រាជធានីភ្នំពេញ ៖ ស្នូរផ្ទុះកំប៉ុងហ្គាសបានលាន់ឮឡើងនៅក្នុងហាងលក់ស៊ុបគោយីហោ «សមុទ្រខ្មៅ»ស្ថិតនៅតាមបណ្តោយផ្លូវលេខ១០៥ សង្កាត់បឹងត្របែក ខណ្ឌចំការមន កាលពីវេលាម៉ោង៨និង៤០នាទីយប់ថ្ងៃទី១៨ កក្កដា ២០១២ បណ្តាលឱ្យមានការភ្ញាក់ផ្អើលយ៉ាងខ្លាំងដល់ភ្ញៀវ ដែលចូលទៅផឹកស៊ីនៅក្នុងហាងនេះ ។ ទោះជាយ៉ាងណាការផ្ទុះកំប៉ុងហ្គាសនេះ មិនបណ្តាលឱ្យមានមនុស្សណាម្នាក់រងរបួសឡើយ តែបានខ្ទាតទឹកសៀង និងទឹកស៊ុបប្រឡាក់ភ្ញៀវដែលកំពុងអង្គុយផឹកស៊ី លើសពីនេះទៅទៀតភ្ញៀវដែលចូលទៅផឹកស៊ីក្នុងហាងនេះទាំងអស់ នាំគ្នាផ្អើល ព្រោះនឹកស្មានថាជាស្នូរផ្ទុះអាវុធ។
តាមការពិនិត្យជាក់ស្តែងនៅកន្លែងកើតហេតុ គេឃើញកំប៉ុងហ្គាសដែលផ្ទុះនោះខ្ទាតគូទកំប៉ុងចេញបាត់ ដោយសារជាកំប៉ុងចាស់ជ្រុលពេក ។ អ្នកឃើញហេតុការណ៍លាន់មាត់ថា សំណាងល្អហើយដែលបំណែកគូទកំប៉ុងដែលផ្ទុះនោះខ្ទាតទៅអត់ត្រូវ មនុស្ស បើត្រូវមនុស្សវិញប្រាកដជាមានអ្នកគ្រោះថ្នាក់មិនខានឡើយ ។ អ្វីដែលគួរឱ្យកត់សម្គាល់នោះ គឺគេសង្កេតឃើញម្ចាស់ហាងមានចរិតព្រងើយកន្តើយមិនសុំទោសភ្ញៀវ ដែលទៅផឹកស៊ីនោះទេ ទោះបីមានឧប្បត្តិហេតុបែបនេះកើតឡើងក៏ដោយ ។
ចំពោះកំប៉ុងហ្គាសចាស់ៗនេះ គឺតែងតែបង្កគ្រោះថ្នាក់ដល់មនុស្សញឹកញាប់ណាស់ ដូច្នេះគួរតែក្រុមហ៊ុនកំប៉ុងហ្គាសធ្វើការណែនាំដល់អ្នកប្រើ ប្រាស់ហ្គាសឱ្យដូរកំប៉ុងចាស់ចោលហើយជំនួសមកវិញនូវកំប៉ុងថ្មី ដើម្បីកុំឱ្យមានគ្រោះថ្នាក់ជាយថាហេតុ ។ ករណីខ្លះអាចបង្កជាគ្រោះអគ្គិភ័យថែមទៀត ដោយសារការផ្ទុះកំប៉ុងហ្គាសចាស់ៗនេះ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
