រាជធានីភ្នំពេញ ៖ ចៅក្រមសាលាដំបូងរាជធានី លោកឆែ វីរៈ កាលពីថ្ងៃទី៨ កក្កដា បានសម្រេចឃុំខ្លួនជាងជួសជុលម៉ូតូ២នាក់ពាក់ព័ន្ធនឹង ការប្រើអំពើហិង្សាដោយចេតនាលើអ្នកលក់គ្រឿងបន្លាស់ម៉ូតូ ២នាក់បណ្តាលឱ្យរងរបួសធ្ងន់ ។ ជាងជួសជុលម៉ូតូដែលចៅក្រមសម្រេចឃុំខ្លួនដាក់ពន្ធនាគា ជាបណ្តោះអាសន្ននេះម្នាក់ឈ្មោះ ជា ហេង ភេទប្រុស អាយុ៣៤ឆ្នាំ និងម្នាក់ទៀតឈ្មោះ ហ៊ុន គៀន ភេទប្រុស អាយុ១៩ឆ្នាំ ពួកគេស្នាក់នៅផ្ទះជួលសង្កាត់ស្ទឹងមានជ័យ ខណ្ឌមានជ័យ ។
គួរបញ្ជាក់ថា កាលពីថ្ងៃទី៥ កក្កដា វេលាម៉ោងប្រមាណជាង២រសៀលនៅកន្លែងលក់ម៉ូតូជជុះផ្លូវលេខ២៤៧ សង្កាត់ទឹកល្អក់ទី៣ នគរបាលខណ្ឌទួលគោកបានធ្វើការឃាត់ខ្លួនជាងជួសជុលម៉ូតូ ២នាក់ដូចមានឈ្មោះខាងលើ ។ ជុំវិញការឃាត់ខ្លួននេះ បណ្តាលមកពីក្រុមជាងជួសជុលម៉ូតូនោះមានគ្នាប្រមាណ១០ នាក់ បានផឹកសីុស្រវឹងទាក់ពាក្យសម្តីគ្នារករឿងវាយតប់ទៅលើ ជាងកាត់សក់ម្នាក់ ដែលស្ថិតនៅក្នុងក្រុមគេនោះដែរ។ ឃើញដូច្នេះ អ្នកលក់គ្រឿងបន្លាស់ម៉ូតូ២នាក់បានចេញមុខទៅជួយឃាត់ កុំឱ្យមានរឿងវាយតប់គ្នា ក៏ត្រូវក្រុមជាងជួសជុលម៉ូតូ២នាក់នោះវាយបណ្តាលឱ្យរង របួសធ្ងន់តែម្តង ។ ជនរងគ្រោះទាំង២នាក់នោះ ម្នាក់ឈ្មោះសេង ឆៃ ភេទប្រុស អាយុ២១ឆ្នាំ ស្នាក់នៅផ្ទះលេខ៧ ផ្លូវលេខ៣៣៤ សង្កាត់បឹងសាឡាង ខណ្ឌទួលគោក ជាអ្នកលក់គ្រឿងបន្លាស់ម៉ូតូ រងរបួសផុងលលាដ៍ក្បាលធ្ងន់ធ្ងរ ត្រូវបញ្ជូនទៅសង្គ្រោះនៅប្រទេសវៀតណាម និងម្នាក់ទៀតឈ្មោះ គន តូ ភេទប្រុស អាយុ៣២ឆ្នាំ ជាអ្នកលក់គ្រឿងបន្លាស់ម៉ូតូដែរ ស្នាក់នៅផ្ទះលេខ៣៣A ផ្លូវលេខ២៤៧ សង្កាត់ទឹកល្អក់ទី៣ រងរបួសលើផ្ទៃមុខកំពុងសង្គ្រោះនៅគ្លីនិកឯកជនមួយ ក្នុងរាជធានីភ្នំពេញ។
សំណុំរឿងនេះ នគរបាលបានធ្វើការសន្និដ្ឋានដាក់ចូលសាលាដំបូងរាជធានី ភ្នំពេញ ដោយបានបញ្ជាក់ថា មុនកើតហេតុភាគីជនរងគ្រោះកំពុងអង្គុយលក់ដូរធម្មតា ចំណែកក្រុមជនសង្ស័យពេលត្រឡប់មកពីផឹកសីុវិញ បានទៅរករឿងវាយជាងកាត់សក់ម្នាក់ឈ្មោះតាំង សេងហៀង អាយុ២៥ឆ្នាំ ដោយពុំដឹងមូលហេតុ ។ ឃើញដូច្នេះជនរងគ្រោះពីរនាក់នោះបានចេញមុខទៅឃាត់ ក៏ត្រូវជនសង្ស័យមានគ្នាប្រមាណ១០នាក់ព្រួតគ្នាវាយ ដែលខ្លះប្រើដែកខ្នងកង់ម៉ូតូ ខ្លះប្រើញញួរ ស្ទុះទៅវាយបណ្តាលឱ្យរងរបួសធ្ងន់ ។
យោងតាមអង្គហេតុដូចសមត្ថកិច្ចបានធ្វើរបាយការណ៍ខាង លើ និងការសាកសួរជនសង្ស័យពីសំណាក់តំណាងអយ្យការមាន ភាពស៊ីសង្វាក់គ្នា ទើបព្រះរាជអាជ្ញារង លោកសៀង សុខ បានចោទប្រកាន់ជនសង្ស័យទាំង២នាក់ជាផ្លូវការពីបទប្រើ អំពើហិង្សាដោយចេតនាមានស្ថានទម្ងន់ទោស ។ បន្ទាប់ពីមានការចោទប្រកាន់ជាផ្លូវការហើយ លោកព្រះរាជអាជ្ញារងបានចាត់បញ្ជូនសំណុំរឿងដាក់ជូន ចៅក្រមស៊ើបសួរ លោកឆែ វីរៈ សម្រេចឃុំខ្លួនជាងជួសជុលម៉ូតូទាំង២នាក់នេះដាក់ពន្ធ នាគារជាបណ្តោះអាសន្ន ដើម្បីរង់ចាំបើកការស៊ើបអង្កេតបឋម និងឈានទៅសវនាការផ្តន្ទាទោសតាមផ្លូវច្បាប់៕
បញ្ចូលអត្ថបទ ៖ ស្រីណា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
