រាជធានីភ្នំពេញ ៖ ពេលថ្មីៗនេះអ្នកប្រើប្រាស់ទូរស័ព្ទចិនមានការធ្លាក់ចុះបើ ធៀបនឹងពេលកន្លងមក បើទោះបីជាទូរស័ព្ទចិនមានកម្មវិធីច្រើន និងតម្លៃថោកក៏ដោយ ប៉ុន្តែពិនិត្យទៅលើគុណភាពប្រៀបធៀបជាមួយទូរស័ព្ទណូគា, សាមសុង និងទូរស័ព្ទផ្សេងទៀត ដែលមានស៊ីម២នៅមានកម្រិតនៅឡើយ ម្យ៉ាងទៀតទូរស័ព្ទណូគា សាមសុង (Original) មានតម្លៃសមរម្យ គុណភាពខ្ពស់ ធន់ មានការធានាពីអ្នកលក់ដែលអាចឱ្យអ្នកទិញមានទំនុកចិត្តក្នុង ការប្រើប្រាស់ ដូច្នេះឃើញថា អតិថិជនបានងាកទៅប្រើប្រាស់ទូរស័ព្ទណូគា និងសាមសុងស៊ីមពីរវិញ...។
លោកហុង ចាន់ណា ជាម្ចាស់ហាងលក់ទូរស័ព្ទនៅផ្សារទួលទំពូង បានមានប្រសាសន៍ប្រាប់អ្នកកាសែតកោះសន្តិភាពត្រង់ៗថា នៅហាងរបស់លោកមានលក់ទូរស័ព្ទទាំងពីរប្រភេទ គឺទូរស័ព្ទចិន និងទូរស័ព្ទហ្ស៊ីន (Original) ។ លោកបន្តថា នៅពេលបច្ចុប្បន្នទីផ្សារទូរស័ព្ទចិនមានសភាពស្ងាត់ជាមុន បើធៀបពេលមុនៗដែលពេលនេះហាងទូរស័ព្ទរបស់លោកមិនសូវលក់ដាច់ទេ ។ លោកចាន់ណា បានបន្ថែមថា ទូរស័ព្ទហ្ស៊ីនស៊ីមពីរ (ណូគា, សាមសុង) មានគុណភាពល្អជាង ហើយនៅពេលបច្ចុប្បន្នទូរស័ព្ទហ្ស៊ីនគឺមានតម្លៃប្រហាក់ប្រហែលនឹង ទូរស័ព្ទចិនដែរ ជាពិសេសមានកម្មវិធីចាក់ស្តាប់បទចម្រៀង និងកម្មវិធីផ្សេងៗទៀតដូចគ្នា ។ លោកបានលើកឧទាហរណ៍ថា ទូរស័ព្ទ Nokia ហ្ស៊ីន មានស៊ីមពីរមានកម្មវិធីស្តាប់បទចម្រៀង លេងហ្គេម និងលេងអីុនធើរណេតបាន ជាពិសេសតម្លៃប្រហាក់ប្រហែលនឹងទូរស័ព្ទចិនដែរនោះ ធ្វើឱ្យអ្នកទិញបាត់បង់ទំនុកចិត្តចំពោះទូរស័ព្ទចិនហើយងាកទៅ ទិញទូរស័ព្ទហ្ស៊ីនប្រើប្រាស់ដូចជា ណូគា និងសាមសុងវិញ ។
ដើម្បីឆ្លើយតបនឹងបញ្ហានេះ លោកជា ស៊្រុន ដែលជាអាជីវករលក់រាយ និងបោះដុំទូរស័ព្ទចិននៅឃ្លាំងរំសេវបានមានប្រសាសន៍ស្រដៀង គ្នានឹងលោកហុង ចាន់ណា ដោយលោកអះអាងថា លោកពិតជាទទួលស្គាល់ទូរស័ព្ទចិនពុំសូវមានគុណភាពដូចទូរស័ព្ទ ហ្ស៊ីនទេ ទោះបីវាមានកម្មវិធីច្រើន និងតម្លៃថោក ជាពិសេសរូបរៀងដូចគ្នាក៏ដោយ ។ លោកបន្តថា នៅពេលបច្ចុប្បន្នទីផ្សារទូរស័ព្ទចិនមានការធ្លាក់ចុះបន្តិច បើប្រៀបធៀបនឹងពេលមុនៗ ម្យ៉ាងទៀតអតិថិជនភាគច្រើនបែរមកទិញទូរស័ព្ទហ្ស៊ីនប្រើប្រាស់ វិញ ហើយទោះជាស៊ីមពីរ ឬស៊ីមមួយក៏ដោយ ព្រោះពួកគេគិតថា វាមានគុណភាពខ្ពស់ តម្លៃសមរម្យល្មម និងធន់ជាងទូរស័ព្ទចិន ។ ការលក់នៅលើទីផ្សារទូរស័ព្ទចិនលំដាប់មធ្យមមានតម្លៃពី៣៥ ដុល្លារទៅ៥០ដុល្លារ ឯលំដាប់បង្គួរតម្លៃពី៦០ដុល្លារទៅ១០០ដុល្លារ និងលំដាប់ល្អតម្លៃពី១០០ដុល្លារទៅ១៥០ដុល្លារ ។
កញ្ញាថារី ដែលមានស្រុកកំណើតនៅខេត្តក្រចេះ បានមកធ្វើជាកម្មការិនីកាត់ដេរនៅទីក្រុងភ្នំពេញអស់រយៈពេល៣ ឆ្នាំបាននិយាយឱ្យដឹងថា កញ្ញាធ្លាប់ប្រើប្រាស់ទូរស័ព្ទចិនដែរ ប៉ុន្តែពេលបច្ចុប្បន្នកញ្ញាប្តូរមកប្រើទូរស័ព្ទ Nokia ហ្ស៊ីនវិញម្តង។ កញ្ញាបន្តថា ទូរស័ព្ទចិនមានគុណភាពទាបជាងទូរស័ព្ទហ្ស៊ីន ទោះបីវាមានកម្មវិធី និងរូបរាងដូចទូរស័ព្ទហ្ស៊ីនក៏ដោយ ។ កញ្ញាបានអះអាងថា មូលហេតុដែលកញ្ញាប្តូរមកប្រើប្រាស់ទូរស័ព្ទហ្ស៊ីនវិញនោះ គឺដោយសារកញ្ញាមានលទ្ធភាពអាចទិញទូរស័ព្ទហ្ស៊ីនបាន ហើយម្យ៉ាងទៀតពេលបច្ចុប្បន្នទូរស័ព្ទហ្ស៊ីនក៏មានតម្លៃថោកផងដែរ បើប្រៀបធៀបជាមួយទូរស័ព្ទចិនដូច្នេះឃើញថា អតិថិជនបានងាកទៅប្រើប្រាស់ទូរស័ព្ទណូគា និងសាមសុង៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
