ខេត្តព្រះសីហនុ ៖ នារីរូបស្រស់សោភាម្នាក់បានធ្វើឱ្យមានការហួសចិត្តដល់សាធារណជនដោយសារត្រូវអាជីវករផ្សារលើក្រុងព្រះសីហនុស្ទាក់ចាប់បញ្ជូនឱ្យនគរបាលសណ្តាប់ធ្នាប់បុស្តិ៍ផ្សារលើ កាលពីវេលាម៉ោង២និង៥៦នាទីរសៀលថ្ងៃទី១០ កុម្ភៈ ដោយចោទថា ស្រ្តីរូបនេះបានធ្វើសកម្មភាពលួចកាបូបដៃអ្នកចូលទិញខោអាវដូចគ្នានៅតូបលេខ៩១-៩២ក្នុងផ្សារលើ ក្រុងព្រះសីហនុ ។
លោកអនុសេនីយ៍ទោ ង៉ាន នៃ មន្ត្រីនគរបាលសណ្តាប់ធ្នាប់បុស្តិ៍ផ្សារលើបានឲ្យដឹងថា ស្រ្តីដែលក្រុមអាជីវករឃាត់ខ្លួនពីបទលួចរួច បញ្ជូនមកនេះឈ្មោះគង់ ស្រីលីន អាយុ១៩ឆ្នាំ ស្នាក់នៅផ្ទះជួលម្តុំអូរ១ ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ មានមុខរបរមិនពិតប្រាកដ មានស្រុកកំណើតនៅភូមិទី៦ សង្កាត់វាលវង់ ក្រុងកំពង់ចាម ខេត្តកំពង់ចាម ។ រីឯម្ចាស់កាបូបលុយឈ្មោះសុខ ចាន់ ភេទស្រី អាយុ២៦ឆ្នាំ មានស្រុកកំណើតនៅឃុំជីរោទី២ ស្រុកត្បូងឃ្មុំ ខេត្តកំពង់ចាម បច្ចុប្បន្នស្នាក់នៅផ្ទះជួលក្នុងភូមិ៣ សង្កាត់លេខ៤ ក្រុងព្រះសីហនុ ជាបុគ្គលិកភោជនីយដ្ឋានឌឺបា ។
លោកអនុសេនីយ៍ទោ ង៉ាន នៃ បន្តថា តាមស្រ្តីជាម្ចាស់កាបូបនិយាយថា នៅវេលាម៉ោង១និង៣០នាទីរសៀលថ្ងៃទី៩ កុម្ភៈ នាងបានមកទិញខោអាវនៅតូបលេខ៩១-៩២ក្នុងផ្សារលើ ខណៈពេលកំពុង«ល»ខោអាវក្នុងបន្ទប់ផ្លាស់សម្លៀកបំពាក់ ភ្លេចកាបូបនៅខាងក្រៅក៏ត្រូវស្រ្តីម្នាក់ទៀតដែលជាភ្ញៀវដូចគ្នាលួចយកទៅ ប៉ុន្តែសំណាងល្អត្រូវបានអាជីវករផ្សារដែលមានសន្តានចិត្តជួយឃាត់ខ្លួនបាន ។ នេះជារឿងនឹកស្មានមិនដល់ ព្រោះតាមរយៈរូបសម្បតិ្តខាងក្រៅសាច់ឈាមសភ្លឺថ្លា នៅនឹងខ្លួនពោពេញទៅដោយគ្រឿងអលង្ការ សមតែជាអ្នកថ្លៃថ្នូរ ផ្ទុយទៅវិញបែរជាប្រព្រឹត្តអំពើគួរឱ្យស្អប់ខ្ពើមបែបនេះទៅវិញ ។ នៅពេលឃាត់ខ្លួន សមត្ថកិច្ចបានដកហូតកាបូបដៃមួយមានលុយចំនួន៣៥ដុល្លារដែលជារបស់ស្ត្រីរងគ្រោះ ។
នៅក្នុងហេតុការណ៍នេះដែរ ភាគីស្រ្តីម្ចាស់កាបូបពុំបានធ្វើការប្តឹងប្តល់នោះទេ ប៉ុន្តែទោះជាយ៉ាងណាក៏សមត្ថកិច្ចសណ្តាប់ធ្នាប់ផ្សារលើពុំដោះលែងទៅវិញភ្លាមៗនោះដែរ គឺបានកសាងសំណុំរឿងបញ្ជូនទៅកាន់អធិការដ្ឋានក្រុងបន្តទៀតដើម្បីចាត់ការទៅតាមផ្លូវច្បាប់ ៕
ដកស្រង់ពី គេហទំព័រ កោះសន្តិភាព
សូមប្រិយមិត្តទាំងអស់ជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
