង់គ្លេស៖ រឿងហេតុដ៏ មហាសំណាង សម្រាប់កម្មករនាវា ២នាក់ដែល អាចនៅរស់រាន មានជីវិត ពីការលង់ទឹកស្លាប់ ដោយសារតែ​ សម្រែកហៅឲ្យ ជួយរបស់ពួកគេ ត្រូវបានស្ត្រីចំណាស់ ម្នាក់ដែលត្រចៀកធ្ងន់ (មនុស្សថ្លង់) និងជាមនុស្ស តែម្នាក់គត់ដែល អាចស្តាប់ឮ សម្រែករបស់ ពួកគេ រួចក៏ទៅ បន្លឺកណ្តឹងអាសន្ន ដើម្បីឲ្យក្រុម ជួយសង្រ្គោះចេញទៅ ជួយពួកគេ ទាំងនោះ។

យោងតាមប្រភព ព័ត៌មានបាន ឲ្យដឹងថា ស្រ្តីចំណាស់ ដែលជាលេខាធិការ ចូលនិវត្តន៍ម្នាក់ ឈ្មោះថា Christine Bowden អាយុ៧៧ឆ្នាំ និងជាមនុស្ស ថ្លង់អស់ពេល ជាយូរមកហើយ បានស្តាប់ឮ សម្លេងស្រែក ហៅឲ្យជួយ ពីកម្មករនាវា ២នាក់ ដែលពួកគេជួប ឧបត្តិហេតុ លិចនាវា​ នៅក្នុងសមុទ្រ Looe នៃប្រទេស អង់គ្លេស ហើយនេះគឺជា សំណាងដ៏ល្អ បំផុតព្រោះថា Christine ទើបនឹងទិញ ឧបករណ៍ជំនួយ ក្នុងការស្តាប់ មុនថ្ងៃកើតហេតុ មួយថ្ងៃ ដែលនេះជា មូលហេតុនាំឲ្យ គាត់ស្តាប់ឮ សម្លេងស្រែកឲ្យជួយនោះ ដែលមនុស្សដទៃទៀត មិនអាចស្តាប់ឮបាន។

ប្រភពព័ត៌មាន បានបញ្ជាក់ទៀតថា ទីតាំងដែល នាវាលិចនោះ គឺស្ថិតនៅ ចំងាយជាង កន្លះគីឡូម៉ែត្រ ពីសួនច្បារនៅឯ ឆ្នេរខ្សាច់ Cornish ដែលជាកន្លែង Christine កំពុងតែ ឈរមើល បន្លែរបស់គាត់ ហើយស្របពេលនោះ គាត់ក៏បានស្តាប់ឮ សម្រែកឲ្យជួយ ចេញពីផ្ទៃសមុទ្រ យ៉ាងច្បាស់ ក្រោយមកគាត់ ក៏រត់ទៅ បន្លឺកណ្តឹងអាសន្ន ដើម្បីរាយការណ៍ ទៅដល់ក្រុម ជួយសង្រ្គោះ ឲ្យចេញប្រតិបត្តិការ ទៅជួយពួកគេ ទាំង២នោះ ឲ្យរួចផុត ពីសេចក្តីស្លាប់ បានដោយជោគជ័យ។

Christine Bowden ជាមនុស្សតែម្នាក់ ដែលអាចស្តាប់ឮ សម្រែករកជំនួយ ចេញពីផ្ទៃសមុទ្រ

Christine បាននិយាយថា “នេះគឺជារឿង ដ៏មហាសំណាងមួយ ព្រោះថាបើ ថ្ងៃនោះខ្ញុំ មិនទាន់បាន ទិញឧបករណ៍ ជំនួយក្នុងការស្តាប់ ទេនោះ ពួកគេច្បាស់ជា ជួបរឿងអាក្រក់ ដែលអាចប៉ះពាល់ ដល់ជីវិត ជាមិនខាន”។

នេះគឺជារឿងហេតុ ដ៏កម្រនិង អាចនិយាយបានថា កម្មករនាវា ២នាក់នោះ ពិតជាមាន សំណាងធំ ប្រាកដមែន ដែលថាសម្រែក របស់ពួកគេ គឺពិតណាស់ មិនអាចនឹងធ្វើឲ្យ មនុស្សធម្មតា ស្តាប់ឮបាន នោះទេ ព្រោះថាចំងាយ នៅឆ្ងាយពេក តែបែរជា មានស្ត្រីចំណាស់ ដែលត្រចៀកធ្ងន់ម្នាក់ អាចស្តាប់ឮ សម្រែករបស់ពួកគេ ទៅវិញ៕

ក្រុមជួយសង្រ្គោះ ចេញទៅជួយ កម្មករនាវា ដែលជួបឧបត្តិហេតុ លិចទូក កណ្តាលសមុទ្រ

សួនច្បារដែល Christine ឈរហើយ ស្តាប់ឮសម្រែក របស់កម្មករនាវា ទាំង២នាក់នោះ

ប្រភព៖ ដេលីម៉េល

ដោយ៖ សុជាតិ

ខ្មែរឡូត