រាជធានីភ្នំពេញ ៖ នៅវេលាម៉ោង៩និង៣០នាទីព្រឹកថ្ងៃទី២១ កក្កដា ប្រជាពលរដ្ឋបានផ្អើលឆោឡោ ដោយសារឃើញពស់ថ្លាន់មួយក្បាលលូនចេញពីក្នុងលូទៅពួនក្នុងប្រអប់ទ្វារ ដែក ដែលជាផ្ទះចាក់សោទុកចោលគ្មានមនុស្សនៅ ។ លំនៅឋាននោះលេខ៤៧ស្ថិតនៅតាមបណ្តាយផ្លូវលេខ៤៥BTភូមិត្នោត ជ្រុំ៣ សង្កាត់បឹងទំពុន ខណ្ឌមានជ័យ ។
ប្រភពព័ត៌មានពីប្រជាពលរដ្ឋឲ្យដឹងថា មុនដំបូងគេឃើញពស់ថ្លាន់ធំមួយក្បាលនេះលូនចេញពីក្នុងលូ នៅជិតកន្លែងកើតហេតុ ដែលឃើញបែបនេះប្រជាពលរដ្ឋនាំគ្នាស្ទាក់បម្រុងចាប់តែចាប់មិនបាន ដោយសារពស់ថ្លាន់នេះលូនទៅចូលចន្លោះប្រអប់ទ្វារដែកផ្ទះលេខ៤៧ ដែលជាផ្ទះចាក់សោទុកចោលគ្មានមនុស្សនៅ។ ពេលឃើញពស់ថ្លាន់លូនចូលទៅសម្ងំពួននៅចន្លោះប្រអប់ទ្វារ បែបនេះប្រជាពលរដ្ឋក៏បានរាយការណ៍ទៅលោកចៅសង្កាត់ឲ្យ បានដឹង ។
បន្ទាប់ពីលោកចៅសង្កាត់ទទួលបានដំណឹងហើយក៏រាយការណ៍ ទៅក្រុមអន្តរាគមន៍បង្ក្រាបបទល្មើសសត្វព្រៃចល័ត សហការជាមួយអង្គការសម័្ពន្ធមិត្តសត្វព្រៃ និងកងរាជអាវុធហត្ថលើផ្ទៃប្រទេសចុះទៅជួយចាប់ទាញពស់ថ្លាន់នោះ ចេញពីចន្លោះទ្វារតែពស់ថ្លាន់មិនព្រមចេញទេ ទាល់តែជួលបុរសម្នាក់ក្នុងតម្លៃ១ម៉ឺនរៀលចូលទៅចាប់ទាញចេញមក ទើបចាប់ពស់ថ្លាន់នោះបានយកមកច្រកការុងយកទៅដាក់នៅសួនសត្វភ្នំតាម៉ៅ ។
បើតាមលោក អ៊ូ វណ្ណារ៉េត អនុប្រធានក្រុមអន្តរាគមន៍បង្ក្រាបបទល្មើសសត្វព្រៃចល័តបានឲ្យដឹង ថា ពស់ថ្លាន់នោះមានទម្ងន់៦,៣គីឡូក្រាម ប្រវែង២,២ម៉ែត្រ បន្ទាប់ពីចាប់បានហើយនឹងយកទៅរក្សាទុកនៅភ្នំតាម៉ៅ ហើយពេលប្រមូលបានច្រើនទើបយកទៅរក្សាទុកនៅសួនសត្វនៅទីរួម ខេត្តកោះកុង ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]